Read lubukusu Isa. 32 Bible Online

Isa. 32 - lubukusu bible

Isa. 32

¹Endaalo ndala elibao niyo omwami alibao owamiia ne lukoosi, lundi babaana be bubwami be kholo baliamiia ne bung'ali.

²Buli mulala khu nibo aliba nga sisibiimbilo khu khuungu, lundi nga abuundu e khukhwekhisia embembeesi. Baliba nga chinjichi chibisia mu sichiimi, nga sisiniini sie libaale liboofu mu sichiimi.

³Chimoni chabwe ne kamaru, biliikukha khulwe buyeeti bwe babaandu.

⁴Se baliluyililakho lundi tawe, ne kakhali balikhola mu limanyilisia, mala niko baliboola kaliba niko benya.

⁵Se aliio omundu olibaasia ali omusilu ali ne lukoosi, namwe aboole ali omundu omubi ali owa ng'ali tawe.

⁶Omusilu alomaloma ke busilu, mala ebaasia bibiindu bimayaanu. Niko akhola nende niko aboola kali bukhomo khu Wele Omunyali Owa Bioosi, ne salisianga be njala, namwe saliaana sie khunywa khu baandu be bulesia tawe.

⁷Omundu omusilu ali omumayaanu ne akholanga ke bumayaanu, akwangwaana khumalao bataambi khulwe bubeeyi bwewe, mala abakhiingilila bakhanyoola bung'ali bwabwe tawe.

⁸Ne omundu we lukoosi akholanga bung'ali, mala eema khu bung'ali.

⁹Enywe bakhasi mumenyile ne mukheendekhelakho tawe, rekeeresia niko ese ndikho ndoma.

¹⁰Enywe luno munyala khuba ne mwikuure, ne kakhali siise nga kumwiiko kukwiicha mukhafwe kumwoyo, sikila chisabibu se chilibao nicho mufuna tawe.

¹¹Enywe mwamenyilenge limenya liliangu, likhalimo simwiembelesia tawe, ne luno terema mu buri! Yefuula chingubo chenywe, mala mweboele bitasi mu bibuno.

¹²Yeumba kamakhono kenywe mu bubeeleli sikila kimikuunda kie ngakha ne kimikuunda kie kimisabibu kionakwe,

¹³mala bisaala bie kamawa ne mbululwe, bilikho bimela mu maloba ke babaandu base. Lila sikila chinju choosi nicho babaandu basangaalilamo, ne lukoba luboofu lulwaba ne lwechula bulamu.

¹⁴Akhaba lichipi liosi lilanjukhwa, ne lukoba luboofu lulanjukhilwa elala. Chingo ne chingoba, che kamasiisi kakaluliindanga, kaliba kamatechule buli lwosi. Chipunda che mundaa chilikeendakeendamo, ne kamakheese kalinyoolayo kamayilwe.

¹⁵Ne Wele lundi alikhurumira efwe roho wewe. Kamaloba kakhalikho ne ngakha kalikela ke ngakha, ne kimikuunda kiliama bibiaamo bilayi.

¹⁶Buli abuundu mu sibala, buluungi ne bung'ali bulikholwa.

¹⁷Sikila buli mundu alikhola kang'ali, kumuleembe ne buliindi bilibao buli lwosi.

¹⁸Babaandu ba Wele se baliba ne lilieendekhelela tawe, ne chingo chabwe chiliba ne kumuleembe ne buliindi.

¹⁹(Ne kamaarara kalikwa mu musiru, mala lukoba luboofu lulitechulwa lukwe.)

²⁰Buli mundu aliba omusangaafu ariena khuba ne kameechi kamakali khulwe biakhulia, ne kamayilwe ke buliindi bulayi buli abuundu khulwe chipunda ne chikhaafu.