Read lubukusu Isa. 33 Bible Online

Isa. 33 - lubukusu bible

Isa. 33

¹Basiku befwe balamilwe! Banuulile lundi bachamilwe. Ne kakhali siise siabwe sie khunuula ne khuchaama sikhawe, ne babene bakhabe nibo banuula ne khuchongela.

²Wele Omunyali Owa Bioosi khukholele siisa. Khwareere lilieyikina liefwe mwiwe, ba engabo yefwe buli ndaalo mala okhuonie mu biise bie butinyu.

³Nga ewe nokhupanila efwe, chikholo chilukha buyoka bwe liie.

⁴Kimiaandu kiabwe, kinyoolekha mala kiyaaywa.

⁵Wele Omunyali Owa Bioosi ali omukali ariena! Amia khu buli siindu. Alichusia Yerusalemu bung'ali ne buluungi,

⁶mala aelesie ekholo kumuleembe. Buli lwoosi alilanga babaandu bewe, mala abaelesie limanya ne bukesi. Libiikhilo liabwe liboofu lili buriaani bwabwe khu Wele Omunyali Owa Bioosi.

⁷Banyindaafu balikho basaba buyeeti. Barumwa ba bakhaka khureera kumuleembe balikho balila burafu.

⁸Kimiyila kimiboofu kili ne busiku bukali, mala se aliio na mulala okibirakho tawe. Buambaani bwafuniikhe ne chindakaano chonaakwe. Se aliio na mulala oelesibwa lukoosi lundi tawe.

⁹Sibala sili busa mala sianjuukhwe, kimisiru kia Lebanoni kiakhukhumuusie kamasaafu, litooma lie ngakha lia Sharoni lili nga sisiangalaamwe. Ne mu Bashani ne khu sikulu sia Karimeli kimirongooro kilikho kikhukhumusia kamasaafu.

¹⁰Wele Omunyali Owa Bioosi aboolela chikholo ali, “Ese luno ndakhola sikholwa, ndekesia nga nendi ne bunyali.

¹¹Enywe mung'oona lirekekha likhali ne bukhala tawe, ne buli siindu nisio mukhola sili busa. Roho wase ali nga kumulilo kukhamubunie enywe.

¹²Muliatikhaka nga kamabaale niko bosia bang'oonemo esimendi, nga kamawa ne kayia kakwa esimendi.

¹³Lekha buli mundu oli aambi ne aleeyi, aulile niko ese nakholile mala afukiilile bunyali bwase.”

¹⁴Babaandu bamayaanu ba Sayuni balikho baterema mu buri ne baboola bali, “Bukhalaki bwa Wele buli kumulilo kukwosia buli lwosi. Aliio khwifwe onyala akhila kumulilo kuno ku?”

¹⁵Munyala mwakhila mwaba ne muboola ne khukhola kang'ali. Mukharumikhira bunyali khubea bataambi, lundi mukhakaanila asoya tawe. Mukhaambaana ne baberi tawe, namwe khukhola bibiindu bibiindi bimayaanu tawe.

¹⁶Nio enywe mulaba ne kumuleembe, mulaliindwa bulayi nga muli mu lukoba lwe kamasiisi ke kamaani, mulaba ne biakhulia bie khulia ne kameechi ke khunywa.

¹⁷Lundi enywe mulabona omwami ne amiia ne sambo endayi lukali, khu sibala sibalaayi esio chimbeka choosi.

¹⁸Buuri bwenywe bukhale bwe bakeni baroosia busuuru, bulaba busa likhebulila.

¹⁹Se mulibona lundi baakwa be kibonio, balomaloma lulomo nilwo enywe mukhaulila tawe.

²⁰Lola Sayuni! Lukoba luboofu nilwo efwe khukholelanga kimilimo kiefwe kie dini. Lola Yerusalemu! Aliba abuundu e buliindi bulayi ne khumenyamo! Aliba nga liiema likhauyisibwa tawe, nga nilio bichaangi bialio bikhakhuulwanga tawe, lundi nga niio kimikoye kialio kikhakhalikhanga tawe.

²¹Wele Omunyali Owa Bioosi akhakhwekesie efwe luyali lwewe. Khukhamenye khundulo khwe chinjichi chimbalaayi ne chindiiti, ne akhaba chimeeli che basiku se chilibiramo tawe.

²²Sikila Wele Omunyali Owa Bioosi ali Omukhalaki, Wele Omunyali Owa Bioosi ali Omwami wefwe. Wele Omunyali Owa Bioosi ali Omwami wefwe mala akhakhuonie.

²³Kimikoye kie khu meeli echo choosi se kiyeeta siindu tawe, se kitila kumurongooro kwe pendera kwime abwene tawe, namwe engubo se bambukha tawe. Nono biyaaywa biechuule swa, bilakabanwamo, akhaba baleme balinyoola kumukabwa kwabwe.

²⁴Se aliio omumenywa oliloma ali “Ese ndwala”, babaandu bamenyileyo, balibeelwa bumayaanu bwabwe.