Read lubukusu Isa. 34 Bible Online

Isa. 34 - lubukusu bible

Isa. 34

¹Babaandu be chikholo choosi khemwiche ano! Khe mwebuusie ano mala murekeeresie. Lekha sibala sioosi ne buli mundu osimenyilekho eche ano mala arekereesie.

²Wele Omunyali Owa Bioosi aambile lirima chikholo choosi, ne banamae babwe boosi. Achikhalakile chibune.

³Kimibili kiabwe se kilisiikhwa tawe, ne kakhali kilibao busa kibole ne khuunya, ne bikulu bilichula sifuki.

⁴ Enyanga, kumwesi ne ching'enieesi bilibulungukha bikwe asi. Likulu lilikoriokha nga sitabu ne siulukuuswe, ne ching'enieesi chilikhukhumukha nga kamasaafu ne kakwa, khukhwama khu musabibu namwe khu mutuli.

⁵ Wele Omunyali Owa Bioosi arekekha embalu yewe mwikulu, ne luno elarema Edomu, babaandu nibo akhalakila khubuna.

⁶Embalu yewe elifunikhwa ne kamafuki ne kamafura kabwe, nga kamalasile ne kamafura ke chimbusi nibio baosia. Wele Omunyali Owa Bioosi aliaana liiosio mu lukoba lwa Bosira, alikhola lino libe lifwa likali mu sibala sia Edomu.

⁷Babaandu balibunjakala busa nga chisaang'i che mundaa ne chiuunwa chinjoka, mala sibala silichula sifuki ne khufunikhwa ne kamafura.

⁸Sino sili siise nisio Wele Omunyali Owa Bioosi alireeseliakho Sayuni, mala alieliacha basiku ba Sayuni.

⁹Chinjichi cha Edomu chilikaluukhana chikele elamu, ne liloba lilikaluukhana likele kumulilo kumurafu. Sibala sioosi siliya nga elamu.

¹⁰ Siliya kumuusi ne silo ne liliisi liliitukha buli lwosi. Sibala sikhabe sichiimi selukho na selukho, ne se aliio olisibiramo lundi tawe mindali.

¹¹Ne kakhali kisilili ne chinjekeche chilisibina, Chisikhiikhi ne khooro chilimenyamo. Wele Omunyali Owa Bioosi alibarerera chingoyaani, ne sisiayuumba khu bemeelesi basio.

¹²Salibao Omwami osiamiia tawe, ne babemeelesi se balibao tawe.

¹³Kamawa ne kamarakaru bilimela mu machipi ne mungoba che kamasiisi, chingipwe ne chisikhiikhi chilimenyamo.

¹⁴Chisolo che mundaa chilimenyamo, ne kimisieno kililangana. Kusolo kwe kamakana kulichayo ne kuyima abuundu niio kuolela.

¹⁵Chisikhiikhi chiliombakha biswi biacho chireere kamaki, chaluule mala chikhusie chingosia chilibuusania sia ndala.

¹⁶Menielesia mu sitabu sia Wele Omunyali Owa Bioosi sie bibuumbe bilamu mala musome niko siboola, se siliio silala khu bibuumbe bino silitambamo tawe, ne se siliio silitamba sisiasie tawe. Wele Omunyali Owa Bioosi alaka libe lirio, ne niye omwene akhabibuusie alala.

¹⁷Ali Wele Omunyali Owa Bioosi omwene niye olibakabaniamo sibala, mala aelesie buli mulala kumukabwa kwewe. Balimenya mu sibala selukho na selukho, mala siliba sisiabwe mindali na mindali.