Read lubukusu Isa. 35 Bible Online

Isa. 35 - lubukusu bible

Isa. 35

¹Sisiangalaamwe siliekhoya, bimuli bilimulikha mu sichiimi.

²Sisiangalamwe siikheembe ne khukhwekhoya, siliba silayi nga bikulu bia Lebanoni sie ngakha nga kimikuunda Karimeli ne Sharoni. Buli mundu alibona bulayi bwa Wele Omunyali Owa Bioosi, lolakho bukali bwewe ne bunyali.

³ Andalasia kamakhono kaluyilile, ne kamasikamo kamatekhele.

⁴Boolela buli mulala ofwiile kumwoyo oli, “Ba ne kamaani ne mukharia tawe! Wele alikho echa khumureesia, akhapie sibi basiku benywe.”

⁵Babofu balibona, ne bamiinyi baliulila.

⁶ Baleme baliekhoya ne khukhina, ne abo bakhalomaloma tawe, baliyokela ne bekhoya. Chinjichi chilibisia mu siangalaamwe.

⁷Kumuyekhe kuubilile kuliekela enyanja, ne sibala sisioomu silichulamo chisebele. Niio chinjusi chamenyanga aliekela litiisi, eboonga elikela bisele ne kamakoloolwe.

⁸Kumuyila kumuboofu kulibayo kulilaangwa bali “Kumuyila kwe butakatifu.” Se aliio omumayaanu olikeenda khu muyila okwo tawe. Se aliio omusilu olitiimia abo bakubirirakho tawe.

⁹Chitalang'i se chilibayo tawe, chisaang'i chindafu se chilibirirakho tawe. Abo nibo Wele Omunyali Owa Bioosi aonia balikulotelakho engo.

¹⁰Baliola Yerusalemu ne busangaafu, balimba ne khukhwekhoya. Balisangaala buli lwosi, sikila se baliba ne ngunyi ne bubeeleli tawe.