Read lubukusu Isa. 36 Bible Online

Isa. 36 - lubukusu bible

Isa. 36

¹Mu mwiiko kwa ekhumi na kine nikwo omwami Hesekia abelakho omwami owa Yuda, Senakeribu, omwami owa Ashuru ebwaakala chingoba che kamasiisi cha Yuda mala achiula.

²Nio omwami owa Ashuru aruma Rabushake khukhwama Lakishi khu mwami Hesekia mu Yerusalemu ne banamae bakali khukhwenya omwami Hesekia eaane omwene khu nibo. Omwimeelesi eema khumuyila niio banabi be chingubo banabilanga, ambi alukhwakhwa lureeranga kameechi khukhwama mu litiisi lia ngaaki.

³Bayuda bataru barura enje khumwakaanila, baba omwimeelesi we lichipi, Eliakimu okhwa Hilikia omuandiki owe koti, Shebuna, no mukhulu owemeelelanga biandike, Yoa okhwa Asafu.

⁴Rabushake ababoolela ali omwami omukali enyile khumanya nisio omwami Hesekia asuubilemo lukali.

⁵Ayingiilila ali, “Ewe wibaasia oli kamakhuwa kanyala kabukula bubweyaangu bwe burana ne kamaani ke banamae? Naanu niye weyikina nio alekelesie ba Ashuru?

⁶ Oleyikinanga Misiri sikhuyeete, ne lilieneli lilinga khurumikhira sisele nga esiimbo kane khafunikhe mala khakhuune kumukhono. Omwami owa Misiri ali ario khu omundu yesi yesi omweyikina.”

⁷Rabushake achiililila khuloma ali, “Namwe enywe mumboolela muli mulikho mweyikina Wele Omunyali Owa Bioosi, Wele wenywe? Aba abuundu wa Wele Omunyali Owa Bioosi e khusaayilao ne chialutare nicho Hesekia onaka, nga ne aboolela babaandu ba Yuda ne Yerusalemu khusaayila alutare ndala yong'ene.

⁸Ese ndafukiilisiana nanywe mu lisina lio mwami. Ese ndamuelesia enywe chifarasi chielefu chibili mwaba ne munyala mwanyoola babaandu bakali abo bachitimia.

⁹Enywe se muli kumusuumbu kumuboofu akhaba omwimeelesi Omuashuru omukeekhe tawe, ne kakhaba kario mweyikina Bamisiri khulwe banamae be kamakaari nende be chifarasi.

¹⁰Enywe mwibaasia muli nebwaakala sibala sienywe ne khusibunia nekhali ne buyeeti bwa Wele Omunyali Owa Bioosi tawe ku? Wele Omunyali Owa Bioosi omwene amboolela ese khusiibwaakala ne khusibunia.”

¹¹Nio Eliakimu, Shebuna ne Yoa baboolela omwimeelesi omukhulu oyo bali, “Lomaloma Luaramaiki. Khulumanyile. Okhalomaloma Lueburania tawe, babaandu boosi bali khwisiisi barekereesie.”

¹²Rabushake ali, “Enywe mwibaasia muli enywe no mwami mweng'ene nibo omwami wase andumirekho khumuboolela bibiindu bino bioosi? Se kario tawe, ese ndikho ndomaloma khu baandu babekhaale khu lisiisi bakhalie biibi biabwe ne khunywa kameenyi kabwe bulayi bwene busa nga enywe ne mukhakhole.”

¹³Nio Rabushake chana oyo enyokha mala aloma mu mumilo kwe angaaki mu Lueburania ali, “Rekeeresia niko omwami owa Ashuru alikho amuboolela.

¹⁴Alikho amukaambila enywe, mukhalekha Hesekia amubea tawe. Hesekia sanyala khumuonia enywe tawe.

¹⁵Ne mukhamulekha amuombelesia khukhweyikina Wele Omunyali Owa Bioosi tawe. Enywe mukhebaasia muli Wele Omunyali Owa Bioosi alamuonia enywe namwe muli alakhiingilila banamae befwe be Baashuru khuula lukoba lwenywe tawe.

¹⁶Mukharekeeresia ka Hesekia tawe! Omwami owa Ashuru alaka enywe murure enje we lukoba mala mwelekhuule. Enywe mulafukiililwa khulia chisabibu khukhwama khu misabibu kienywe ne chinduli khukhwama khu mirongooro kienywe ne khunywa kameechi khukhwama mu sebele chenywe,

¹⁷khukhwola nga omwami namuuya amuyile mu sibala sili nga sisienywe sisiene niio kimikuunda kie kimisabibu kirusia endali kili, lundi engaanu eye khung'oona kimikaati.

¹⁸Enywe mukhalekha Hesekia amusilwaasia mu khwibaasia muli Wele Omunyali Owa Bioosi alamuonia tawe, wele be chikholo chichiindi chosi chosi baoniakho bibala biabwe khukhwama khu mwami owa Ashuru ku?

¹⁹Bali waena luno, wele be Bahamali, ne Aripadi? Wele ba Sefaribaimu bali waena. Alikhoo owaoniakho Samaria ku?

²⁰Asina niio yesi yesi khu wele be bibala bino bioosi aoniakho sibala siabwe khukhwama khu mwami wefwe? Nono sina silamukholanga enywe ne mwibaasia muli Wele Omunyali Owa Bioosi anyala aonia Yerusalemu?”

²¹Babaandu basila busa chu bulayi bwene busa nga omwami Hesekia ababoolele khusila, se balomaloma likhuwa liosi liosi tawe.

²²Nio Eliakimu, Shebuna ne Yoa batabula chingubo chabwe mu bubeeleli mala bacha baboolela omwami niko Rabushake owa Ashuru aboolile.