Read lubukusu Isa. 37 Bible Online

Isa. 37 - lubukusu bible

Isa. 37

¹Ao nao nga Omwami Hesekia aulila liboola liabwe, atabula chingubo chewe mu bubeeleli, efwara kamakunia mala acha mu Lukaangu lwa Wele Omunyali Owa Bioosi.

²Aruma Eliakimu owimelelanga lichipi, Shebuna, omuandiki owe mu koti ne basaayi bakhulu khu mung'oosi Isaya okhwa Amosi. Boosi baba befwarire kamakunia.

³Obuno nibwo burume nibwo abaruma babolele Isaya bali, “Luno eli endaalo eye kumunaanio khulikho khupa sibi mala khuli musoni. Efwe khuli nga omukhasi owirekekhe khusaala mala ali omutekhele lukali sanyala khusaala tawe.

⁴Omwami owa Ashuru arumire Rabushake khukhoma Wele omenyile mindali. Lekha Wele Omunyali Owa Bioosi, Wele wowo aulile bukhomo buno mala apie sibi abo bamukhomile. Khwako saba Wele alinde babaandu befwe babaramayo.”

⁵Nga Isaya ne anyoola burume bwo mwami Hesekia,

⁶akabosiayo likhuwa lino: “Wele Omunyali Owa Bioosi akhuboolela ewe ali okhalekha Baashuru bakhuriikhirisia tawe, khulwe liboola liabwe bali ese se nyala namuonia tawe.

⁷Wele Omunyali Owa Bioosi alakhola omwami owa Ashuru aulile ka bari, ne kalamukhola akobole mu sibala siewe, mala Wele Omunyali Owa Bioosi alamukhola eererwe ebweeneyo.”

⁸Rabushake amanya ali omwami arurire Lakishi mala alikho akhupana ne lukoba lwa Libuna. Acha ebweeneyo khumureeba.

⁹Likhuwa liolela Baashuru lili banamae ba Misiri, barangiriirwe no mwami Tirihaka owa Esopia, balikho becha khubebwaakala. Nga omwami owa Ashuru ne aulila lino, arumira omwami Hesekia,

¹⁰owa Yuda ebarwa khumuboolela ali, “Wele niye ewe olikho osuubilamo akhuboolele ali ewe solakwa mu makhono kase tawe, ne ewe okhalekha omwenoyo akhubea tawe.

¹¹Ewe waulila niko omwami owa Ashuru akholanga khu sibala siosi siosi nisio akhalake khukhwonaka. Ewe wibaasia oli onyala webacha ku?

¹²Bakuuka base babunia chingoba chimboofu cha Kosani, Aruni, ne Resefu, mala bera babaandu ba Beseteni babamenyanga mu Telasari ne se aliio mulala khu wele babwe owanyala khubaonia tawe.

¹³Babaami be chingoba chimboofu cha Hamati, Aripadi, Sefaribaimu, Hena ne Iba bali wae?”

¹⁴Omwami Hesekia abukula ebarwa khukhwama khu barumwa akisoma. Mala acha engila mu Lukaangu, ara ebarwa ebweeni wa Wele Omunyali Owa Bioosi,

¹⁵mala asaba ali,

¹⁶ “Wele Omunyali Owa Bioosi, Wele owa Isiraeli, owekhala khu ndebe yowo eye bubwami, angaaki we bibuumbe bie chindaa, ewe weng'ene oli Wele, wamiianga khu bwami bwoosi bwe sibala. Ewe wabaang'ana sibala ne likulu.

¹⁷Luno Wele Omunyali Owa Bioosi, khuulile efwe mala olole khu kalekholekhanga khwifwe. Rekeeresia koosi niko Senakeribu alikho aboola ke khukhukhoma ewe, Wele omenyile mindali.

¹⁸Wele Omunyali Owa Bioosi, efwe fweesi khumanyile khuli babaami ba Ashuru babunia chikholo chingali bakhola bibala biabwe bianjukhwa,

¹⁹ne khukhwosia bawele babwe, bakhaaba bawele tawe, ne kakhali bifwaani bie kimirongooro busa ne kamabaale bibiang'oonwa no mundu.

²⁰Luno Wele Omunyali Owa Bioosi, Wele wefwe, khuonie khukhwama khu Baashuru, nio chikholo che sibala sioosi chilamanya chili ewe weng'ene oli Wele.”

²¹Nio Isaya okhwa Amosi aruma burume khu Omwami Hesekia ali, “Wele Omunyali Owa Bioosi owa Isiraeli aboola ali: Sikila wasabile khuloondekhana no mwami Senakeribu.

²²Wele Omunyali Owa Bioosi aboolile ali, ‘Lukoba lwa Yerusalemu lukhuchekheelela ewe Senakeribu, ne khukhulekelesia.

²³Ewe wibaasia oli okhomilenge ne khuchekheelela nanu? Ewe wabeele ne mbelekeu khwise, Omutakatifu Wele owa Isiraeli.

²⁴Ewe warumire bakholi bowo khukhwefumia ebweeni wase, oli khulwe kamakaari ke liie waula bikulu bileeyi bia Lebanoni. Wefumia oli ebweeneyo warema kimitarakwa kimileeyi ne sayipurasi kimilayi lukali, mala oli wola mu musiru akari.

²⁵Wefumia oli wayaba chisebele mala wanywa kameechi mu bibala bikeni, ne lundi oli banamae bowo baswalakilila luluuchi lwa Naili lwateenya.’

²⁶“Ewe sewaulilakho oli ese narekekha lino lioosi khaale tawe? Ne luno nalikholile. Ese nakhuelesia ewe bunyali bwe khukaluukhasia chingoba chisire chibe kamaumbu.

²⁷Babaandu babamenyamo se baba ne kamaani tawe, baria ne khurangararwa. Baaba nga bunyaasi mu mukuunda namwe enyoonyi echoanga khunju, niyo luucho lubile lwe bukwe lwosiisie.

²⁸“Ne kakhali manyile buli siindu khwiwe, nisio okhola nende niio ocha. Namanya nga ewe ne wambiila.

²⁹Naboolelwa libiila lienelio ne lililola liowo elio, ne ese luno ndakhukakia kumulobo mu lioolu ne ndekwe mukhanwa mwowo mala ndakhubukula khukoboselie khu muyila nikwo wechelakho.”

³⁰Nio Isaya aboolela omwami Hesekia ali, “Esino sili simanyisio sie kakhekholekhe. Kumwiiko kuno ne kukwiicha mulangalisia busa biakhulia bie mundaa biong'ene ne mulia, ne kakhali kumwiiko kuloondakho mukhanyale khumiicha biakhulia bienywe mala mukese, lundi mubiaale kimisabibu mala mulie chisabibu.

³¹Abo bali mu Yuda, babarama balimenya bulayi babe nga simelwa sisiekhisia kimili mwiloba mala siamanga kamatuunda.

³²Babaandu baliba mu Yerusalemu ne khu sikulu sia Sayuni balirama, sikila Wele Omunyali Owa Bioosi akhalake khukhola kano kakholekhe.

³³“Kano niko Wele Omunyali Owa Bioosi aboolile khu mwami owa Ashuru: ‘Salingila mu lukoba luno, namwe asilase akhaba luembo lulala lwong'ene tawe. Se baliio banamae be chingabo baliicha embi ne lukoba luboofu luno tawe, ne babaandu se balilima lukhwakhwa balubotookhelesie tawe.

³⁴Alikobolela khungila niyo echelakho, salingila mu lukoba luboofu luno tawe. Ese, Wele Omunyali Owa Bioosi nalomile.

³⁵Ndibabila lukoba luno ne khululiinda, khulwe samwene, sikila lisuubisia nilio nakhola ne Daudi omukholi wase.’ ”

³⁶Malaika owa Wele Omunyali Owa Bioosi acha mu kambi eya Baashuru mala eera banamae chielefu emia ndala samaniini na tano oli mabwibwi, endaalo eloondakho baba balambalile bafwiile!

³⁷Nio, Senakeribu omwami owa Ashuru arekukha, akobola e Ninefe.

³⁸Endaalo ndala nga aba ne alikho asaaya mu Lukaangu lwa Nisiroki wele wewe, basoleeli bewe babili, Atameleki ne Sharesa bamwiira ne chimbalu chabwe mala belukhila mu sibala sia Ararati. Omusoleeli mulala khu basoleeli bewe bali Esarihatoni amiia nga omwami owa Ashuru.