Read lubukusu Isa. 4 Bible Online

Isa. 4 - lubukusu bible

Isa. 4

¹Siise sikhoole bakhasi saba balikhayila khu museecha mulala mala bamuboolele bali, “Efwe khuleliisia ne khukhwifwara fwabeene, nosiima lekha busa khulangilwe khu lisina liowo, nio okhurusiekho chisoni.”

²Mu ndaalo echo lusakia lwa Wele Omunyali Owa Bioosi lukhabe lulayi lundi lwe luyali. Ne simelwa sie mukuunda siikhasangaasie ne khurera luyali khu ba Isiraeli babarama.

³Buli mundu olilekhwa mu Sayuni, olirama Yerusalemu alilaangwa omutakatifu ne buli mundu niye lisina liewe liaandikwa khulwe bulamu mu Yerusalemu.

⁴Nga Omwami akhasiinge bumayaanu bwe bakhaana ba Sayuni, akhasiinge sifuki khukhwama mu Yerusalemu. Ang'oone lukoba ne Roho we bukhalaki ne kumulilo.

⁵ Wele Omunyali Owa Bioosi alafuunikha sikulu sia Sayuni nende abo boosi babebuusiisie ebweeneyo ne lifuumbi mu siise sie kumuusi ne liliisi ne lumemu lwe chinjaso mu silo. Luyali lwoosi lwa Wele Omunyali Owa Bioosi, lulifunikha ne khukhiingilila buli siindu.

⁶Lukhabe lulama lwe khulolelamo kumuumu kumuusi. Lundi lukhabe abuundu we khukhwilukhilao ne nju eye khukhwiyikama efula ne khuungu.