Read lubukusu Isa. 40 Bible Online

Isa. 40 - lubukusu bible

Isa. 40

¹Wele wefwe aloma ali, “Olelesia babaandu base baolelelesie!

²Andalasia babaandu ba Yerusalemu. Baboolele oli ‘bachuunisibwe khu siise sileeyi, ne luno bumayaanu bwabwe bwabelelwe. Ese nabaukuumile mu bwichufu khulwe bumayaanu bwabwe bwoosi.’ ”

³ Kumumilo kulangilila kuli, “Rekekhera Wele Omunyali Owa Bioosi engila mu sichiimi! Berera Wele wefwe engila mu siangalaamwe.

⁴Yichusia buli litooma, sikulu ne chingulu bilayaasibwa, ne sibala siialafu silimiliisibwa.

⁵Ne luyali lwa Wele Omunyali Owa Bioosi lulibonekha, ne babaandu boosi bakhalubone Wele Omunyali Owa Bioosi omwene asuubisia.”

⁶ Kumumilo kwo omwami kwaboola kuli “Langilila,” ne ese nakobosia ndi ndangilila siina. Babaandu boosi bali busa nga bunyaasi, lundi bulayi bwabwe buli busa nga bimuli bie mundaa.

⁷Bunyaasi buniala, ne bimuli bikhukhumukha, nga kumuuya kwa Wele Omunyali Owa Bioosi ne kubibirakho, ng'ali babaandu bali bunyaasi.

⁸Bunyaasi buniala, bimuli bikhukhumukha, ne likhuwa lia Wele wefwe lili lia mindali na mindali.

⁹Yerusalemu cha khu sikulu angaaki, mala olangilile elomo endayi, langilila ne kumumilo kumuboofu, langilila chilomo chindayi. Lomaloma okharia tawe. Boolela chingoba cha Yuda oli Wele wenywe alikho echa!

¹⁰ Omwami WELE alikho echa khukhwamiia ne bunyali, alikho areera babaandu nibo aonia.

¹¹ Aliayia lituuli liewe nga omwaayi, alibuusia kamameeme alala mala akameeme mu makhono mwewe, mu khweoya alirangirira kanuunia.

¹²Aliio omundu onyala akela enyanja mu fuusi, namwe akela likulu ne kamakhono kewe ku? Aliio omundu onyala asuta liloba lie khu sibala mu sikoombe, namwe onyala akela bikulu ne chingulu mu sikelo siewe ku?

¹³ Aliio omundu onyala aboolela Wele Omunyali Owa Bioosi nisio akhola ku? Naanu onyala amwekisia namwe amukaambila?

¹⁴Wele areeba naanu limanya ne bukesi, ne naanu owamweyikia engila eye buluungi, ne naanu owamweyikia bukesi, khu mwekesia engila eye liiulila.

¹⁵Khu Wele Omunyali Owa Bioosi chikholo se chili siindu tawe, se chikhila lime lie kameechi tawe, bibala bie aleeyi bibiakarwa ne kameechi bili busa bibiaangu nga lutamuusi.

¹⁶Chisaang'i choosi chili mu musiru kwa Lebanoni se cholaana khuaana embosio khu Wele wefwe tawe, ne kimirongooro kiakwo kili mikeekhe lukali khubwana kumulilo.

¹⁷Chikholo choosi se chili siindu khu niye tawe. Lundi se chibalikhakho nga siindu tawe.

¹⁸ Wele anyala alekhaasibwa khu naanu? Onyala wamwinoosia oli ali nga sina?

¹⁹Se ali nga sifwaani nisio babaandu bakhola tawe, nisio babasi babakhangakho esahabu mala basimikha khu musiingi kwe fwesa tawe.

²⁰Omundu okhanyala bukusi bwe fwesa namwe esahabu tawe, aroboranga kumurongooro kukhabola tawe. Ayimanga omubeechi oomanyile lukali khubeecha sifwaani siikhatengaala tawe.

²¹Enywe se mumanyile tawe? Enywe se mwaboolelwa khaale tawe ku? Se mwaulila nga sibala ne siarakikha tawe ku?

²²Liang'oonwa ne naye owikhalanga khu ndebe yewe eye bubwami angaaki we liloba, ne babaandu asi babonekha busa nga kamatete. Abalaaya likulu liewe busa bulayi bwene busa nga liiema lie khumenyamo.

²³Ekhisianga babaami be kamaani, mala ababoombia baba sisiindu busa.

²⁴Bali nga bimelwa bitoro bimela bulayi bwene nga bisiili khuromba. Nga Wele Omunyali Owa Bioosi naruma ekhuungu, bioma busa khangu, mala biuchibwa nga chikhanja.

²⁵Wele omutakatifu anyala walekhaasibwa khu naanu? Aliio omundu yesi yesi nga niye ku?

²⁶Lola mungaaki owabaang'ana ching'enieesi nicho olikho obona chino nanu? Oyo ochirusianga enje nga banamae amanyile chili chinga. Mala alanganga buli ndala lisina! Bunyali bwewe buli bukali, lukali seliio ndala khu nicho ekhaliio tawe!

²⁷Siina nono Isiraeli ne welung'unya, oli Wele Omunyali Owa Bioosi se wamanyile butinyu bwowo tawe, namwe se akhuliinda noumiia mu kakhali ka ng'ali?

²⁸Ewe somanyile namwe se waulilakho tawe? Wele Omunyali Owa Bioosi ali Wele owa mindali? Abaang'ana sibala sioosi. Saluanga, namwe saluilila tawe, se aliio mundu omanyanga kamebaasio kewe tawe.

²⁹Aechanga abo bali batekhele kamaani, nabo bakhali ne kamaani tawe abatinyilisianga.

³⁰Akhaba abo bali baele balalua lundi baluilile, ne baele be siseecha balaochama.

³¹Ne kahali abo babasuubila mu Wele Omunyali Owa Bioosi khulwe buyeeti, balinyoola kamaani kamaya ne balinina ne chindaa nga chifuruusi, bakhatima se balilua tawe balikeenda ne se balua tawe.