Read lubukusu Isa. 41 Bible Online

Isa. 41 - lubukusu bible

Isa. 41

¹Wele aloma ali, “Enywe bibala bie aleeyi, sila busa mala mundekeresie, Yirekekha khuboola kakenywe mu siina, mulaba ne bubweyaangu bwenywe bwe khulomaloma. Khakhwiche alala khukhalake nanu oli ng'ali.

²Naanu owareera omuuli khukhwama ebukwe, mala wamukhola omukhili buli abuundu niio acha? Naanu omuechanga bukhili khu baami ne khu kholo? Abeera baba nga lipukhuulu. Buembo bwewe bubasalanisia nga likhuuchi ebweeni we khuungu.

³Abaloondangakho nabatimania mala akeenda mu bulekhuule, atima lukali oli okhetiila asi tawe.

⁴Naanu owakhola kano kakholekha? Naanu owebaasia mala wabisia kakabira? Ese, Wele Omunyali Owa Bioosi nabao mu khurakikha, lundi ndibao ematabusia.

⁵“Babaandu be bibala bie aleeyi baboone niko ese kholile, bariire ne khurenga. Nio boosi bebuusia alala ne khukhwicha.

⁶Buli mulala atinyilisia owasie ne aloma ali, ‘Yaya, luma kumwoyo.’

⁷Omubeechi aboolela omubasi ali, ‘Wakholile bulayi!’ Omundu oupilila sifwaani, atinyilisia oyo osiikhomamo kimisimari. Baloma bali, wosielele bulayi, bakhoma sifwaani ne kimisumari.

⁸ “Ne kakhali ewe Isiraeli mukholi wase, Enywe muli babaandu base nibo ese narobora, be sikuka sia Aburahamu omusaale wase.

⁹Ese nakhureera khukhwama khu ndulo khwe sibala, Ese nakhulaanga khukhwama aleeyi, mala nakhuboolela ndi, ‘Ewe oli omukholi wase.’ Se nakhuloba tawe, ne kakhali nakhurobora.

¹⁰Okharia tawe, ese ndi ne nawe! Ese ndi Wele wowo siosi siosi siikhakhuriikhirisia tawe! Ese ndakhukhola obe owe kamaani mala khuyeete. Ese ndakhuliinda ne khukhuonia.

¹¹“Abo babakhuambila lirima, balaambwa chisoni che khukhilwa. Abo balomana ne nawe balafwa.

¹²Ne se balaba khu sibala tawe.

¹³Khubeela ndi Wele Omunyali Owa Bioosi, Wele wowo, nakhutiila kumukhono kumuseecha, ese khutinyilisia ewe ne khukhuboolela ndi, ‘Okharia tawe, ese ndakhuyeeta.’ ”

¹⁴Wele Omunyali Owa Bioosi aboola ali, “Oli mutiiti lundi omutekhele ewe Isiraeli, okharia tawe, ese ndakhuyeeta. Ese Wele Omutakatifu owa Isiraeli ese niye okhuonianga.

¹⁵Ese ndakhukhola ewe obe nga kumwiini kuula, kulikho bikundula biya bibioki bie bibia, oliiula bikulu mala obionake, chingulu chilabulungukha chibe lipukhuulu.

¹⁶Olichitamuusia mu mbeo luucho lulicha nacho, lundi chilisalanisibwa ne mbembeesi. Nono ewe olisangaala sikila ese ndi Wele wowo, olifumia ese Wele Omutakatifu owa Isiraeli.

¹⁷“Nga babaandu base bakhenyalila tawe balienya kameechi mala bakhilwe khukanyoola, mala emumilo wabwe yoome khulwe bulesia, ese Wele Omunyali Owa Bioosi ndikobosia lisaba liabwe, Ese Wele owa Isiraeli se ndibanjukha tawe.

¹⁸Ndakhola chinjichi chakukhe mu ngulu bitalalie, ne chisebele chibe mu matooma. Ese ndakaluukhasia sisiangalaamwe sikele kamatiisi ke kameechi, ne sibala sisioomu siekele chisebele.

¹⁹Ndakhola kimitarakwa kimele mu siangalaamwe, ne kimikunga, bimuli ne kimiseituni. Kimisiru kilakhula mu sibala sie sitalalie, kimisiru kia banasi, kimifunje ne Saipurasi.

²⁰Nio babaandu balibona kano, mala balimanya bali ese Wele Omunyali Owa Bioosi okholile. Baliicha bamanye bali Wele Omutakatifu, owa Isiraeli niye okholile kano kekholekha.”

²¹Wele Omunyali Owa Bioosi, oli Omwami owa Isiraeli aboola ali, “Enywe bawele be chikholo boola niko muli nako, reera liyingana nilio muli nalio!

²²Khemwiche ano mala mung'oole kakhekholekhe, nio oli kakholekha khumanye. Khuboolele ke chindaalo chichabira, mala mukhuboolele sifuno siako.

²³Khemukhuboolele kacha khubao, nio khumanye khuli enywe muli bawele! Khemukhole sisiindu silayi namwe reera busiku, khemukhukhole khuambwe buuri ne khuterema.

²⁴Enywe nende niko mukhola koosi se sili siindu tawe, abo bamusaayanga enywe balaba basinya!

²⁵“Ese naroboore omundu owamenya ebukwe, khamureere ebwaakale khukhwama ebunaswa, aswalakilile babaami nga kamatosi, nga omubuumbi naniasia liloba.

²⁶Naanu khwinywe owang'oola ali kano kalikholekha, nio khuboole khuli waboola kang'ali? Se aliio na mulala khwinywe owaboola likhuwa lirio tawe, se aliio omundu owaulila ewe noboola siindu sirio tawe!

²⁷Ese Wele Omunyali Owa Bioosi naba owe khunyoa khuboolela Sayuni chilomo chino. Ese naruma omurumwa e Yerusalemu khuboola ali, ‘Babaandu bowo balikho becha engo ne lomo endayi.’

²⁸Nga ne naloleelesia mu bawele, se abao owaba nende sie khuboola tawe, se abao namulala owanyala khukobosia kamareeba niko ese nareeba tawe.

²⁹Bawele bano boosi se bali ne bukhala tawe, se banyala bakhola sisiindu siosi siosi tawe, bifwaani bino bili bitekhele lundi se bili ne bunyali tawe.”