Read lubukusu Isa. 42 Bible Online

Isa. 42 - lubukusu bible

Isa. 42

¹ Wele Omunyali Owa Bioosi aboola ali, “Oyuno ali omukholi wase niye ese naramo kamaani, niye ese narobora lundi niye sangaalilanga. Ese namwichusia roho wase, mala akhareere bung'ali khu buli ekholo.

²Saliyokela namwe alomalome lukali tawe, namwe kumumilo kwewe kuuliilikhane khu ngila che lukoba tawe.

³Salifunaka liteeka liliefumba, namwe asimie etaa emwemwenda tawe. Alireera bung'ali bwa mindali khu baandu boosi.

⁴Salifwa kumwoyo namwe eendekhelele tawe, alireera bung'ali khu sibala. Bibala bie aleeyi bialindiilila, ne silukuluku kamekisio kewe.”

⁵ Wele abaang'ana likulu mala alibalaya, ang'oona sibala nende buli siindu silimo, aana bulamu ne kumuya khu baandu boosi. Ne luno Wele Omunyali Owa Bioosi aboola khu mukholi wewe ali,

⁶ “Ese Wele Omunyali Owa Bioosi nakhulaanga ewe mu buluungi mala nakhuelesia ewe bunyali khubona oli bung'ali bukholwa khu sibala. Khubirira mwiwe ese khakhole endakaano ne babaandu boosi. Khubirira mwiwe ese khareere buwaanga khu kholo choosi.

⁷Ewe okhekule chimoni che babofu, mala olekhuule abo baali mu siboe sie sisiilima.

⁸“Ese seng'ene ndi Wele Omunyali Owa Bioosi, Wele wowo. Se aliio wele okundi onyala akabana ne nase luyali tawe, se ndilekha bifwaani bikabane efuma yase tawe.

⁹Bibiindu nibio nang'oola luno biabeele ng'ali. Luno ndamuboolela enywe ke bibiindu bikhamanyikhaane, ne bikhekholekha tawe.”

¹⁰Yimbila Wele Omunyali Owa Bioosi kumwenya kumuya, yimba efuma yewe sibala sioosi! Khemumufumie niye enywe mweesi mu keendela mu meeli, khemumufumie niye bibuumbe bioosi bie mu nyanja. Yimba enywe muli mu bibala bie aleeyi ne nabo boosi bamenyileyo!

¹¹Lekha sisiangalaamwe ne chingoba chasio chifumie Wele, lekha babaandu be birekere bia Kedari bamufumie! Lekha abo bamenyile mu lukoba luboofu lwa Sela bembe khulwe liliekhoya, ne bali khu ndeleelwa che bikulu!

¹²Lekha baane luyali khu Wele Omunyali Owa Bioosi, mala bafumisilie omwami mu bibala bie aleeyi.

¹³Omwami aruranga akhupana nga naitiriani, erekekhe lundi ali ne silukuluku sie liie, apa lulwang'a lwe liie ne khukhweyasa, ekesia kamaani khu basiku bewe.

¹⁴Wele aboola ali, “Khulwe siise sileeyi ese nasila busa, se nakobosia babaandu base tawe, ne siise sie khumuyeeta siolile, ndalila nga omukhasi olumwa.

¹⁵Ndonaka chingulu ne bikulu, ne khukhwomia bunyaasi ne kimirongooro. Ndakaluukhasia kamatooma ke kameechi kekele bibiangalaamwe, ne khutenyisia kamatiisi ke kameechi.

¹⁶“Ndarangirira babaandu base babofu, khu ngila nicho bakhabirirakho tawe. Ndakaluukhasia sisiilima siabwe sikele buwaanga, mala khole sibala siialafu similiye ebweeni wabwe. Kano kali kamasuubisia kase, mala ndakakhola se ndalekha tawe.

¹⁷Boosi basuubila mu bifwaani, balaanga bifwaani bali wele babwe, balichangalaala ne khuambwa chisoni.”

¹⁸“Wele Omunyali Owa Bioosi aboola ali, Enywe bamiinyi rekeeresia! Enywe muli babofu, loleelela!

¹⁹Aliio omundu yesi yesi oli omubofu lukali khukhila omukholi wase, namwe omumiinyi lukali khukhila omurumwa niye ese naruma ku?

²⁰Isiraeli enywe mwabona kamakali, ne kaba siina khwinywe? Enywe muli ne kamaru ke khuulila ne siina nisio enywe ng'ali mwaulila?”

²¹Wele Omunyali Owa Bioosi ali Wele owe silukuluku sie khuonia, nio afumia kamalaka kewe ne kamekisio, mala enya babaandu bewe bakae lukoosi.

²²Ne kakhali babaandu bewe bayaayilwe, bakhomekhelwe mu biboe bie sisiilima, mala babakisile mu siboe. Banuulwa ne khuyaaywa, ne se baba no mundu obaabina abaonia tawe.

²³Alikhoo khwinywe olarekeeresia kano ku? Khukhwama luno khuchiililila enywe mularekeeresia kano ku?

²⁴Naanu owaana Isiraeli baandu bayaaya? Ali Wele Omunyali Owa Bioosi omwene niye Isiraeli akholela bumayaanu. Se khwamenya nga niye ne enya efwe khumenye tawe, namwe se khwaria kamalaka niko niye akhuelesia efwe tawe.

²⁵Nio akhukhola efwe khwaulila kamaani ke lirima liewe, ne khunyaasibwa ne burafu bwe liie. Nga kumulilo, lirima liewe liosia mu Isiraeli mwoosi, ne efwe se khwamanya sisiaba ne silikho siikholekha tawe, efwe se khweyikakho siindu siosi siosi tawe.