Read lubukusu Isa. 43 Bible Online

Isa. 43 - lubukusu bible

Isa. 43

¹Isiraeli, Wele Omunyali Owa Bioosi owamubuumba enywe aboola ali, “Mukharia tawe, ese ndamuonia. Ese khamulange lisina enywe muli babase.

²Akhaba ne mubira mu lusiba lwe kameechi ese ndaba ne nanywe, butinyu bwenywe se bulamuminya tawe, mwakhamwaatwa mu mulilo se mulaya tawe, kamakhako kamaandalafu kakeecha se kalamunyala tawe.

³Sikila ese ndi Wele Omunyali Owa Bioosi, Wele wenywe, Wele Omutakatifu owa Isiraeli omuonianga enywe. Ese ndakhola Misiri amulekhuule enywe, akhaba Esopia ne Seba.

⁴Ndalekha chikholo chichiindi khumuonia enywe, sikila enywe muli be bukhala khwise, ne sikila ese namusiima enywe lundi muechanga lukoosi.

⁵Mukharia tawe, ese ndi ne nanywe, ndarera babaandu benywe engo, khukhwama ebukwe ne mumbo aleeyi lukali.

⁶Ndaboolela be bunaswa khubalekhuula bache, nende be siafubo bakhabakhayilakho tawe. Lekha babaandu base bakobole, khukhwama mu bibala bie aleeyi, khukhwama buli lubeka lwe sibala.

⁷Bali babaandu base samwene nibo nabuumba bambelesie ese luyali.”

⁸Wele aboola ali, “Laanga babaandu base beche mu siina. Bali ne chimoni ne se babona tawe, bali ne kamaru ne se baulila tawe.

⁹Lekha chikholo chiche alala, ne lekha chikholo chibuusiane, Naanu onyala ang'oola ke chindaalo chichiicha, ne khukhwekesia kakabira? Lekha barere buloli bwabwe khukhwekesia bung'ali, ne lekha baulile mala baboole bali kali kang'ali.

¹⁰Enywe baandu ba Isiraeli muli baloli base, ese namurobora enywe mube bakholi base, nio enywe mumanye ne khukhusuubila ne khumanya muli niise oliio. Se aliio Wele okundi owabao namwe olicha khubao tawe.

¹¹“Ese seng'ene niye Wele Omunyali Owa Bioosi, seng'ene onyala namuonia enywe.

¹²Ese nang'oola kacha khukhwekholekha, mala necha namuyeeta. Se aliio wele okundi owakholakho kano tawe, enywe muli baloli base.

¹³Ese ndi Wele lundi ndiba busa ndio buli lwosi. Se aliio omundu na mulala onyala aonia khukhwama mu bunyali bwase tawe, se aliio onyala akaluukhasia niko ese khola tawe.”

¹⁴Wele Omutakatifu owa Isiraeli Wele Omunyali Owa Bioosi omuonianga enywe aboola ali, “Khumuonia enywe ese kharume banamae bapane ne Babiloni, khafuniakake bilibwa bie lukoba luboofu, ne khukhwekhoya khwe babaandu balwo khulakaluukhana khwikele bililo.

¹⁵Ese ndi Wele Omunyali Owa Bioosi, Wele wowo omutakatifu, Isiraeli ese namubumba enywe mala ndi Omwami wenywe.”

¹⁶Khaale Wele Omunyali Owa Bioosi ang'oona engila yabira mu nyanja, engila yabira mu meechi kamakali.

¹⁷Arangirira banamae be kamaani lukali bacha mu libuna, banamae be kamakaari ke liie ne chifarasi. Bakwa ne se balinyokha tawe, barusibwao nga limuusi khu lutaambi luburukha.

¹⁸Ne Wele Omunyali Owa Bioosi aboola ali, “Okhakhebulila kamakhale ako, namwe wamenya mu khukebaasia tawe.

¹⁹Lola nja khukhola sisiindu siiya, ne siekholekhe khale, munyala mwasibona? Ese ndang'oona engila mu sichiimi, mala ebweeneyo muelesie enywe chinjichi.

²⁰Chakhaba chisolo ne chisaang'i che mundaa chilamba lukoosi, chingipwe ne chinyefwe chilafumia nga ndakhola chinjichi chibe mu siangalaamwe, khuana kameechi khu baandu base barobore.

²¹Bali babaandu nibo samwene nebumbila, balimba ese efuma.”

²²Wele Omunyali Owa Bioosi aboola ali, “Ne enywe Isiraeli mwalua ne nase, enywe se mwasaaya ese tawe.

²³Enywe se mwandeerera ese biturwa bie kamakheese ke mbosio ke khukhwosia tawe, namwe enywe se mwangoosia ese ne liiosio lienywe tawe. Ese senamutiuukha busiro khulwe khumubanja biturwa tawe, namwe ese senamuluya enywe khulwe khukhureeba bimuli biiunya kumuya kumulayi tawe.

²⁴Enywe se mwangulila ese biiunya kumuya kumulayi, namwe se mwanjikusia kumwoyo ne kiminawa kie bibiaayo bienywe tawe. Nekhali enywe mwandiukha ese busiro bwe bumayaanu bwenywe, mwanduyilisia ne kamabi niko mwakhola.

²⁵Ne khali ese ndi Wele obeelanga bumayaanu bwenywe mala ese khola kano sikila ndi Wele, namubeleele bumayaanu bwenywe.

²⁶Khekhuche mu siina, boola liliikiicha lienywe. Boola kakenywe kakekesia kali enywe muli mu bung'ali.

²⁷Bakuukawenywe bataayi bakhola bumayaanu, barangirisi benywe bakholela ese bumayaanu

²⁸ne babaami benywe banyaalutia enju yase endakatifu. Nio ese nareera libuna khu Isiraeli, nalekha babaandu base samwene baambwe chisoni.”