Read lubukusu Isa. 44 Bible Online

Isa. 44 - lubukusu bible

Isa. 44

¹Wele Omunyali Owa Bioosi aboola ali, “Isiraeli omukholi wase luno rekeeresia, babaandu base barobore be lisaaye lia Yakobo.

²Ese ndi Wele Omunyali Owa Bioosi owababuumba enywe khukhwama khu siise nisio mwasalilwakho, ese namuyeetanga mukharia tawe, enywe muli bakholi base, babaandu base barobore, nibo ese nasiima.

³“Ese khaane kameechi khu sibala sie bulesia, mala khole chinjichi chibisie khu sibala sisioomu para. Ese ndaana Roho wase khu baana bowo, ne chikhabi chase khu lisaaye liowo.

⁴Balanera busa nga bunyaasi buchukhiililwanga kameechi, nga kimierebi kie khuluuchi.

⁵“Buli mulala babaandu baliboola bali, ‘Ese ndi owa Wele Omunyali Owa Bioosi.’ Balecha bambaane ne babaandu ba Isiraeli. Buli mulala alaandika lisina lia Wele Omunyali Owa Bioosi khu mukhono kwewe, mala elaanga omwene ali, ali mulala khu baandu ba Wele.”

⁶ Wele Omunyali Owa Bioosi owamiia ne khuliinda Isiraeli, Wele Omunyali Owa Bioosi aboola kano: “Ese ndi Wele seng'ene owe khunyoa lundi omumaliilisi, se aliio Wele okundi tawe ne khali ese seng'ene.

⁷Aliio omundu yesi yesi abeele onyala akhola niko ese nakhola kano ku? Naanu abeele onyala ang'oola koosi kakeecha khwekholekha, khukhwama e khurakikha khukhwola khu siakamo sie siise?

⁸Mukharia namwe mukhesiindukha baandu base tawe, mumanyile muli khukhwama khu biise bie khaale khukhwola luno, ese nang'oola koosi kakhekholekhe ne enywe muli baloli base. Alikhoo wele okundi yesi yesi? Aliio wele owe bunyali niye ese khaulilakho ku?”

⁹Abo boosi bang'oonanga bifwaani bali busa bukhalamo tawe, ne bawele nibo bakusia bukusi bwe angaaki se bali ne buyeeti tawe. Abo basaayanga bawele bano bali babofu ne se bamanyile siindu tawe, mala baliambwa chisoni.

¹⁰Se buli bulayi khung'oona sifwaani sie sibia ne khusisaaya nga wele tawe.

¹¹Buli mundu osisaayanga aliambwa chisoni. Babaandu bang'oonanga bifwaani bali babaandu busa, se balikho ne sisiindu sisiindi tawe. Khebeche babaoche mu siina, balaba bari lukali mala baambwe chisoni.

¹²Omubasi abukulanga sitonyi sie sichuuma mala asiiuchila mu mulilo ne kumukuba, asiiranya ne kumukhono kwewe kwe kamaani kusuta enyundo khubasa bichuuma nga ne enya. Nga nabasa aulila enjala, bulesia ne siiluo.

¹³Omubeechi akela kumurongooro, akela sifwaani ne lilianda mala abeecha ne mbechelo yewe mala asikhola sifwaani sio mundu, sifwaani sio mundu sie lukoondo lulayi, sie khura munju yewe.

¹⁴Arema kimitarakwa, kimikhoonge namwe sayipurasi khukhwama mu musiru. Abiaala kumukhoonge ne khuliinda efula ekhusie.

¹⁵Omundu arumikhirakho kumurongooro lubeka nga chiikhu ne lubeka khulwe khung'oonamo sifwaani. Ne sisiinja sisiindi abwana kumulilo ora mala apa kimikaati, ne lubeka luluundi ang'oonamo wele mala amusaaya.

¹⁶Abwana kumulilo ne chiikhu osia chinyama alia mala ekura, ora kumulilo mala aboola ali, kuli kumulilo kumulayi lundi kwe luluuya.

¹⁷Ne lukhu luramire abechakho sifwaani, mala asisikamila ne khusisaaya. Asisabanga naboola ali, “Ewe oli wele wase mbonie!”

¹⁸Babaandu nga abo bario bali basilu lukali khumanya nisio bakhola tawe. Bafunyikhililanga chimoni ne kamebaasio kabwe khu bung'ali.

¹⁹Omukholi we bifwaani se ali ne limanya namwe bukesi bwe khuboola ali, “Chiikhu chindala nosiisie, nakhupila kimikaati khu manda, nosielakho enyama nalia. Ne lukhu lulwarama nabechakho sifwaani. Ese niyooyu ano ninamila sitonyi sie lukhu.”

²⁰Akhomba likokhe, chinganakani chisilu chimutiimia, se anyala eonia namwe aloma ali nisio ndilile kumukhono kumuseecha kuno se buli bubeeyi tawe ku?

²¹Wele Omunyali Owa Bioosi aboola ali, “Isiraeli khebulila lino, khebulila muli enywe muli bakholi base, Ese namubumba enywe mube bakholi base, mala se ndimwibilila tawe.

²²Ese narusiisieo bumayaanu bwenywe nga lileesi khemungobolele, ese niise omuonianga enywe.”

²³Likulu yimba, sikila Wele Omunyali Owa Bioosi akholile kano, Muli asi we sibala lukali yimba. Ee bikulu, rakikha khukhwimba, Ee musiru na buli murongooro kuulimo! Sikila Wele Omunyali Owa Bioosi aonisie Yakobo, ne alaelesibwa luyali mu Isiraeli.

²⁴Wele Omunyali Owa Bioosi omuonia wenywe owamubuumba khukhwama munda mwa mawenywe aloma ali, Ese niise Wele Omunyali Owa Bioosi owabuumba bibiindu bioosi, Ese seng'ene owakololosia likulu, nga ese ne nabuumba sibala naanu owaba nase?

²⁵ Ese silwasia bafumu, nonakaka bung'oosi bwe bamenieelesi ching'enieesi. Ese ndoba kamakhuwa ke bakesi, mala nekesia bukesi bwabwe khuba busilu.

²⁶Ne kakhali nga omukholi wase nang'oola, nga ese nenduma omurumwa wase khufunula kamarekekha kase, khola kamarekekha ako ne bung'oosi obwo khuba bwa ng'ali. Ese mboolela Yerusalemu ndi babaandu bakhamenyemo lundi, ne chingoba cha Yuda ndi chikhombakhwe lundi. Chingoba echo chikheeme khukhwama mu maumbu.

²⁷Ne likhuwa lie lilaka liase, ndenyisia enyanja emboofu.

²⁸ Ese mboolela Sairasi ndi, “Ewe niwe oliamiia nga abele ese ne namiia, okhakhole niko nenya okhole, okharusie lilaka mala Yerusalemu lwombakhwe lundi, kumusiingi kwe Lukaangu kwombakhwe.”