Read lubukusu Isa. 45 Bible Online

Isa. 45 - lubukusu bible

Isa. 45

¹Wele Omunyali Owa Bioosi aroboore Sairasi khuba omwami! Amuroboore khuula chikholo, amuruma khunuula babaami bunyali bwabwe, Wele Omunyali Owa Bioosi akhamwikulile bilibwa bie chingoba chimboofu, Wele Omunyali Owa Bioosi aboolela Sairasi ali,

²“Ese samwene ndakhurekekhera engila khuyasilie bikulu ne chingulu, ndafunaka bilibwa bie kumukasa, mala ndusieo chinjeko che bichuuma.

³Ese ndakhuelesia ewe kamabiikhilo kakekisa mu siilima ne kaali abuundu aekisa, nio ewe olamanya oli ese niise Wele Omunyali Owa Bioosi, mala Wele owa Isiraeli akhulangile lisina.

⁴Nakhurobora ewe oyeete omukholi wase Isiraeli babaandu nibo ese narobora. Ese nakhuelesia ewe lukoosi lukali, akhaba ewe nokhamanyile ese tawe.

⁵“Ese ndi Wele Omunyali Owa Bioosi se aliio wele okundi tawe, ese khakhuelesie kamaani niko wenya, akhaba ewe ne okhaamanyile ese tawe.

⁶Ese ndikho khola kano nio buli mundu khukhwama ebukwe we sibala khukhwola mumbo amanye ali, ese niise Wele Omunyali Owa Bioosi, ne se aliio wele okundi tawe.

⁷Ese mbaang'ana bioombi buwaanga ne sisiilima, nderanga bioombi chikhabi ne busiku. Ese, Wele Omunyali Owa Bioosi okholanga bibiindu bino bioosi.

⁸Ese kharume bukhili khukhwama mungaaki nga efula, sibala sikhabwakanile, mala sikhamulikhe bulekhuule ne bung'ali, Ese Wele Omunyali Owa Bioosi ndakhola lino likholekhe.”

⁹ Enyuungu eye liloba enyala yanyindaalila khuyingana no mubuumbi wayo ku, enyuungu eli busa nga chichiindi choosi? Liloba linyala liareeba omubumbi lili olikho okhola sina? Enyuungu enyala yelung'unya eli omubumbi wayo se ali ne bukesi tawe?

¹⁰Aliio omundu yesi yesi onyala anyindaala areeba basaasi bewe ali, “Sikila siina ne mwasaala muri?”

¹¹Wele Omunyali Owa Bioosi, Wele Omutakatifu owa Isiraeli, oyo ong'oonanga ke chindaalo chichiicha aboola ali, “Ewe soli ne bung'ali khukhundeeba ese ke babaana base tawe, namwe khukhumboolela niko ese khoyela khukhola!

¹²Ese niise owabaang'ana sibala mala nabuumba babaandu bamenyemo. Khulwe bunyali bwase nabalaya likulu, nimeelelanga enyanga, kumwesi ne ching'enieesi.

¹³Wele Omunyali Owa Bioosi aboola ali, Ese samwene owamuruma Sairasi khukhola sikholwa, khukhola sifuno siase sibe sia ng'ali ne khukololosia bibiindu. Ndaluungisia buli ngila niyo abirirakho. Aliombakha lundi lukoba lwase lwa Yerusalemu, mala alekhuule babaandu be mu mbaambe, se aliio omundu owamukula namwe owamuonga khukhola kano tawe.”

¹⁴Wele Omunyali Owa Bioosi aboolela Isiraeli ali, “Kimiaandu kia Misiri ne Esopia kikienywe, ne babaandu baleeyi be Seba balaba nasioobi benywe, balamuloondakho ne baboyilwe khu minyololo, Balamusikamila enywe mala beyame baboole bali, ‘Wele ali ne nanywe, niye yeng'ene oli Wele.

¹⁵Wele owa Isiraeli, oonianga babaandu bewe, ali Wele owekukhuulila omwene.

¹⁶Abo boosi bang'oonanga bifwaani, boosi baliambwa chisoni, boosi balichangalaala.

¹⁷Ne kakhali Isiraeli mwaonisiibwe ne Wele Omunyali Owa Bioosi, ne bukhili bwa Isiraeli bulibaao buli lwosi, babaandu ba Isiraeli se balichangalaala tawe.’ ”

¹⁸Wele Omunyali Owa Bioosi owabaang'ana likulu niye oli Wele. Abaang'ana sibala ne khusing'oona, Asiikhola siaba siiandalafu lundi siyindila, se asiikhola siaba busa tawe, ne kakhali aramo babaandu bamenyemo. Niye oboola ali, “Ese ndi Wele Omunyali Owa Bioosi ne se aliio wele okundi tawe.

¹⁹Ese se nalomaloma mu bwikisi tawe namwe nakisa sifuno siase tawe. Ese senenya babaandu ba Isiraeli bambiime aali busa tawe. Ese ndi Wele Omunyali Owa Bioosi mala ndoma bung'ali lundi khola liili liluungi limanyikha.”

²⁰Wele Omunyali Owa Bioosi aboola ali, “Khemwiche alala, babaandu be chikholo, boosi babarama mu likwa lie bubwami, khemwiche mu siina mureebwe. Babaandu babeene ba bebakala ne bifwaani biabwe bie kimirongooro, mala basaba bawele bakhanyala khubaonia tawe, babaandu bano se bamanyile sisiindu siosi siosi tawe!

²¹Khemwiche muboole kakenywe mu siina, lekha be kumusaango bareebane babeene khu beene. Naanu owang'oola khaale kakhekholekhe? Se naba ese, Wele Omunyali Owa Bioosi oonianga babaandu bewe ta ku? Se aliio wele okundi tawe.

²²“Ngobolele luno mala muonisibwe, babaandu mu sibala sioosi! Ese niise Wele seng'ene se aliio okundi tawe.

²³ Lisuubisia liase lili lia ng'ali mala se lilikaluukhasibwa tawe, ese samwene nasuubisia khu koosi nga samwene ne ndi. Buli mundu alecha asikame ebweeni wase, mala echube khuba omusuubilwa khwise.

²⁴“Bakhaboole bali khubirira mwise seng'ene, bukhili ne kamaani binyoolekha, ne abo boosi babambiila ese balichangalasibwa.

²⁵Ese Wele Omunyali Owa Bioosi khaonie be lisaaye lia Yakobo boosi, mala balifumia ese.”