Read lubukusu Isa. 46 Bible Online

Isa. 46 - lubukusu bible

Isa. 46

¹“Sino sisiakamo sie bawele ba Babiloni! Beli ne Nebo khale basaaywa, ne kakhali luno babirere khu punda, busiro khu mikoongo kie chipunda chiluile.

²Bifwaani se binyala bieonia bibieene tawe, biaambwa mu mbaambe mala biilwa aleeyi, sino sili sisiakamo sie bawele ba Babiloni!

³“Ndekeeresie, enywe lisaaye lia Yakobo, enywe mweesi mumwarama khukhwama khu baandu base. Ese namuliinda enywe khukhwama khu siise nisio mwasaalilwamo.

⁴Ese ndi Wele wenywe mala ndamuliinda, khukhwola nga muliba ne mukofuule ne khumela chimbuchi. Ese namubumba enywe mala ndamuliinda, ese ndamuelesia enywe buyeeti ne khumuonia.

⁵“Wele Omunyali Owa Bioosi areeba ali, Enywe mulandekhaasia ese khu nanu? Aliio omundu yesi yesi oli nga ese ku?

⁶Babaandu bekula chioochwa chabwe mala bachukhuluula esahabu, bakela efwesa khu bikelo. Baruunga omubasi ababasile wele, mala benama ne khukhwesaaya.

⁷Bara wele chana khu mabeka mala bamusuta, bamura abuundu mala emao, sanyala akeenda arura niio bamureere tawe. Aaba omundu yesi yesi namusaba, sanyala amukobosia tawe, namwe amuonia khukhwama mu busiku tawe.

⁸“Khebulila kano, enywe bamayaanu, yibaasia niko ese kholile.

⁹Khebulila kakekholekha khaale, fukiilila muli ese seng'ene niise Wele, ne se aliio wele okundi nga ese tawe.

¹⁰Khukhwama mu khurakikha ese nang'oola kalibao, nang'oola khaale kaliekholekha. Ese naboola ndi lirekekha liase se lilikhilwa tawe, ndi ese ndikhola buli siindu nga ne nebaasia khukhola.

¹¹Ese ndikho ndanga omundu eche khukhwama ebukwe, alafurusia busa ekhe asi nga siruuchu, mala atabusie niko ese narekekha. Nalomile mala kalekholekha.

¹²“Ndekeeresie, enywe babaandu bareengu, babebaasia bali bukhili buli aleeyi.

¹³Ese ndikho ndeera endaalo eye bukhili siimbi, seli aleeyi na akeekhe ene tawe. Bukhili bwase se bulakhiinda tawe. Ndaonia Yerusalemu mala nderere lukoosi Isiraeli ebweeneyo.”