Read lubukusu Isa. 47 Bible Online

Isa. 47 - lubukusu bible

Isa. 47

¹ Wele Omunyali Owa Bioosi aboola ali, “Babiloni yiikha khukhwama khu ndebe yowo eye bubwami mala wikhale asi mu lipukhuulu. Ewe khale waba nga owe yabwana, lukoba luboofu lukhaulwa tawe. Ne luno ewe soli omuolu lundi omutekhele tawe. Luno ewe oli nasioobi.

²Rekekha lususi! Sia bufu! Fuula sitambaala! Fuula chingubo chowo chingwalaafu! Niinia chingubo wambukhe chinjichi!

³Babaandu balabona siichula siowo, balakhubona ne wiboombia ne oambilwe chisoni. Ese ndeyacha mala se aliio omundu olakhiingilila tawe.”

⁴Wele Omutakatifu owa Isiraeli akhusikulanga efwe, lisina liewe bali Wele Omunyali Owa Bioosi.

⁵Wele Omunyali Owa Bioosi aboolela Babiloni ali, “Yikhala osile busa mu siilima, se balakhulaangakho lundi bali Kwini owe chikholo tawe!

⁶Ese nakhalalila babaandu base, nabakhola busa oli bakhali babase tawe, nabara mu bunyali bwenywe mala enywe khubakholelakho siisa tawe, bakhaba babakofula mwabapia siibi.

⁷Enywe mwebaasia muli fwaana muliamiia nga Kwini buli lwosi, mala se mwara bibiindu bino mu mebaasio, namwe se mwebaasia litabusia liabio ne liliicha tawe.

⁸ “Rekeeresia kano enywe mu mwasiima khukhwisaangasia, mumwibaasianga muli muli bulayi lundi mwaliindwa. Enywe muboola muli se aliio okundi nga enywe tawe. Enywe mwebaasia muli se muliba namulekhwa tawe, namwe muchuunisibwe khulwe khufwilwa babaana benywe tawe.

⁹Bibiindu bino bioombi bilakholekha khangu busa mu ndaalo ndala, mulafwisia baseecha ne babaana, akhaba nemurumikhira kamayia.

¹⁰“Mweulila mwabene muli, muli bulayi mu mamayaanu kenywe, mala mwibaasia muli, ‘Se aliio omundu okhubona tawe.’ Limanya, ne bukesi lienywe biamutiimia, mweboolela mwabene muli, ‘Se aliio okundi nga efwe tawe.’

¹¹Busiku bulakhwichakho, ne se kaliio kamayia kowo kanyala kabukhiingilila tawe, libuna lilamwichakho khangu nilio mukhamanyile tawe.

¹²Biikha bie kamayia nende bie bufumu bienywe, mwabirumikhira khukhwama bwana, bikhola birio binyala biaba ne buyeeti khwinywe. Wakana enywe munyala mwariikhirisia basiku benywe.

¹³Se muli ne bunyali bwosi bwosi tawe, akhaba ne munyoolanga likeleka. Lekha bakesi benywe babemenieelesianga ke ching'enieesi barure beche bamuonie. Abo babeyika ke ching'enieesi, baandika chinjakha che likulu, mala bamuboolela enywe buli mwesi kalikho kacha khumwekholekhakho.

¹⁴“Lola bali nga bitonyi bie chikhanja, mala kumulilo kulabosia! Se balinyala khukhweonia babeene khukhwama khu bumemu bwe kumulilo tawe. Se kaliio kamaanda ke khukhwora tawe, kumulilo okwo se kuli kwe khukhwora tawe.

¹⁵Bubwenobu nibwo bulayi nibwo balakhukholela bakesi babemenieelesianga ching'enieesi abo, nibo enywe mwareebanga mu bulamu bwenywe bwoosi. Boosi balamulekha bamwaukhekho, ne se aliio mulala olirama amuonie tawe.”