Read lubukusu Isa. 48 Bible Online

Isa. 48 - lubukusu bible

Isa. 48

¹Rekeeresia kano, baandu ba Isiraeli, enywe be lisaaye lia Yuda, enywe mwechuba mu lisina lia Wele Omunyali Owa Bioosi ne khuboola muli, mulasaayanga Wele owa Isiraeli, mala se mukhola niko muloma tawe.

²Ne muboola ne kukwebonio muli, efwe khuli babaandu be lukoba lutakatifu lundi mweyikina Wele owa Isiraeli, omanyikhane bali Wele Omunyali Owa Bioosi.

³Wele Omunyali Owa Bioosi aboolela Isiraeli ali, “Ese nang'oola khale kalicha khukhwekholekha, mala nakakhola khangu busa.

⁴Ese namanya ndi enywe muliekesia khuba ne sileka, muli balume nga sichuuma, lundi baandalafu nga kumukasa.

⁵Ne ese nang'oola khaale kakenywe, ke chindaalo chichiicha, naboola kakhekholekha tawe, khumukhiingilila enywe mukhakhola murio mwaloma muli, bifwaani ne bibechwa bienywe nibio bibiakhola kakekholekha kano tawe.

⁶Koosi niko nang'oola kekholekhe, enywe mukhoya mufukiilile, muli bung'oosi bwase buli ng'ali. Ne luno ndamuboolela ke bibiindu biyia bilikho bicha, bikholwa nibio abeele khamwekesiakho tawe.

⁷Ndikho khola bino bikholekhe luno lwong'ene, sisiindu nga esio sirio sikhakholwakho mu ndaalo chichabira tawe. Abanga siindu siri siekholekhakho, mwakhalomile muli efwe khwasimanya khale.

⁸Enywe mukhaulilakho kario, namwe mwakamanyakho tawe, khukhwama khale kamaru kenywe kakhaulilakho kano tawe. Sikila namanya ndi enywe se musuubila tawe, ne khukhwama bwana muli barengu.

⁹Nio babaandu bafumie lisina liase, nalekhile lirima liase, nalilekhile ne se ndakhubunia tawe.

¹⁰Ese namura enywe khu likela, namubisia mu mulilo kwe buchuuni, nga efwesa ne yosiebwa mu bunoro. Ne kakhali namuboone muli busa, namukhakile mu mulilo kwe sinyaasio.

¹¹Niko ese khola kano kakholwa sikila ese samwene, se ndilekha lisina liase lichangalasibwe tawe. Namwe se ndilekha omundu yesi yesi aebwa luyali lwase tawe.” Olwo luli lulwase lundi lulwase seng'ene.

¹² Wele Omunyali Owa Bioosi aboola ali, “Ndekeeresie, Isiraeli Ese ndi Wele, onyoa, omaliilikha oli Wele seng'ene.

¹³Kamakhono kase kabaang'ana kumusiingi kwe sibala, mala kabalaya likulu, nga ne nanga sibala ne likulu, bicha khangu bima ebweeni wase.

¹⁴“Khemwibuusie alala mala murekeeresie mweesi. Se aliio mulala khu bawele onyala ang'oola ali, omundu niye ese narobora alibwaakala Babiloni, alikhola niko ese nenya niye akhole tawe.

¹⁵Ese niise owalomaloma mala namulaanga, namurangirira mala namukhola aindiaala.

¹⁶Luno khemwiche siimbi khwise mala muulile niko mboola, khukhwama mu khurakikha ese nalomaloma busa abuwaanga, mala buli lwosi ese nakhola kamakhuwa kase kabe ng'ali.” (Luno Omwami WELE ambelesie ese bunyali bwewe mala andumire.)

¹⁷Wele Omutakatifu owa Isiraeli, Wele Omunyali Owa Bioosi omuonia wenywe aboola ali, “Ese ndi Wele Omunyali Owa Bioosi, Wele wenywe, owenya khumwekisia enywe khulwe bulayi bwenywe, mala mwekesie khu ngila niye mukhoyele muchilekho.

¹⁸Mubaanga mumwarekeeresia kamalaka kase, andi chikhabi chekha khwinywe nga luluuchi lukhateenya tawe. Bukhili andi bwamwichakho nga bibuli bie nyanja ne bipa sikiingi.

¹⁹Andi lisaaye lienywe lili likali lukali nga kumuyekhe, mala andi namusuubisia ndi se balibuna tawe.”

²⁰ Rura mu Babiloni, ba omulekhuule, Yilwacha chilomo chindayi mu busangaafu, khola chimanyikhe buli abuundu. “Wele Omunyali Owa Bioosi aonisie omukholi wewe Isiraeli!”

²¹Nga Wele Omunyali Owa Bioosi arangirira babaandu bewe babira mu siangalaamwe, se baba ne bulesia tawe. Abakholela kameechi karura mu lwanda, aramo lulwanda mala kameechi kamamo.

²² Wele Omunyali Owa Bioosi aboola ali, “Kumuleembe se kuliio khu bamayaanu tawe.”