Read lubukusu Isa. 49 Bible Online

Isa. 49 - lubukusu bible

Isa. 49

¹ Enywe chikholo che aleeyi ndekeeresie, enywe babaandu mumenyile aleeyi! Ese nekhasaalwa tawe, Wele Omunyali Owa Bioosi andobora, mala anjimikha mbe omukholi wewe.

² Akhola kamakhuwa kase kaba kamoki nga embalu. Andeecha ese ne kumukhono kwewe. Akhola ese naba nga luembo, aangisa mu situukhu siewe.

³Amboolela ese ali, “Isiraeli ewe oli omukholi wase, sikila ewe, babaandu balafumia ese.”

⁴Ne ese naboola ndi, “Ese nakholile kimilimo ne se kilimo bukhala tawe. Narumikhiire kamaani kase, ne mbao nisio nyolilemo tawe.” Kakhaba kario ese nyala khusuubila Wele Omunyali Owa Bioosi olababila kakaase, alandunga kumuruuru khu niko nakhola.

⁵Ese nekhasaalwa tawe Wele Omunyali Owa Bioosi andobora, akhola omukholi wewe ngobosie babaandu bewe, ngobosie babaandu ba Isiraeli babasalanila. Wele Omunyali Owa Bioosi ambelesianga lukoosi, ali sisina sie kamaani kase.

⁶ Wele Omunyali Owa Bioosi amboolela ali, “Ese ndi ne kimilimo kimikali khwiwe, mukholi wase. Se lili khukoboselia babaandu ba Isiraeli babarama bunyali liong'ene tawe, ne khali lundi ese ndakhukhola ewe obe buwaanga khu kholo choosi, nio sibal sioosi sionisibwe.”

⁷Wele Omutakatifu lundi omuonia owa Isiraeli aboolela oyo, olekelesebwe lukali, oyo obiilwe ne chikholo lundi oli omukholi we babaami. “Babaami balikhubona ewe nolekhuulwa, mala balinyokha bekesie buriaani bwabwe. Babaana be babaami bosi balibubona, mala baliinama khukhuelesia ewe lukoosi.” Lino lilikholekha sikila Wele Omunyali Owa Bioosi arobora omukholi wewe, Wele Omutakatifu owa Isiraeli akhola lisuubisia liewe.

⁸ Wele Omunyali Owa Bioosi aboolela babaandu bewe ali, “Nga siise sie khumuonia ne siliola, Ese ndimubabila enywe mala ngobosie lilila lienywe khulwe buyeeti, ndimuliinda ne khumuteecha, mala khubirira mwinywe ese ndikhola endakaano yase ne babaandu boosi. Ndimulekha mumenye lundi mu sibala sienywe, siikhalimo siindu tawe.

⁹Ese ndiboolela baboe ndi, ‘Muli balekhuule.’ Ne abo bali mu siilima ndibaboolela ndi, ‘Khemwiche mu buwaanga.’ Baliba nga kamakheese kakaya khu ngulu,

¹⁰ se baliba ne enjala namwe bulesia tawe. Kumuumu ne luucho lwe siimiyu se kuliboosia tawe, sikila balirangirirwa ne noyo owabasiima. Alibayila khu sebele che kameechi.

¹¹Ndasenjula engila emboofu ebire mu bikulu, ne khurekekha engila babaandu base babirirekho.

¹²Babaandu base baliama aleeyi, balama ebunaswa ne mumbo, ne khukhwama mu lukoba lwa Aswani e bunafubo.”

¹³Yimba, likulu! Sibala yokela khulwe liliekhoya, lekha chingulu chimbe, Wele Omunyali Owa Bioosi alioleelesia babaandu bewe, alikholela siisa babaandu bewe babapwa sibi.

¹⁴Ne kakhali babaandu ba Yerusalemu baboola bali, “Wele Omunyali Owa Bioosi akhwanjukha! Akhwibilila.”

¹⁵Nio Wele Omunyali Owa Bioosi akobosia ali, omukhasi anyala webilila omwana wewe onuuna ku? Mala alekhe khusiima omwana niye asaala? Akhaba, maawe nanyala webilila omwana wewe, ese sendimwibilila enywe na akeekhe ene tawe.

¹⁶Yerusalemu, ese se nyala nakhwibilila ewe tawe! Ese naandike lisina liowo mu bikalabo biase.

¹⁷Abo balimwombakha balikho becha khangu, ne abo babamubunia enywe balarekukha.

¹⁸Lola eyi neyi mala obone kalekholekhanga. Babaandu bowo balikho babusiana balikho beecha engo! Nga ng'ali ese nendi Wele omenyile mindali, olebonia khulwe babaandu bowo, nga omwea ne ebonia khulwe kamamili kewe.

¹⁹Sibala sienywe sionakakwa ne khukhwanjukhwa, ne kakhali luno silaboomba khulwe balikho ne becha khu menyamo. Ne abo babakhulekha mu makuunda, balirusibwa khukhwama khwinywe bayilwe aleeyi.

²⁰Babaandu bowo babasaalwa mu mbaambe endaalo ndala balikhuboolela bali, “Sibala sino siaboombile, khung'oonele abuundu khumenyeo.”

²¹Nono ewe olireeba oli, “Naanu owasaalila ese babaana bano boosi, ese nafwisia babaana base mala abele senyala nanyoola babaandi tawe. Nayilwa mu mbaambe? Naanu owakhusia babaana bano, babaana bano bama waena?”

²²Omwami WELE aboolela babaandu bewe ali, “Ese khasakule chikholo, mala chireere babaana bowo engo.

²³Babaami balaba nga paapa khwiwe, Bakwini balaba nga bamaayi. Balinama ebweeni wowo bole asi, mala bakhuelesie lukoosi, balieboombia, bakhwekesie buriaani bwabwe khwiwe. Nono ewe olamanya oli ese ndi Wele Omunyali Owa Bioosi, se aliio omundu olilindiilila buyeeti bwase olibelela tawe.”

²⁴Ewe onyala wanuula naitiriani kimiaandu nikio ayaayile ku? Ewe onyala wareesia baboe khukhwama khu mwami omululu ku?

²⁵“Wele Omunyali Owa Bioosi akobosia ali, Kamenako kario kacha khwekholekha. Baboe ba naitiriani balalekhuulwa, ne biyaaywa bio omwami omululu bilanuulwa. Ese ndapana no mundu yesi yesi okhupania ewe, mala ndareesia babaana bowo.

²⁶Ese ndakhola ba bakuluumia berane babeene ne babeene, balameela bubwiri ne lirima. Nono babaandu boosi balamanya bali ese ndi Wele Omunyali Owa Bioosi, Okhuonianga ewe mala akhulekhuula. Balimanya bali ese ndi Wele owe bunyali owa Isiraeli.”