Read lubukusu Isa. 5 Bible Online

Isa. 5 - lubukusu bible

Isa. 5

¹ Lekha nimbile omusiime wase kumwenya kwe busiime, khuloondekhana ne liruuti lie kimisabibu kiewe. Omusiime wase aba ne liruuti lie kimisabibu, khu sikulu sie engakha engali.

²Alilima ne khurusiamo kamabaale, mala abiaalamo kimisabibu kimilayi: ombakha akari wakio endeleelwa eye khulindilakho, ayabamo liloo lie khukhamululilamo endali, nio alindiilila liame chisabibu, ne kakhali kumukuunda okwo kwama kamatuunda kamalulu.

³Ne luno, bamenywa ba Yerusalemu ne babaandu ba Yuda, musaba, mukhalake, akari wase ne kumukuunda kwase kwe kimisabibu.

⁴Siina sisiindi sienyekhana khole mumukuunda kwase, nisio khakhola tawe? Nga nakuliindilila kwame chisabibu, siina sikila ne kwaamile kamatuunda kamalulu?

⁵Ne luno ndamuboolela nisio ndakhola khu liruuti liase lie kimisabibu. Ndarusiao lumako lwalio, mala lilonakwa. Ndatechula lisiisi liakwo, mala balakutula.

⁶Ndakulekha enyoonyi esimbemo, se ndakusonjoola namwe se ndakwakila tawe, embululwe ne kamawa bilikhulamo, Lundi ndalaka kamafuumbi, kalobe khurera efula mu mukuunda okwo.

⁷Kumukuunda kwe kimisabibu kwa Wele Omunyali Owa Bioosi owe banamae kuli enju eya Isiraeli, ne babaandu ba Yuda bali sibiaalwa sisiimisia, mala alindiilila bakhole bung'ali, ne kakhali bakhola kakhali ng'ali tawe, alindiilila khubona buluungi ne kakhali abona sifuki.

⁸Bali ne silaamo abo bakula chinju ne khutasa khu chiindi, ne kimikuunda ne batasa khu kiindi, Khukhwola nga ne bamala koosi, nio okundi yesi yesi se anyoola niio amenya tawe, mala bamenya bong'ene mu mikuunda.

⁹Nauliile Wele Omunyali Owa Bioosi owe bunyali ne echuba ali, “Ng'ali chinju chingali chicha khurama busa, chinju chimboofu chindayi se chilabamo babaandu tawe.

¹⁰Sikila chieeka kumi che kumukuunda kwe kimisabibu, chilaama sikono silala, Ne lumicho lulala lulaama endubi ndala yong'ene.”

¹¹Bali ne silaamo abo babenyokha makhelebeende, khuyiima enguuli, banywa khukhwola siilo khukhwola nga bameela!

¹²Bali ne siilili ne lituungu, etamburini, kumulele ne ndali mu naikara chabwe, ne se bebaasia khu bikholwa bia Wele Omunyali Owa Bioosi namwe khubona kimilimo kiewe tawe.

¹³Khwako babaandu base bacha mu mbaambe khulwe khutaamba limanya, Babaandu babwe be lukoosi balafwichanga enjala, ne babaandu babwe bakali bali ne bulesia.

¹⁴Khwako emakoombe yabeele ne kameelu kamakali ke khubalia, mala yasaame kumunwa kwayo kwabalaayile lukali, ne babaandu ba Yerusalemu bakoosi, ne babaandi boosi ba Yerusalemu balacha emakoombe, alala ne busangaafu bwabwe na buli mundu owekhoyela Yerusalemu.

¹⁵Buli mundu alafwa kumwoyo, mala alaambwa chisoni, ne babaandu balaboombia bunyali, ne abo babelola balaambwa chisoni.

¹⁶Ne kakhali Wele Omunyali Owa Bioosi owe banamae aebwe luyali mu bung'ali, ne Wele omutakatifu weyokesie omwene khuba omutakatifu, khulwe khukhola kamaluungi.

¹⁷Nio kamameeme kalaaya nga mu mayilwe mwako, ne chimoosi ne chimeeme chilaaya mu makuunda.

¹⁸Bali ne silaamo abo bareera bumayaanu ne kimikoye kie bubeeyi, abo bakhweesa bumayaanu nga bakhweesa kimikoye kia korokocho.

¹⁹Baloma bali, “Lekha akhole khaangu, lekha akhole khangu mu milimo kiewe, nio efwe khubone, lekha sifuno sio Mutakatifu owa Isiraeli ne sicha, lekha siche siimbi nio khusimanye!”

²⁰Bali ne silaamo abo balanga bumayaanu bali bulayi ne bulayi bali bumayaanu, bakhola sisiilima khuba buwaanga, ne buwaanga khuba sisiilima. Balaanga bululu bali bunulu, ne bunulu bali bululu!

²¹Bali ne silaamo abo babekhola bakesi, ne bekhola bakesikesi lukali ebweeni wabwe babeene,

²²bali ne silaamo abo babekhola bamanyile lukali khunywa endali, ne bamanyile lukali khutubaanisia kamalwa,

²³baelesia bung'ali omumayaanu, nio banyoole asoya, ne khukhwimana omuluungi bung'ali bwewe.

²⁴Khwako, nga kumulilo ne kwoosia chikhaanja, ne nga bunyaasi bubwoomu ne bumamulukha mu mulilo, nono kumuli kwabwe kuli nga bubolo. Ne khumulikha khwabwe khutamuukha busa nga lufuumbi. Sikila balobile lilaka lia Wele Omunyali Owa Bioosi owe banamae, mala balekelesia elomo yo Mutakatifu owa Isiraeli.

²⁵Khwako, Wele Omunyali Owa Bioosi aba ne lirima khu baandu bewe, mala asuta kumukhono kwewe abaape, ne bikulu biaterema, ne bafu baabwe baba nga kamaandu, mu chingila che mu lukoba. Khu kano koosi, lirima liewe likhaawa tawe, Ne asiisuta busa kumukhono abaape.

²⁶Alokesia simanyisio khu sibala, siili aleeyi mala ape kumulusi asilaange siiche, khukhwama aleeyi mu sibala, ne lola, silikho siicha khangu.

²⁷Mbao oluyile namwe owituyile tawe, mbao ouungula namwe okona tawe, mbao engubo emboela etebateba tawe, mbao lukhoba lwe chingata lulwakhalikha tawe,

²⁸buembo bwabwe buli bubwooki, buyiingo bwabwe bwoosi bwerekekhe khulasa, bikhakayu bie chifarasi chabwe bili nga kamabaale, Ne bikele bie kamakaari kabwe ke liie bili nga sisifuusia.

²⁹Liulukhuma lie banamae lili nga lie etalang'i, baulukhuma nga chitalang'i chindoro, chongolela mala chifwakhila esaang'i, chisuta chirekukha nayo mala mbao onyala achinuula tawe,

³⁰khu ndaalo ng'eneyo, baliulukhuma khu ba Isiraeli, nga khuoloola khwe nyanja. Ne omundu aaba ne alola khu sibala, alibona sisiilima ne butinyu, ne buwaanga bulafuunikhwa ne kamafuumbi.