Read lubukusu Isa. 50 Bible Online

Isa. 50 - lubukusu bible

Isa. 50

¹Wele Omunyali Owa Bioosi areeba ali, “Enywe mwibaasia muli ese naona babaandu base bacha, nga omundu naona omukhasi wewe? Nono kamaandiko ke khulekhana kali waena? Enywe mwibaasia muli ese namukusia mu mbaambe, nga omundu nakusia babaana bewe nga nasioobi? Se kali kario tawe, enywe mwacha mu mbaambe sikila bumayaanu bwenywe, mwayilwa sikila kamamayaanu kenywe.

²Siina sikila babaandu base ne bakhilwa khukhungobosia, nga nacha khu nibo khubaonia? Sikila siina ne balekha khufukiilila nga ne nabalanga? Ese ndi omutekhele lukali khubaonia ku? Ese nyala nateenyesia enyanja ne lilaka liase, ne khukaluukhasia chinjichi chikele sisiangalaamwe, nio ching'eeni chilimo chifwe bulesia.

³Ese nyala khukhola likulu liamaliia, liaba nga lilila bafu.”

⁴Omwami WELE anjekeesie nisio khoyele ndome nio nyale khutinyilisia abo baluyile. Buli sibuuyi akholanga ese mba ne silukuluku, khuulila nisio alikho acha khukhusomia.

⁵Omwami WELE ambelesie ese limanya, mala se nakhola bureengu nanwe namulekelesia tawe.

⁶ Ese narao busa kumukoongo kwase khwaabo babakhupa, ne abo babakhoma senabakhiingilila tawe, nga baba ne bakhuula bunwanwa bwase ne khukhufucha mumoni.

⁷Ne likhoma liabwe selinyala khukhumbumisia tawe, sikila Omwami WELE alanjeeta. Netinyilisia khu kekhaliilikha koosi. Ese manyile ndi se ndiambwa chisoni tawe,

⁸ sikila Wele ali siimbi nase ne aleekesia ali sendi ne bumayaanu tawe. Aliio omundu onyala eana aboola bubi bwase ku? Lekha khuche fwembi mu siina! Lekha niye aboole bubi bwase!

⁹Omwami WELE omwene niye ousolaanga, nanu nono onyala ekesia ali ese ndi ne kumusaango? Boosi babambayila kumusaango se balibao tawe, balibao busa nga engubo niyo kamake kalile.

¹⁰Enywe mweesi muria Wele Omunyali Owa Bioosi, ne khuria kamakhuwa ko mukholi wewe, engila niyo mukeendelakho enyala yaaba eye sisiilima sikali, ne kakhali suubila Wele Omunyali Owa Bioosi, mala yeyikina Wele wenywe.

¹¹Enywe mweesi mukhola chikwangwachi che khubunia babasienywe, mulibunisibwa ne chikwangwaani chenywe mwabeene. Wele Omunyali Owa Bioosi omwene alikhola lino likholekhe, mulichunisibwa ne ngunyi.