Read lubukusu Isa. 51 Bible Online

Isa. 51 - lubukusu bible

Isa. 51

¹Wele Omunyali Owa Bioosi aboola ali, Ndekeeresie, enywe mumwenya khuonisibwa, enywe mumwichanga ese muyeete. Yibaasia lulwanda nilwo mwamakho, mu mabaale nimwo mwayabwa.

²Lola Aburahamu raraawenywe, ne Sara owamusaala enywe. Namulaanga nakhali namwana tawe, nio ese namubiita chikhabi namuelesia babaana.

³Ese ndiekesia siisa khu Yerusalemu, khu boosi bamenyile mu makuunda. Yakhaba sibala sialwo ne sili sisiangalaamwe, ese ndasiikhola kumukuunda, nga kumukuunda nikwo ese nabiaala mu Edeni. Liliekhoya ne busangaafu bulibayo, ne kimienya kie khufumia ne khukhupa orio khwise.

⁴“Ndekeeresie baandu base, rekeeresia niko ese mboola. Ese mbelesia chikholo kamekisio kase, kamalaka kase kalabarerera buwaanga.

⁵Ese ndecha khangu mala mbaonie, siise sie bukhili bwase sili siimbi. Ese samwene ndamiia chikholo. Bibala bie aleeyi binindiilila niche, banindiilila ne lilieyikina mbaonie.

⁶Lola mungaaki, lola asi! Likulu lilirusibwao nga liliisi, sibala siliwao nga engubo ekhale, ne babaandu basio boosi balifwa nga chiisi. Ne kakhali buonia nibwo ese ndeera bulibaao buli lwosi, bukhili bwase buli bumalayo.

⁷“Ndekeeresie, enywe mumwamanya kali kamaluungi, enywe mumwatiila kamekisio kase mu miooyo kienywe. Mukhaba bari nga babaandu ne bamuyingila ne khu mukhoma tawe,

⁸balawao nga engubo niyo kamake kaliile! Ne kakhali buonia nibwo ese ndeera bulibaao buli lwosi, bukhili bwase bukhabeo biise bioosi.”

⁹Wele Omunyali Owa Bioosi yinyokha mala okhuyeete! Rumikhira bunyali bwowo mala okhuonie, burumikhire nga wakhola mu biise bikhale. Niwe owaremakaka mu bitonyi Rahabu, kukuundu kwe mu nyanja kufwaana kuremu.

¹⁰Waaba ewe lundi owakabukhasiamo enyanja mala wakhola engila yabira mu meechi, nio abo nibo waba ne olikho oonia bambukha.

¹¹Abo nibo ewe waonia baliola Yerusalemu ne busangaafu ne bemba ne khukhwekhoya. Balisangaala buli lwosi, se balieumba ne khukhola siisa lundi tawe.

¹²Wele Omunyali Owa Bioosi aboola ali, “Ese niise omutinyilisianga enywe. Siina sikila murie omundu onyala afwa, Okhamenya khukhila bunyaasi tawe?

¹³Ne enywe mwebiliile Wele Omunyali Owa Bioosi owamubuumba, Owababuumbila likulu mala aarao kimisiingi kie sibala? Siina sikila enywe buli busiele mumenye mu buri, bwe lirima liaabo bamukuluumia, ne nabo baberekeekhe khu mubunia? Lirima liabwe se linyala lundi liamwetiilakho tawe.

¹⁴Abo bali baboe balalekhuulwa khangu, balamenya bulamu buleeyi, mala balaba ne biakhulia bioosi nibio benya.

¹⁵Ese ndi Wele Omunyali Owa Bioosi, Wele wenywe, ese ninyosia enyanja mala khola bibuli bie kameechi biiolola. Lisina liase lili Wele Omunyali Owa Bioosi.

¹⁶Ese nabalaya likulu mala narao kimisiingi kie sibala, mboolelanga Yerusalemu ndi, ‘Enywe muli babaandu base! Ese namuelesia enywe kamekisio kase, ne muliindanga ne kumukhono kwase.’ ”

¹⁷ Yerusalemu, yinyokha! Yinyokha mala wime! Ewe onywele sikoombe sie siiukuumo siewe, nisio Wele Omunyali Owa Bioosi mu lirima liewe akhuelesia, wasinywa mala siakhutalitaasia.

¹⁸Se aliio na mulala okhurangirira tawe, se aliio na mulala mu baandu bowo okhutiila kumukhono tawe.

¹⁹Busiku bubili bwakhukwilekho, sibala siowo sionakwe ne liie, lundi babaandu bowo babeele ne njala. Se aliio na mulala yeng'ene okhukholela siisa tawe.

²⁰Buli niio engila yakholela ekhuumbo, babaandu bowo bakwa ruruuchu sikila butekhele, bali nga kicheu naambilwe mu luriimba lwo muaayi. Baboone kamaani ke lirima lia Wele.

²¹Khwako ulila kano, mulikho mupisibwa sibi, mwamelile ne kakhali se mwamelile khulwe ndali tawe.

²²Wele Omunyali Owa Bioosi, Wele wenywe omusoolanga aboola ali, “Ese ndusiao sikoombe nisio namuelesia mu lirima liase. Se mukhanywe lundi endali emumeesia mutalitaale tawe.

²³Khaelesie sikoombe sie lirima khwaabo babamupia sibi, khwaabo babamukhola enywe mwalaambaala khu chingila, mala bamuswalakilila oli enywe mu mwaba eng'unda.”