Read lubukusu Isa. 52 Bible Online

Isa. 52 - lubukusu bible

Isa. 52

¹ Yerusalemu ba owe kamaani lundi, Lukoba lutakatifu lwa Wele yifwara chingubo che lukoosi! Bakhasuubila mu Wele se balingila lundi mu bilibwa biowo tawe.

²Khemwilekhuule Yerusalemu! Khewinyokhe mwipukhulu mala wikhale khu ndebe yowo eye bubwami! Khewikangulule kiminyololo kimuboyile enywe, babaandu be mu mbaambe ba Sayuni.

³Wele Omunyali Owa Bioosi aboolela babaandu bewe ali, “Nga enywe ne mwakholwa nasioobi se chiliio chirupia nicho enywe mwakulwa tawe, ne mu ngila ng'ene se siliio siikharuungwe khumulekhuula tawe.

⁴Omwami WELE aloma ali, nga ne mwacha khumenya mu Misiri nga baakwa, mwakhola murio mu khwenya khwenywe mwabeene, kakhaba kario Ashuru siamubukula siamuyila ne kamaani, mala se siaruunga sisiindu siosi siosi khulwe enywe tawe.

⁵ Ne luno kekholekhe kario mu Babiloni muli baambe mbao sisiaruungwa khulwe enywe tawe. Abo bamwamiia bebonia ne khukhwiniinia ne buli lwosi bandekelesia,

⁶mu siise siliicha mulifukiilila muli ese ndi Wele lundi niise olomalome nanywe.”

⁷ Lili lilayi lukali khubona omurumwa ne alikho ne echa, nakhalisia khu bikulu nareera chilomo chindaayi chilomo che kumuleembe! Alaangilila bukhili naboolela Sayuni ali, “Wele wowo ali Omwami!”

⁸Abo baliindanga lukoba bayokela, bayokelela alala khulwe ekhoyo! Banyala babona ne chimoni chabwe, likobola lia Wele Omunyali Owa Bioosi khu Sayuni!

⁹Yokela ne kimienya kie liliekhoya, enywe kamakuunda ka Yerusalemu, sikila Wele Omunyali Owa Bioosi aolelesie babaandu bewe lundi aonisie lukoba lwa Yerusalemu.

¹⁰Wele Omunyali Owa Bioosi akharumikhire bunyali bwewe butakatifu, akhaonie babaandu bewe, mala sibala sioosi sikhabone bunyali bwa Wele wefwe.

¹¹ Rura mu Babiloni enywe mweesi musutanga bibiindu bie Lukaangu! Mukhatiila khu siindu siosi siosi sisiakanisibwa tawe, khemwelinde mwabeene mube batakatifu mala murekukhe.

¹²Siise sino, se mularekukha khangu tawe, se mulaba mwilukha tawe. Sikila Wele Omunyali Owa Bioosi, Wele wenywe alamurangirira lundi amulinde buli lubeka.

¹³Wele Omunyali Owa Bioosi aboola ali, “Omukholi wase akhakhole bulayi kimilimo kiewe. Akhaelesebwe lukoosi lukali.

¹⁴Babaandu bakali besiindukha nga bamubona, lukoondo lwewe lwonakakwa ne liaba lilume khumanya oli mundu.

¹⁵ Ne kakhali luno chikholo chingali chiliesiindukha nga chilimubona ne babaami se baliba nende nilio baloma tawe, baliiuka busa. Balibona mala bamanye sisiindu nisio baba ne bakhamanyakho tawe.”