Read lubukusu Isa. 53 Bible Online

Isa. 53 - lubukusu bible

Isa. 53

¹ Babaandu bakobosia bali, “Naanu abele onyala asuubila niko efwe khulikho khuboola luno? Naanu abele onyala abona bunyali bwa Wele Omunyali Owa Bioosi mu kano?

²Liaba lilienya lia Wele Omunyali Owa Bioosi bali omukholi wewe alachoa nga simelwa sisiikhisia kimili mu liloba liliomu, se aba ne lukoosi namwe lukoondo lulayi lukhukhola efwe khwamumanya tawe. Se siabao siikhusiimisia khu niye tawe, namwe se siabao siikhurera siimbi naye tawe.

³Khwamuleka ne khumuloba, ekhaliilikha khukhupwa sibi ne buchuuni, se abao na mulala owenya khumulolakho tawe, khwamulekelesia nga okhaba siindu tawe.

⁴ “Ne kakhali ekhaliilikha khukhupwa sibi sisiaba sisiefwe, buchuuni nibwo andi efwe khwachuunwa. Mukoosi kano efwe khwebaasia khuli khukhupwa siibi siewe, siaba siiukuumo sirumirwe ne Wele.

⁵ Sikila bumayaanu bwefwe anyoola kamakoonjo, apwa sikila kamabi niko efwe khwakhola. Efwe khwaonisibwa ne siiukuumo nisio anyoola, khwaona ne bukhupe nibwo niye anyoola.

⁶ Efwe fweesi khwaba nga kamakheese kakatiba, buli mulala khwifwe achile engila yewe. Ne kakhali Wele Omunyali Owa Bioosi akhola siiukuumo siaba khu niye, siiukuumo nisio efwe fweesi khwakhoyele khunyoole.

⁷ Bulayi bwene nga limeeme liili siimbi khukhwirwa, nga likheese lili ambi khutetwa bufuumbo, se alomaloma likhuwa tawe.

⁸Atiilwa ne khukhalakilwa lifwa, ne se aliio owamwiembeelela tawe. Erwa sikila bumayaanu bwe babaandu befwe.

⁹ Bamura mu ng'ani alala ne babaandu bamayaanu, asiikhwa alala ne baiinda akhaba niye nakhakhola kamamayaanu tawe, namwe alomakho bubeeyi tawe.”

¹⁰Wele Omunyali Owa Bioosi aboola ali, “Liaba lilienya liase apwe siibi, lifwa liewe liaba embosio khureera khubeelwa. Ne alibona be lisaaye liewe, alimenya bulamu buleeyi, ne khubirira mu niye lilienya liase liliekholekhana.

¹¹Enyuma we limenya lie khukhupwa, aliekhoya, lundi alimanya ali se anaanisibwa busa tawe. Omukholi wase owerusia ne kumwoyo kwoosi niye ese sangaalilanga, alibukula siiukuumo sie bakali, ne sikila niye, ese khababeele nibo.

¹² “Akholelwa bubi ne abwikhaliilikhila mu buolu, Nio, ese khamuelesie niye abuundu e lukoosi, abuundu e babaandu bakhulu ne bunyali. Erusia, aana bulamu bwewe, mala eyama siiukuumo sie babaandu bamayaanu. Abukula abuundu e bamayaanu bakali, mala asaba ali ne kanyalikha bole khubeelwa.”