Read lubukusu Isa. 54 Bible Online

Isa. 54 - lubukusu bible

Isa. 54

¹ Yerusalemu, ewe wabeele nga omukuumba, ne luno onyala wemba mala wasangaala khulwe liliekhoya. Ne kakhali luno ewe olaba ne babaana bakali, khukhila omukhasi okhalekhanakho no museecha tawe.

²Balaaya liiema nilio omenyilemo, yiinga kimikoye kialio mala okhome bichaangi bilume!

³Ewe olabalaaya chinjakha chowo mu mbeka choosi, babaandu bowo bakhakalusibwe kamaloba, niko chikholo chichiindi luno chimenyilemo. Chingoba chimboofu chichanjukhwa chikhechulemo babaandu.

⁴Okharia tawe, se okhaambwe chisoni lundi tawe, ewe solichangalasibwa tawe. Ewe okhebilile sifwaabi siowo sie bukhaana, ne liaayaaya lie khulekhwa weng'ene nga namulekhwa.

⁵Omubumbi Wowo aliba nga omuseecha wowo, Wele Omunyali Owa Bioosi nilio lisina liewe. Wele Omutakatifu owa Isiraeli alakhuonia ewe, ali Omwami owe sibala sioosi.

⁶Isiraeli, oli nga omukhasi omuele, owanjukhwa no museecha wewe, mala ali mu bubeeleli bukali. Ne Wele Omunyali Owa Bioosi akhulaanga ewe okobole khu niye, mala aboola ali:

⁷“Khulwe siise sikeekhe siri ese nakhulekha, Ne kakhali khulwe siisa sikali khakhukobosie.

⁸Ese nalola elubeka mu lirima khulwe siise sikeekhe siri, ne khakhwekesie busiime bwase buli lwosi.” Wele Omunyali Owa Bioosi ookhuonianga alomile ario.

⁹ “Mu siise sia Noa nasuubisia ndi, se ndireera kameechi kechule sibala lundi tawe. Luno khusuubisia ndi se ndikhuambila ewe lirima lundi tawe, se ndikhurafwira namwe khuukuume tawe.

¹⁰Bikulu ne chingulu bilikwa bitonyekhe, ne busiime bwase khwiwe se buliakama tawe, ese khaliinde lisuubisia liase lie kumuleembe lia buli lwosi.” Wele Omunyali Owa Bioosi owa khusiima ewe aboola ario.

¹¹ Wele Omunyali Owa Bioosi aboola ali, “Ee Yerusalemu, ewe oupwa sibi lukoba lukhali ne buyeeti tawe, se aliio omundu okhuoleelesia tawe, ese ndombakha kimisiingi kiowo ne kamabaale ke bukusi bwe angaaki.

¹²Ndombakha chindeleelwa chowo ne kamabaale kamabesemu, bilibwa biowo ndombakhila kamabaale ka kesing'eeng'a nga kumulilo, ne lisiisi likhubotookhelela lie kamamili.

¹³ “Ese samwene khekisie babaandu bowo, mala mbaelesie kimiaandu ne kumuleembe.

¹⁴Bung'ali ne buluungi bulakhukhola obe ne kamaani, olaliindwa bulayi khukhwama mu khumiinikhwa ne liriisia.

¹⁵Yesi yesi okhwibwaakala, akhola ario khulwewe omwene, ese se namufukiilile tawe, yesi yesi olapana ne nawe alakhilwa.

¹⁶“Ese mbumbanga omubasi, obwananga kumulilo mala eraanya bulwaani. Akhaba lundi ese mbumbanga naitiriani orumikhiranga bulwaani khukhwira.

¹⁷Wele Omunyali Owa Bioosi alomile ali, ne kakhali se buliio bulwaani bunyala bwakhuumisia ewe tawe, okhabe nende nilio okobosia abo boosi bakhusitaka. Ese khababile bakholi base mala mbaelesie bukhili.”