Read lubukusu Isa. 55 Bible Online

Isa. 55 - lubukusu bible

Isa. 55

¹ Wele Omunyali Owa Bioosi aboola ali, “Buli mundu oli ne bulesia eche, kameechi kali ano! Khemwiche, enywe mukhali ne chirupia tawe, kula biakhulia mala mulie, khemwiche! Kula endali ne kamabeele, se mularuunga siindu tawe.

²Siina sikila enywe ne mumalila chirupia khu biindu nibio mukhekura tawe? Siina sikila ne murumikhira kumuruungo kwenywe mala musili busa ne njala. Ndekeresie mala mukhole niko mboola, ne mulalia siakhulia silayi khukhila bioosi.

³ “Rekeeresia luno baandu base mala mwiche, ne khemwiche mala mulaba ne bulamu! Ese ndakhola endakaano eya buli lwosi ne nanywe, mala muelesie chikhabi nicho nasuubisia Daudi.

⁴Ese namukhola khuuba omwimeelesi lundi komanda owe chikholo, ne khubira mu niye ese nabekesia bunyali bwase.

⁵Luno ewe okhalange chikholo chingeni, anyumao se bakhumanya bele tawe, ne kakhali luno chilakhwichakho ne chitima! Ese, Wele Omunyali Owa Bioosi, Wele wowo, Wele Omutakatifu owa Isiraeli, ndakhola kano koosi kakholekhe, khakhuelesie ewe lukoosi ne fuma.”

⁶Kobola khu Wele Omunyali Owa Bioosi mala mumusabe ne asiili siimbi.

⁷Lekha bamayaanu balekhe engila yabwe eye limenya mala bakaluukhasie lilibaasia liabwe. Khe bakobole khu Wele Omunyali Owa Bioosi, Wele wefwe ali owe siisa lundi ali khangu khubeela.

⁸Wele Omunyali Owa Bioosi aboola ali, “Kamebaasio kase se kali nga kakenywe tawe, ne chingila chase chabukhana ne chichenywe.

⁹Nga likulu ne lili angaaki khukhwama khu sibala, bili birio, chingila ne kamebaasio kase khukhila kakenywe.

¹⁰ “Likhuwa liase lili nga ebarafu ne efula, bibiichanga asi khukhwama mungaaki bisanya liloba. Bikholanga biakhulia bichoa, mala birusia bumiicho khulwe khumiicha ne biakhulia bie khulia.

¹¹Nio akhaba liliba lirio likhuwa liase nilio ndomaloma, se lilikhilwa khukhola nilio nalirekekhera tawe, lilikhola buli sisiindu nisio naliruma khukhola.

¹²Mulirekukha murure mu Babiloni ne khoyo, muli rangirirwa murure mu lukoba luboofu ne kumuleembe, Bikulu ne chingulu bilirakikha khukhwimba, ne kimirongooro kiliyokela khulwe khoyo.

¹³Kimirongooro sayipurasi kilichoa niio luno embululwe eli, bisaala bie kamasaafu kamakali bilamela abuundu e kamawa. Lino lilaba simanyisio silabao buli lwosi, siikhebusia niko ese Wele Omunyali Owa Bioosi nakhola.”