Read lubukusu Isa. 56 Bible Online

Isa. 56 - lubukusu bible

Isa. 56

¹Wele Omunyali Owa Bioosi aboolela babaandu bewe ali, “Khemukhole kang'ali ne kamaluungi, sikila siise sikeekhe siri mulabona buonia bwase bulecha, ne bulekhuule bulabonekha.

²Ndabiita chikhabi abo bamanyanga e Sabato, mala se bakirumikhiranga bubi tawe. Ndabiita chikhabi abo bakhakholanga bumayaanu tawe.”

³Omukeni owaambaana ne babaandu ba Wele Omunyali Owa Bioosi akhaboola ali, “Wele Omunyali Owa Bioosi sakhafukiilile ese saaye alala ne babaandu bewe tawe.” Ne omundu niye balata akhebaasiakho ali sikila sanyala anyoola babaana tawe, namwe aba mulala khu baandu ba Wele tawe.

⁴Wele Omunyali Owa Bioosi aboolela omundu nga oyo ali, “Ewe waaba ne umba ese lukoosi khulwe khuloleelesia e Sabato, ne waaba nokhola ka kasiimisia ese ne mu busuubilifu noliinda endakaano yase,

⁵aba lisina liowo lilakhebulilwa mu Lukaangu lwase, ne mu baandu base khulwe siise sileeyi khukhila nga abele noba ne basoleeli ne bakhaana. Ewe solibililwa tawe.”

⁶Ne Wele Omunyali Owa Bioosi aboolela bakeni baliba balala khu baandu bewe, babamusiima ne khumukholela, baloleelesianga e Sabato mala mu busuubilifu baliinda endakaano yewe ali,

⁷“Ese khakhureere e Sayuni, sikulu siase sitakatifu, muelesie enywe ekhoyo munju yase eye lisaba, mala fukiilile embosio niyo muaana khu alutare yase. Lukaangu lwase lulalaangwa, enju eye lisaba khu baandu be chikholo choosi.”

⁸Omwami WELE oreerire babaandu bewe ba Isiraeli khukhwama mu mbaambe, alakilisie khurera babaandu babaandi khuba alala nabo.

⁹Wele Omunyali Owa Bioosi aboolele chikholo chingeni chiche nga chisolo, mala chilie babaandu bewe.

¹⁰Aboola ali, “Barangirisi boosi babenyekha bakaambile babaandu base bali babofu! Se bamanyile siindu tawe. Bali busa nga embwa eliindanga amuliango ekhasamanga tawe, khukona khwong'ene ne khuroora. Basiima busa khukona.

¹¹Bali busa nga chimbwa chilia lukali ne se chikura tawe. Barangirisi bano se bali ne limanya tawe. Buli mulala akhola busa nga niye omwene nasiimisibwa, mala ayiima bukhala bwewe omwene.

¹²Bameesi bano baboola bali, ‘Khekhunyoole endali, mala khunywe koosi niko khunyala khwanywa. Mutikhinyi khukhabe bulayi khukhila endaalo yino.’ ”