Read lubukusu Isa. 57 Bible Online

Isa. 57 - lubukusu bible

Isa. 57

¹Babaandu balayi bafwa, ne se aliio obukulamo lukeendo tawe, ne kakhali bafwa nio bumayaanu bukhabanyoola tawe.

²Abo bamenyanga limenya lilayi, banyoolanga kumuleembe ne siuluukho mu lifwa.

³Khemwiche ano mukhalakilwe enywe bamayaanu. Enywe se muli balayi khukhila balakusi, bakhobani, ne baeeyi tawe.

⁴Naanu niye enywe mukholela embelekeu? Enywe babeyi, mulachekheelelanga nanu?

⁵Enywe musaaya ba wele be lisaaye khulwe khukhola bueeyi asi we kimirongooro kienywe kimitakatifu ekio. Muaana babaana benywe nga chimbosio mu mabina siimbi ne sinoko sie luluuchi.

⁶Mubukulayo kamabaale kamamiufu mala mukasaaya nga wele benywe. Mukachukhakho endali nga siaanwa sie khunywa, mala mukareerera biakhulia nga biturwa. Enywe mwibaasia muli ese sangaalila kano koosi ku?

⁷Enywe mucha khu bikulu bileeyi khuana embosio mala mukhola bueeyi.

⁸Mura bifwaani bimayaanu mwenya bueeyi mukari alwiki wenywe. Munjanjukha ese mufuula chingubo chenywe, mala muniina khu bitaanda bienywe bibalaayi ne basiime benywe, nibo muruunganga nio mukona nabo. Ne abwenao mumala liliekoomba lienywe.

⁹Mwebakha kamafura kaunya bulayi ne kamafura kakaandi, mala mucha khusaaya wele Moleki. Khunyoola bawele be khusaaya muruma barumwa aleeyi lukali, akhaba emakoombe.

¹⁰Mweluya mwabeene khuyiima bawele babaandi, ne se mulekha khuyiima tawe. Enywe mwibaasia mu bifwaani bienywe bimayaanu bilamuelesia kamaani, ne se mulua tawe.

¹¹Wele Omunyali Owa Bioosi areeba ali, “Bawele sina bano bamukhola enywe muba ne buuri, nio mumboolele ese bubeeyi ne khu khunjibilila elala? Enywe mwalekhile khukhumbelesia ese lukoosi sikila nasila busa siise sileeyi?

¹²Mwibaasia muli niko mukholanga kali kamaluungi, ne kakhali ese ndabakala kimiima kienywe, ne bifwaani bienywe se bilanyala khumuyeeta tawe.

¹³Nga ne mulila khulwe buyeeti, lekha bifwaani bienywe ebio bimuonie! Lifuua lie kumuya ne luucho kulabisuta kuche nabio! Ne kakhali abo basuubila mwise balamenya, mu sibala mala balasaaya mu Lukaangu lwase.”

¹⁴Wele Omunyali Owa Bioosi aboola ali, “Lekha babaandu base bangobolele. Rusiayo buli siindu sikhiingilila engila yabwe! Senjula engila, mala mukirekekhe.”

¹⁵“Ese ndi Wele we angaaki lundi omutakatifu, oliio mindali na mindali. Ese menyanga abuundu angaaki lundi atakatifu, ne akhaba lundi menyanga ne babaandu bali baolu lundi banyala bekanila, nio ese mbakoboselia lisuubila ne lilieyikina.

¹⁶Ese naelesia babaandu base bulamu, ne se ndachiililila khubasitaka, namwe mbaambile lirima buli lwosi tawe.

¹⁷Nabaambila lirima sikila bumayaanu bwabwe ne bulianga, khwako nabaukuuma ne khubanjukha. Ne kakhali baba bareengu ne khuchiililila ne chingila chabwe chimbi echo.

¹⁸“Ese naboone nga bakholile, kakhaba kario ndabaonia. Khabaraangirire ne khubayeeta, ne khaoleelesie abo balila.

¹⁹ Mbaelesia boosi kumuleembe, sitube bali siimbi nende bali aleeyi! Ese khaonie babaandu base.

²⁰Babaandu bamayaanu bali nga enyanja eye bibuli ekhaolanga tawe, niyo bibuli biayo bikhakama khusiubulakha tawe, bireera bunyaalu ne siina eye kamasisie,

²¹ Wele Omunyali Owa Bioosi aboola ali, ‘Kumuleembe se kuliio khu baandu bamayaanu tawe.’ ”