Read lubukusu Isa. 58 Bible Online

Isa. 58 - lubukusu bible

Isa. 58

¹Wele Omunyali Owa Bioosi aboola ali, “Yokela lukali, nga ne onyala! Boolela babaandu base Isiraeli bumayaanu bwabwe.

²Basaayanga ese buli ndaalo, betacha bali, bali ne silukuluku khumanya chingila chase ne khufukiilila kamalaka kase. Baboola bali benya ese mbae kamalaka kang'ali nio basangaale nga banjesaaya ese.”

³Babaandu bareeba bali, “Siina sikila efwe khweyimane khulia, kaaba bali Wele Omunyali Owa Bioosi se abonamo siindu tawe? Siina sikila efwe khweyimane khulia, aaba niye nakhabukulamo lukeendo tawe?” Wele Omunyali Owa Bioosi ababoolela ali, “Bung'ali buli buri asiise sie khukhweyimana, mutima khunyoola bukhala bwenywe ne khumiina bakholi benywe.

⁴Lilieyimana lienywe limukhola muba ne sisiayuumba ne khulomana ne khukhupana. Enywe mwibaasia muli lilieyimana nga lino liri linyala liakhola ese narekeeresia lisaba lienywe ku?

⁵Lino nilio lilieyimana nilio ndobora? Endaalo yo mundu khukhweyimana ku? Lili khukhwinamia kumurwe kwewe nga sisele? Ne khuura chingubo che kamakunia khwikokhe ku? Mulanga lino muli lilieyimana? Ne ndaalo niyo Wele Omunyali Owa Bioosi afukiilila ku?

⁶“Lino se lili lilieyimana nilio ese ndobora? Ne khukangulula kiminyololo kie bumayaanu, ne khukangulula bitorobo, ne khulekhuula babamiinwa bache, ne khufunaka buli lichooki tawe ku?

⁷ Se khuli khulia siakhulia ne nabo bali njala? Ne khureera bakhali ne engo munju yowo, nobona oli sichula, mufware, ne okhekisa khu baandu bowo tawe.

⁸“Nio busiime bwase khwiwe bulakhosia nga enyanga eye kumutikhinyi, ne kamakoonjo kowo kalaona khangu. Ese ndaba ne nawe buli lwosi khukhuonia, khubao khwase khulakhukhiinga buli lubeka.

⁹Ne usaba ndakhukobosia. Nga ne unaanga ndafukiilila. Waaba ne wakamia limiina, mu buli sikholwa sie sileka, ne buli likhuwa limayaanu,

¹⁰waaba noana siakhulia khu bali ne njala ne khukhwikusia lilienya lie babapisibwa sibi, nio buwaanga bowo bulakhosia mu siilima, ne sisiilima siowo silaba nga enyanga mwiangilwe.

¹¹Ne buli lwoosi khakhuraangirire mala khwikusie ne bibiindu bilayi. Ndakhuliinda obe ne kamaani lundi obe omulamu. Okhabe nga kumukuunda kulimo kameechi kamakali, nga emoni eye kameechi ekhateenyanga tawe.

¹²Babaandu bowo lundi bakhombakhe mu makuunda kamakhale, bombakhe lundi khu misiingi kimikhale. Mulimanyikha nga babaandu babombakha lundi kamasiisi, babesiao chinju chichaba ne chatechulwa.”

¹³Wele Omunyali Owa Bioosi aboola ali, “Waaba ne okhola e sabato nga endakatifu, ne se oyiima ke bukhala bwowo endaalo eyo tawe, waaba nobona oli endaalo yase eli endakatifu, mala okielesie lukoosi khulwe khulekha khucha chingeendo, khukhola kimilimo, namwe khukhupa embakha ya busa khu ndaalo eyo,

¹⁴nio ewe olanyoola ekhoyo eyaama mu khukholela ese. Ese ndakhukhola obe ne lukoosi mu sibala sioosi, mala olekhoyela sibala nisio ese naelesia kukaao Yakobo. Ese Wele Omunyali Owa Bioosi nalomaloome.”