Read lubukusu Isa. 59 Bible Online

Isa. 59 - lubukusu bible

Isa. 59

¹Lola kumukhono kwa Wele Omunyali Owa Bioosi se kuli kumwimbi khuonia tawe, namwe liiru liewe se lili limiinyi bali se liiulila tawe.

²Ne kakhali bumayaanu bwenywe bwamukabukhaanie, ne Wele wenywe, ne bumayaanu bwenywe bwakisile bubweeni bwewe, nio se nyala khuulila tawe.

³Sikila kamakhono kenywe kanyaalutisiibwe ne sifuki, ne chinjala chenywe ne bumayaanu, ne kiminwa kienywe kialomile bubeeyi, ne chinimi chenywe chimoonya bumayaanu.

⁴Se aliio ositaka mu bung'ali tawe, se aliio ocha mu siina mu buluungi tawe, beyama ke bubeeyi, baloma ke bubeeyi, barekekha kamabi ne bareera bumayaanu.

⁵Baalusia kamaki ka nafwo, banaba buusi bwe lububi, oyo olia kamaki kacho afwa, mu liki liliatiikhe endemu yamamo.

⁶Ne buusi bwe chimbubi se bularumikhwa nga chingubo tawe, babaandu se balebiimba nibio bakhola ebio tawe. Kimilimo kiabwe kili kie bumayaanu, ne bikholwa biabwe bie sisiayuumba bili mumakhono kabwe.

⁷ Ne bikele biabwe biabeele khangu khucha mu bumayaanu, ne bali khangu khuchukha sifuki sia busa, kamebaasio kabwe kali ke bumayaanu, lilianjukhwa ne libuna lili mungila chabwe.

⁸Engila eye kumuleembe se bakimanyile tawe, ne bung'ali se bulikho khu ngila chabwe tawe. Bakoyanisie chingila chabwe, se aliio ochilakho oba ne kumuleembe tawe.

⁹Khwako bung'ali buli aleeyi khukhwama khwifwe, ne buluungi se buli ne nafwe tawe, khuyiima buwaanga, ne lola sisiilima, khwenya khubone buwaanga ne khukeenda mu siilima.

¹⁰Khuabasia khwisiisi nga babofu, khuabasia nga bakhali ne chimoni tawe, khwetuya kumuusi nga mu silo. Mu balamu khuli nga bafu.

¹¹Khuulukhuma oli kamanani, khwelisialisia oli kamauusi, khuyiima bung'ali ne kakhali se buliio tawe, khuyiima buonia ne kakhali buli aleeyi.

¹²Sikila bumayaanu bwefwe bwatasiikhe ebweeni wowo, bumayaanu bwefwe buli buloli khu fwabene. Sikila bumayaanu bwefwe ne nafwe, ne kamakhiikha kefwe khukamanyile.

¹³Khukhola kamamayaanu ne khukhwekaana Wele Omunyali Owa Bioosi, ne khulekha khuloonda Wele, khulomaloma bumiini ne khuuba bareengu, khukanakana ne khuloma ke bubeeyi ke mu mwoyo.

¹⁴Bung'ali bulobwa, ne buluungi buli sinaao, Bung'ali se buli mu siikhasio tawe, ne buluungi se bunyoolekhana tawe.

¹⁵Bung'ali se buliio tawe, oyo owilukha bumayaanu ekhola omusiku. Wele Omunyali Owa Bioosi abona lino, ne se liamusangaasia tawe, sikila bung'ali se bwabao tawe.

¹⁶ Abona ali, se aliio omundu yesi yesi tawe, auka ali se abao na mulala osoola tawe. Nio kumukhono kwewe omwene kwamureerera bukhili, ne buluungi bwewe bwamutinyilisia.

¹⁷ Alafwara bung'ali nga engabo ne kamaani ke bukhili nga ekofio eye sichuuma. Alefwara lilienya lie khuluungisia bibiindu, ne khunyaasia, ne khukhweyaacha khu makhiikha niko babaandu banyoola.

¹⁸Akhaukuume basiku bewe khuloondekhana nende niko bakholile, bakhaba abo bamenyile mu bibala bie aleeyi.

¹⁹Khukhwama ebukwe khucha mumbo buli mundu alamuria ne bunyali bwewe bukali. Aliicha nga luluuchi lubisia lukali, nga ekhuungu eye kamaani.

²⁰ Wele Omunyali Owa Bioosi aboolela babaandu bewe ali, “Ese kheche e Yerusalemu, khumubabila enywe ne khumuonia enywe mweesi mumwarura mu bumayaanu bwenywe.

²¹Ne ese ndikhola endakaano ne nanywe. Ese namueleesie enywe bunyali bwase ne kamekisio kase bibe bibienywe buli lwosi, ne khukhwama luno enywe mulandia ese ne khukhwekisia babaana benywe ne lisaaye lienywe khu khundia ese khulwe siise siosi sisiicha.”