Read lubukusu Isa. 6 Bible Online

Isa. 6 - lubukusu bible

Isa. 6

¹ Mu mwiiko nikwo omwami Usia afwilakho, nabona Omwami Wele. Aba ekhaale khu ndebe yewe eye bubwami, angaaki mala aniinisiibwe angaaki, ne ngubo yewe yamasiisie mu Lukaangu lwoosi.

²Bibuumbe bie chimemu biaba biamwimileo biamubotookheleele, buli silala khu nibio siaba ne chindaa sita. Buli sibuumbe siafuunikha mu moni mwasio ne chindaa chibili, ne siafuunikha kumubili kwasio ne chindaa chibili, mala siarumikhira chichiindi chibili khupurukha.

³ Bialangana buli sia silala bili, “Omutakatifu, Omutakatifu, Omutakatifu! Wele Omunyali Owa Bioosi owe kamae ke mwikulu ali omutakatifu! Luyali lwewe lwechula sibala.”

⁴ Liiuliilikha lie kimimilo kiabio liakhola kumusiingi kwe Lukaangu kwaterema mala Lukaangu lulwene lwechulamo liliisi.

⁵Ese naloma ndi, “Ese silaamo sianyoola! Sikila ndi omutibi, buli nilio ndoma lili limayaanu ne namenya akari we bamayaanu mala, ese naboone Omwami, Wele Omunyali Owa Bioosi owe kamae ne chimoni chase!”

⁶Nio silala khu bibuumbe bie chimemu siapurukha siekha asi niio ese ndi, siasutiile lilianda lilising'eng'ile mukhono nilio siabukulila luani khukhwama khu alutare.

⁷Nio siandiisia lilianda lilising'eeng'ile elio khu minwa kiase mala siaboola sili, “Lino lietiilile khu minwa kiowo ne luno bumayaanu bwowo bwarurireo mala bumayaanu bwowo bwabeleelwe.”

⁸Nio naulila Omwami ne aloma ali, “Ese ndaruma naanu? Naanu olaba omurumwa wefwe?” Ese nakobosia ndi, “Ese ndi ano, ndume ese!”

⁹ Nio aloma ali, “Cha oboolele babaandu bano burume buno. ‘Enywe mwakhaba ne murekeeresia muriena, se mulaulila tawe. Mwakhaba ne muloleelela muriena, se mulamanya silikho siikholekha tawe.’ ”

¹⁰Nio amboolela ali, “Khola babaandu bano balendaale, minyaasia kamaru kabwe ne khu bofusia chimoni chabwe, nio bakhabona, baulila namwe bamanya tawe. Bakhola bario bangobolela mala nabaonia.”

¹¹Ese nareeba ndi, “Omwami lilabukula siise sina?” Angobosia ali, “Khukhwola nga chingoba chitechulwe chekela kamakubili ne khukhwanjukhwa, chiliba busa khwasie mundumo tawe, khukhwola nga sibala silianjukhwa sisiimbe busa.

¹²Ese ndayila babaandu aleeyi mala khole sibala sioosi sianjukhwe busa ao.

¹³Akhaba omundu mulala khu baandu ekhumi narama mu sibala, niye yesi alabuna, alaba nga sichikhi sie kumukhoonge.” Sichikhi siakwo siliba nga lumiicho lutakatifu.