Read lubukusu Isa. 60 Bible Online

Isa. 60 - lubukusu bible

Isa. 60

¹Yinyokha, Yerusalemu mala okhosie nga enyanga. Luyali lwa Wele Omunyali Owa Bioosi lulikho lukhukhosiakho.

²Ne chikholo chichiindi chilafuunikhwa ne sisiilima. Ne kakhali buwaanga bwa Wele Omunyali Owa Bioosi bulakhukhosiakho, ne luyali lwa Wele Omunyali Owa Bioosi lulaba ne nanywe.

³Chikholo chikheche mu buwaanga bwowo. Ne babaami bakheche mu buwaanga nga enyanga ne likho esoa.

⁴Lola chimbeka choosi niio oli ao, mala obone sina silikho siekholekha. Babaandu bowo balikho bebuusia alala beche engo! Basoleeli bowo balama aleeyi. Ne bakhaana bowo balamemwa nga babaana.

⁵Olabona kano mala wichule ekhoyo, olaterema khulwe khukhweulila bulayi, sikila kimiaandu kie chikholo kilareerwa khwiwe khukhwama engelekha we nyanja, buiinda bwabwe bulecha.

⁶Kamatuuli ke chingamia kakheche khukhwama Midiani ne Efa. Babaandu bakheche khukhwama Sheba, ne bareera esahabu ne biiunya bulayi. Babaandu bakhaboole kamalayi khu niko Wele Omunyali Owa Bioosi akholile!

⁷Kamakheese koosi ke Kedari ne Nabaloti kakhareerwe khwiwe nga chimbosio. Ne khukaana khu alutare atakatifu khusiimisia Wele Omunyali Owa Bioosi, Wele Omunyali Owa Bioosi akhakhole Lukaangu lwewe lube lwe luyali lukali khukhila siise sisiabira.

⁸Meeli siina chitima khangu oli kamaleesi chino? Oli kamauusi kaloota?

⁹Sikila bibala bie sia nyanja bilaniinda, chimeeli cha Tarishishi chilanyoa, khureera babaana benywe khukhwana aleeyi, baleecha ne fwesa ne sahabu yabwe, khuelesia lukoosi lisina lia Wele Omunyali Owa Bioosi, Wele Omutakatifu owa Isiraeli okholile chikholo choosi chielesie babaandu bewe lukoosi.

¹⁰Wele Omunyali Owa Bioosi aboolela Yerusalemu ali, “Baakwa baliombakha lundi kamasiisi kowo, lundi babaami babwe balikhukholela, mu lirima liase nakhuukuuma, ne luno ndakhwekesia buyeeti ne siisa siase.

¹¹ Kumuusi ne silo bilibwa biowo biliba khwasie, nio babaami be chikholo bole khukhureerera ewe kimiaandu kiabwe.

¹²Ne kakhali chikholo chikhakhukholela ewe kimilimo tawe, chilonakilwa elala.

¹³Kimirongooro kia miberoshi, chunipa ne sayipurasi, kimirongooro kimikwalaafu kie kumusiru kwa Lebanoni, kilareerwa kiombakhilwe lundi Yerusalemu, khumiliyisia Lukaangu lwase khukhola lukoba lwase luboofu lube lwe luyali.

¹⁴ Be lisaaye babakhupia ewe sibi balecha mala bename asi khukhwekesia buriaani bwabwe. Abo boosi khaale babakhulekelesia ewe balasaaya mu bikele biowo, Bakhakhulange bali, ‘Lukoba luboofu lwa Wele Omunyali Owa Bioosi,’ ‘Sayuni, lukoba lwo Mutakatifu owa Isiraeli.’

¹⁵Lundi ewe solianjukhwa ne khubiilwa na akeekhe ene tawe, Lukoba luboofu lulwanjukhwa ne khuuywamo. Ese ndakhukaliya ne khukhukhola obe owe lukoondo lulayi, abuundu we khoyo buli lwosi.

¹⁶Chikholo ne babaami balikhuliinda bulayi. Nga maayi nalelanga omwana wewe. Olimanya oli ese Wele Omunyali Owa Bioosi nakhuonisie, oli Wele we kamaani owa Isiraeli akhulekhuula.

¹⁷Khakhureerere esahabu mu bweyaangu bwe kumukasa, mu bweyaangu bwe sichuuma, khakhureerere efwesa, mu bweyaangu bwe kimirongooro, khakhureerere kumukasa. Ne mu bweyaangu bwe kamabaale ndakhureerera sichuuma khakhole kumuleembe kukhwamiie, mala buluungi bube omuruki wowo,

¹⁸Liiuliilikha lie sisiayuumba se liliuliilikhana lundi tawe, libuna se lilikwa mu sibala siowo lundi tawe. Ndikhubabila ne khukhuliinda ewe nga lisiisi, owe oliifumia sikila nakhuonia.

¹⁹ Enyanga se liba lundi buwaanga bwowo kumuusi, namwe kumwesi se kuliba buwaanga bwowo silo tawe, ne kakhali Wele Omunyali Owa Bioosi aliba buwaanga bwowo bwa buli lwosi. Ne Wele wowo aliba luyali lwowo.

²⁰Chindaalo chowo che bubeeleli chiliola khu siakamo. Ese Wele Omunyali Owa Bioosi ndaba buwaanga bwowo bwa buli lwosi. Buyiindila khukhila enyanga ne kumwesi.

²¹Babaandu bowo baliba baluungi, baliba ne kamaloba buli lwosi, kumurombo nikwo ese samwene nabiaala, kimilimo kie kamakhono kase, nio mbelesibwe luyali.

²²Akhaba bakhabalikha tawe bakhekhole ekholo, ne endiiti lukali ebe ekholo eye kamaani. Ese ndi Wele Omunyali Owa Bioosi mu biise biayo khakhole khangu.”