Read lubukusu Isa. 61 Bible Online

Isa. 61 - lubukusu bible

Isa. 61

¹ Roho wo Mwami WELE ali khwise, sikila Wele Omunyali Owa Bioosi anjukhilekho kamafura khurera Elomo Endayi khu bataambi, ne khuoleelesia be bubeeleli mu miooyo, khulangilila bulekhuule khu baambe, ne khulekhuula abo bali mu siboe.

² Andumire khulangilila. Bali siise siolile, nisio Wele Omunyali Owa Bioosi alionisiliamo babaandu bewe, mala akhile basiku bewe. Andumire ese khuoleelesia abo boosi balila.

³Khuelesia abo balila mu Sayuni, ekhoyo ne busangaafu mu bweyaangu bwe bubeeleli, kumwenya kwe fuma mu bweyaangu bwe bubeeleli. Balaba nga kimirongooro nikio Wele Omunyali Owa Bioosi omwene abialile. Boosi balikhola kali kamaluungi mala Wele alifumisibwa khu niko akholile.

⁴Baliombakha chingoba chimboofu chi chatechulwa.

⁵Babaandu base, baakwa balimukholela enywe, baliaaya kamakheese kenywe, balime ne khuliinda kimikuunda kienywe kie kimisabibu.

⁶Mala enywe mulimanyikhana nga basaayi ba Wele Omunyali Owa Bioosi, bakholi ba Wele wefwe. Enywe muliekhoyela kimiaandu kie chikholo, ne khukhwibonia muli kili kikienywe.

⁷Chisoni chenywe ne changalaalo biakaame, mukhamenye mu sibala sienywe mwabene, ne kimiaandu kienywe kikhatasikhe, ekhoyo yenywe eliba buli lwosi.

⁸Wele Omunyali Owa Bioosi aboola ali, “Ese nasiima bung'ali, ne nabiila bumiinikhi ne kamakhiikha, Ese mu busuubili ndaana kumuruuru khu baandu base, mala khole endakaano eya mindali.

⁹Be lisaaye liabwe balimanyikha mu chikholo chosi, ne babaana babwe mu chikholo, boosi babona balibamanya bali bali ekholo niio Wele abiita chikhabi.”

¹⁰ Ndekhoya lukali mu Wele Omunyali Owa Bioosi, kumwoyo kwase kulekhoya lukali mu Wele wase, sikila afwarire engubo eye buonia, ambimbile ne ngubo eye buluungi, nga owe siselelo ne efwarire liua liewe, lundi nga omwea ne efwarire kamamili kewe.

¹¹Nga sibala ne sirusia bimelwa biasio, ne kumukuunda kurusia bimiichwa, kario Omwami WELE alakhola buluungi ne efuma, khukhwicha ebweeni we chikholo choosi.