Read lubukusu Isa. 62 Bible Online

Isa. 62 - lubukusu bible

Isa. 62

¹Ese khalomalome khutinyilisia Yerusalemu, se ndasila tawe, khukhwola nga lulaonisibwa. Ne buonia bwalwo bulakhosia nga siiuna mu siilima.

²Yerusalemu, chikholo chikhakhubone ewe noli owe bukhili! Babaami babwe boosi bakhabone luyali lwowo. Okhalangwe lisina liya, lisina lilieebwa ne Wele Omunyali Owa Bioosi omwene.

³Okhabe ekuutwa eye lukoondo mukhono mwa Wele Omunyali Owa Bioosi, ekuutwa eye bubwami mukhono mwa Wele wowo.

⁴Solilaangwa lundi bali “Nabulobe” tawe, namwe sibala siowo silangwe, “Omukhasi Nabulobe tawe.” Lisina liowo liya likhabe bali “Wele amusangaalile.” Sibala siowo sikhalangwe “Nabukelema,” sikila Wele Omunyali Owa Bioosi asangaasibwe ne nawe, mala alaba nga omuseecha owe sibala siowo.

⁵Nga omusoleeli nabeya omukhaana owe yabwana. Oyo owakhubumba alakhubeya. Nga owo mwea asiimisibwa no mwea wewe, nio Wele wowo alasiimisibwa nawe.

⁶Khu masiisi kowo Yerusalemu, ese narereekho baliindi, bakhecha basila busa kumuusi namwe silo tawe. Khukhwola bakhebusie Wele Omunyali Owa Bioosi ke lisuubisia liewe, ne bakhamulekha aliibilila tawe.

⁷Bakhamuakho siiuluukho tawe nabwila ombakha Yerusalemu, mala alukhole lukoba luboofu nilwo sibala sioosi sifumia.

⁸Wele Omunyali Owa Bioosi echuba elala ne kumukhono kwewe kumuseecha ne bunyali bwewe ali, “Se khabukule lundi engaanu yowo mbelesie basiku benywe nga siakhulia siabwe tawe. Ne baakwa se bakhanywe endali yowo niyo mukholile tawe.

⁹Ne ewe owamiicha ne khufuna kamaindi okhalie, mala ofumie Wele Omunyali Owa Bioosi. Enywe mumwaka ne khufuna chisabibu, mulanywa endali mu luuya lwe Lukaangu lwase.”

¹⁰Babaandu ba Yerusalemu rura enje we lukoba, mala musenjule kumuyila khulwe babaandu benywe balikho ne bakobola! Rekekha kumuyila kumuboofu, rusiakho kamabaale! Rakho simanyisio nio chikholo chimanye.

¹¹ Bali Wele Omunyali Owa Bioosi alikho alaangilila khu sibala sioosi ali, “Boolela babaandu ba Yerusalemu oli Wele Omunyali Owa Bioosi alikho echa khumuonia enywe, alikho echa ne babaandu nibo aonisie.”

¹²Enywe mulalaangwa bali, “Babaandu ba Wele batakatifu.” “Babaandu nibo Wele Omunyali Owa Bioosi aonia.” Yerusalemu lulilaangwa bali, “Lukoba nilwo Wele asiima,” “Lukoba nilwo Wele akhalekha tawe.”