Read lubukusu Isa. 63 Bible Online

Isa. 63 - lubukusu bible

Isa. 63

¹ “Naanu olechanga khukhwama mu lukoba lwa Bosira mu Edomu yuno? Naanu owifwarire bulayi mu ngubo embesemu, olikho nakeenda mu bunyali ne kamaani oyo?” “Ndi Wele Omunyali Owa Bioosi oli ne bunyali bwe khuonia, ndikho nicha khulangilila bukhili bwase.”

²“Siina sikila chingubo chewe ne chirobeereere, chimbesemu nga cho mundu osuuranga chisabibu khung'oona endali?”

³ Wele Omunyali Owa Bioosi akobosia ali, “Ese naswalakilila chikholo nga osuura chisabibu, ne se aliio owecha khukhunjeeta tawe. Nabaswalakilila mu lirima liase, mala chingubo chase choosi cheakhile kamafuki kabwe.

⁴Nakhalaka ndi siise sie khuonia babaandu base siolile, sili siise sie khuukuuma basiku babwe.

⁵ Nauka nga ne khaabona omundu ounjeeta tawe. Ne kakhali lirima liase liamba kamaani, mala nanyoola bukhili samwene.

⁶Mu lirima liase naswalakilila chikholo choosi nachibunia. Nachukha sifuki siabwe khu sibala.”

⁷Ese khaboole ke busiime bwa Wele Omunyali Owa Bioosi bukhaliwao tawe. Ndamufumia khu bioosi nibio akhukholele efwe. Abiiitile chikhabi chingali khu babaandu ba Isiraeli sikila siisa siewe ne busiime bwa buli lwosi.

⁸Wele Omunyali Owa Bioosi aboola ali, “Bali babaandu base se balimbea tawe.” Ne khwako abaonia

⁹khukhwama mu butinyu bwabwe bwoosi. Se aba malaika tawe ne kakhali aba Wele omwene owabaonia. Mu busiime ne siisa siewe abareesia. Abaliindanga buli lwosi,

¹⁰ne kakhali baba bareengu khu niye mala babelesia Roho Omutakatifu. Khwako Wele Omunyali Owa Bioosi ekela omusiku wabwe mala abapa.

¹¹Nio, bakhebulila kakabira, ke chindaalo cha Musa, omukholi wa Wele Omunyali Owa Bioosi, mala bareebana bali, “Wele Omunyali Owa Bioosi luno ali waena, owaonia barangirisi be babaandu bewe khukhwama mu nyanja? Wele Omunyali Owa Bioosi owaelesia Musa Roho wewe ali waena?

¹² Owaruma kumukhono kwewe kwe bunyali khuba mu mukhono kwa Musa kumuseecha, owakabukhaniamo enyanja mu moni chabwe khukhwielesia lukoosi buli lwosi.

¹³Naanu owabarangirira mu nyanja?” Nga efarasi mu siangalaamwe, se betuyakho tawe.

¹⁴Nga chikhaafu ne chiicha mu litooma. Roho owa Wele Omunyali Owa Bioosi abaelesia siuluukho. Khwako ewe warangirira babaandu bowo, khukhwielesia wamwene lisina lie luyali.

¹⁵Wele Omunyali Owa Bioosi, khulolele khukhwama mwikulu, niio ewe omenyile mu butakatifu ne luyali lwowo, bukali bwowo bwe khukhwibaasia efwe buli waena? Bunyali bwowo buli waena? Busiime ne siisa siowo bili wae? Okhakhulekha tawe.

¹⁶Ewe oli Paapa, Bakuuka befwe Aburahamu ne Yakobo se bakhufukiilila efwe tawe, ne kakhali ewe Wele Omunyali Owa Bioosi oli Paapa, oyo okhuonianga efwe busiele.

¹⁷Sikila siina ewe nokhulekha efwe khwaukhe khu ngila chowo, sikila siina ewe nokhukhola efwe khuba be siikhanyilisia mala khulekhe khu khuria tawe? Kobola sikila abo bakhukholelanga ewe, khulwe babaandu babechanga babowo buli busiele.

¹⁸Efwe, babaandu bowo batakatifu, khwatimanisibwa ne basiku befwe khu siise sikeekhe, baswalakilila abutakatifu wowo.

¹⁹Wakhukhola busa efwe oli ewe okhaaba Omwami wefwe tawe, nga khukhaaba babaandu bowo tawe.