Read lubukusu Isa. 64 Bible Online

Isa. 64 - lubukusu bible

Isa. 64

¹Siina sikila ewe nokhatabula likulu mala wekha asi? Bikulu andi bilakhubona mala bitereme mu buri.

²Andi bilaterema nga kameechi ne kasela. Khewiche mala wekesie bunyali bwowo khu basiku bowo, mala okhole chikholo chitereme ebweeni wowo.

³Siise siabao nisio ewe wechelakho mala wakhola bibiindu bie khuriisia, nibio khukhebaasia khuli bilabaao tawe, bikulu biakhubona mala biaterema sikila buuri.

⁴ Se aliio omundu owabona, namwe aulila khu Wele nga ewe tawe, okholanga bikholwa nga ebio khwaabo babara lilieyikina liabwe mu niye.

⁵Ewe wakanilanga abo babekhoyela khukhola kali kamaluungi, abo bakhebulila nga ewe ne wenya bamenye. Ewe wakhuambila efwe lirima, ne kakhaba kario efwe khwachiililila busa khukhola bumayaanu, akhaba mu lirima liowo likali efwe khwachiililila busa khukhola kamabi khukhwama khale.

⁶Efwe fweesi khwabeele bamayaanu, akhaba bikholwa biefwe bilayi khukhila, bili binyaalu khubiriirira. Sikila bumayaanu bwefwe, efwe khuli busa nga kamasaafu kaniaala ne kauchibwa ne khuungu.

⁷Se aliio omundu okhusaba ewe tawe, se aliio omundu na mulala owicha khwiwe khulwe buyeeti tawe. Ewe wekisile khukhwama khwifwe, mala wakhwanjukhe sikila bumayaanu bwefwe.

⁸Ee Wele Omunyali Owa Bioosi, ne kakhali ewe oli Paapa wefwe. Efwe khuli liloba ne ewe oli omubuumbi. Efwe fweesi khuli kumulimo kwe kamakhono kowo.

⁹Ee Wele Omunyali Owa Bioosi okhaba ne lirima likali tawe, mala okhakhebulila bumayaanu bwefwe buli lwosi tawe. Lola, yibaasia, oli fweesi khuli babaandu bowo.

¹⁰Chingoba chowo chindakatifu chabeele sichiimi, Sayuni lwabeele sichiimi, ne Yerusalemu lwanjuukhwe,

¹¹Chinju chefwe chindayi ne chindakatifu, niio bakuuka befwe bakhufumisilianga, chosebwe ne kumulilo. Ne abuundu wefwe alayi ekholile kamakuunda.

¹²Ee Wele Omunyali Owa Bioosi se olefwilisiakho mu biindu bino tawe ku? Olasila busa mala okhupie sibi orio?