Read lubukusu Isa. 65 Bible Online

Isa. 65 - lubukusu bible

Isa. 65

¹ Wele Omunyali Owa Bioosi aboola ali, Naba nerekekha khuyiimwa ne naabo, bakhasaba tawe, nerekekha khunyoolwa ne naabo bakhambiima tawe. Naloma ndi, “Ese ndi ano,” Khukholo ekhasaba tawe.

² Nakololosia kamakhono kase endaalo yoosi khu baandu barengu, bakeenda mu ngila ekhali endayi tawe, khuloondelela kakabwe kamene,

³ekholo eyinjiyakasiakho buli lwosi, ne khuaana chimbosio mu mikuunda, ne khukhwosia biiunya bulayi khu alutare che bakhamanyile Wele tawe.

⁴Oli siilo bacha mu mabina ne mu biliindwa mu khureeba bimakoombe. Balia enyama eye ngurwe. Banywa kumuunyu kung'ooniilwe khukhwama mu nyama eanilwe, mu mbosio che bakhamanyile Wele tawe.

⁵Ne baboolela baandu bali, “Ba aleeyi nafwe, efwe khuli batakatifu lukali khwinywe khukhutilakho.” Ese se nyala khukhwikhaliilikhila babaandu nga bano bario tawe, lirima liase khu nibo lili nga kumulilo kukhasimanga tawe.

⁶“Ese nabisia khale siiukuumo siabwe, mala likhalakilwa liabwe liaandikwa. Ese se ndalekelesia niko bakholile tawe, ne kakhali ndabaruunga

⁷khulwe bumayaanu bwabwe ne khulwe bumayaanu bwe bakuukawabwe. Boosia biiunya bulayi khu bikulu bitakatifu bie bakhamanyile Wele tawe, mala baloma kamamayaanu khwise. Khwako khabaukuume nga bikholwa biabwe bibiabira ne bikhoyela.”

⁸Wele Omunyali Owa Bioosi aboola ali, “Se aliio omundu owonaka chisabibu chindayi tawe, ne kakhali bachikoyangamo endali. Namwe ese se khabunie babaandu base boosi tawe, khaonie abo babakholelanga ese.

⁹Khabiite chikhabi Baisiraeli be kholo eya Yuda, ne lisaaye liabwe lilinyoola kumukabwa kwe kamaloba ke mu bikulu. Babaandu base barobore, babakholelanga ese balimenyayo.

¹⁰ Sharoni lukhabe kamayilwe ke kiminyele, ne litooma lia Achori libe niio chikhaafu chiolela che babaandu base babambenja.

¹¹“Ne kakhali kakhabukhane khwinywe mumwandoba ese, mumwalekelesia Sayuni, lukulu lwase lutakatifu, mala musaaya Kadi ne Meni, bawele be khabi ne likhalaka.

¹²Liliba likhalaka liowo khufwa lifwa lie sisiayuumba, sikila se wafukiilila nga ese ne nakhulaanga, namwe se warekeeresia nga ese ne nalomaloma tawe. Ewe warobora khukhundeka ese ne khukhola kamabi.”

¹³Khwako Omwami WELE aloma ali, “Lola, bakholi base balilia, ne kakhali enywe muliba ne njala, lola bakholi base balinywa, ne kakhali enywe muliba ne bulesia, Lola bakholi base baliekhoya, ne kakhali enywe muliambwa chisoni.

¹⁴Lola, bakholi base bakhembe khulwe busangaafu mu miooyo, ne kakhali olilila khulwe buchuuni bwe kumwoyo, ne oliesasaara mu burafu bwe kumwoyo.

¹⁵Babaandu base barobore bakharumikhire lisina lienywe nga silaamo. Ese Omwami WELE khamwire enywe. Ne khaane lisina liya khu bakholi base.

¹⁶Yesi yesi mu sibala osaba chikhabi alasaba abiitwe ne Wele Omweyikinwa. Yesi yesi owichuba, alechubila mu lisina lia Wele Omweyikinwa. Butinyu bubwabaao bulachila elala ne khukhwibililwa.”

¹⁷ Wele Omunyali Owa Bioosi aboola ali, “Ese ndikho mbaang'ana sibala siiya ne likulu liiya. Bikholwa bie khale bilebililwa elala.

¹⁸Sangaala ne khukhwekhoya buli lwosi mu niko ese mbaang'ana. Yerusalemu luuya nilwo ese ng'oona lulechula ekhoyo ne babaandu balwo balasangaala.

¹⁹ Ese samwene ndechula ekhoyo, sikila Yerusalemu ne babaandu balwo. Bililo se bilibamo tawe, khulaanga buyeeti se khulibamo tawe.

²⁰Babaana se balifwa lundi ne bali batoro tawe, ne babaandu boosi balamenya limenya lie bulamu bwabwe. Omundu ne afwa owe kimiiko emia, alebaasibwa khuuba omuele. Ne ne afwa kimiiko ekio ne kikhola tawe, alebaasibwa khuuba owe silaamo.

²¹Babaandu balombakha chinju mala bamenyemo, bakhabiaale kimisabibu mala balie chisabibu chayo.

²²Se baliombakha mala babaandi bamenyemo tawe. Se balibiaala mala babaandi balie kamatuunda tawe. Nga kimirongooro, babaandu base balamenya bulamu buleeyi. Bakhekhoyele elala mu bwichufu kimilimo kie kamakhono kabwe.

²³Se balikhola kimilimo kia busa tawe, namwe se balisaala babaana khukhupwa sibi tawe, sikila baliba lisaaye liliabiitwa chikhabi ne Wele Omunyali Owa Bioosi, ne babaana babwe.

²⁴Ne bakhasaba tawe khabakobosie, ne basilomaloma khabaulile.

²⁵ Bisuuche ne kamameeme biliayila alala, chitalang'i chililia bunyaasi nga chikhaafu, ne lufuumbi luliba siakhulia sie ndemu. Se bikhaumisie namwe bionakake mu lukulu lwase lutakatifu tawe.”