Read lubukusu Isa. 66 Bible Online

Isa. 66 - lubukusu bible

Isa. 66

¹ Wele Omunyali Owa Bioosi aboola ali, “Likulu muli endebe yase eye bubwami, ne sibala sili endebe niyo ese swalakho. Nono enju lukano siina niyo enywe mulanjombakhila ese, abuundu alukano siina niio ese mbulukhila?

²Wele Omunyali Owa Bioosi aboola ali, bibiindu bino bioosi kumukhono kwase kwabikhola. Khwako bibiindu bino bioosi bili bibiase. Ne kakhali yuno ali omundu niye khabonemo. Ali oweboombia ne kumwoyo kwe khukhwekanila, ne khuria likhuwa liase.

³“Oyo okhoonya ekhaafu ali nga owira omundu, oyo oaana limeeme nga embosio, ali busa nga ofunile embwa likosi, oyo oaana biturwa bie siakhulia ali busa nga oaana kamalasile ke ngurwe, oyo oaana siianwa sie likhebulila siunya bulayi ali busa nga oyo osaba sifwaani. Abano barobora chingila chabwe babene, ne kimiooyo kiabwe kisangaalila bumayaanu bwabwe.

⁴Sesi khabaroborere butinyu, mala mbareerere nisio baria, sikila nga nalaanga se aliio owangobosia tawe, nga ne nalomaloma se aliio owarekeeresia tawe. Ne kakhali bakhola kamamayaanu ebweeni wase, mala barobora likhasangaasia tawe.”

⁵Rekeeresia Elomo ya Wele Omunyali Owa Bioosi, enywe muria likhuwa liewe. “Balebe benywe babamubiila, ne khumwekaana khulwe lisina liase, balomile bali, ‘Lekha Wele Omunyali Owa Bioosi aelesibwe luyali nio efwe khubone ekhoyo yenywe,’ ne kakhali niibo bakhaambwe chisoni.

⁶Rekeeresia, luyoka khukhwama mu lukoba luboofu! Kumumilo kwama mu Lukaangu! Kumumilo kwa Wele Omunyali Owa Bioosi, aruungia basiku bewe kakenyibwa.

⁷ “Omukhasi nakhalumwa tawe asaala, buchuuni ne bukhamwichakho tawe asaala omwana omusoleeli.

⁸Naanu owaulila khu siindu sirio? Naanu owabonakho kano? Sibala sinyala siasaalwa mu ndaalo ndala? Ekholo enyala yasaalwa mu siise silala? Nga Sayuni ne anja khulumwa, asaala babaana bewe basoleeli.”

⁹Wele Omunyali Owa Bioosi areeba ali, “Nyala nareera babaandu base ambi khusaalwa, mala mbalekhe balobe khusaalwa?” Wele wowo areeba ali, “Ese okila ne basaala nyala nekala lusaaye?”

¹⁰“Khemwekhoye ne Yerusalemu khemumusangaalile, enywe mweesi mumwamusiima, yekhoya ne naye, enywe mweesi mumulila,

¹¹nio munuune mala mwikure, ne kamaturu kewe kaoleelesia, nio munywe lukali mu busangaafu, khukhwama mu bukali bwe luyali lwewe.”

¹²Wele Omunyali Owa Bioosi aboola ali, “Lola Ese ndamutasa kimiaandu nga luluuchi, ne kimiaandu kie chikholo nga luluuchi lulwichuule. Mukhanuune mala mumemwe khu mukoongo khwewe ne khusunia omwana khu bikele.

¹³Nga niye maawe aoleelesia ndamuoleelesia, mukhaolelesebwe mu Yerusalemu.

¹⁴Mukhabone mala kimiooyo kienywe kiekhoye, kamakuumba kenywe kakhabe kamalayi nga bunyaasi, ne likhamanyikhane bali kumukhono kwa Wele Omunyali Owa Bioosi kuli ne bakholi bewe, ne lirima liewe lili khu basiku bewe.”

¹⁵Lola “Wele Omunyali Owa Bioosi akheechele mu mulilo, ne kamakaari kewe nga embembeesi, ne khukhwekesia lirima liewe mu bukhalafu, ne lirafua liewe nga chinjaso che kumulilo.

¹⁶Ne kumulilo Wele Omunyali Owa Bioosi akhabisie likhala, ne mbalu yewe khu baandu boosi, naabo baberwa ne Wele Omunyali Owa Bioosi baliba bakali.”

¹⁷Wele Omunyali Owa Bioosi aboola ali, “Abo babetakaasa, ne khukhwekwalaasia babene khucha mu mikuunda, ne baloondanekho, ne khulia enyama eye ngurwe ne namuchunjusi, ne biakhulia bibiindi binyaalu, boosi bakhabune.

¹⁸Sikila namanya kimilimo ne kamebaasio kabwe, ne ndikho nicha khubusia chikholo choosi alala, ne bakheche mala babone luyali lwase,

¹⁹mala khareo simanyisio akari wabwe khukhwama mu nibo kharume babarama mu kholo, khucha Tarishishi, Puti ne Luti, balasa buyiingo khucha Tubali ne Yafani, ne khu biaala bie sia nyanja aleeyi bikhaulilakho efuma namwe babona luyali lwase tawe, ne bakhafumie luyali lwase mu kholo ng'enecho.

²⁰Ne bakhareere balebe benywe khukhwama mu kholo choosi nga siianwa khu Wele Omunyali Owa Bioosi, khu farasi, mu makaari, mu korokocho ne khu nyumbu, khu ngamia khucha Yerusalemu khu sikulu siase sitakatifu, nga Baisiraeli ne bareera siianwa sie siakhulia mu siindu similiiu munju ya Wele Omunyali Owa Bioosi.

²¹Wele Omunyali Owa Bioosi aboola ali ndabukula balala khwaabo babe basaayi ne balawi.”

²² Wele Omunyali Owa Bioosi aboola ali, “Likulu liya ne sibala siyia, nibio khakhole bikharame ebweeni wase, kaliba kario khu lisaaye ne lisina liowo.

²³Wele Omunyali Owa Bioosi aboola ali, ‘Khukhwama khu mwesi kumuyia khukhwola khu kuundi, ne khukhwama khu sabato khukhwola khu kiindi, babaandu boosi balicha khukhusaba ese.’

²⁴ “Ne balicha buli abuundu ne babona kimibili kie bafu, ba baaba barengu khwise, chinyeende chabwe se chilifwa tawe, ne kumulilo kwabwe se kulisimisibwa tawe, baliba bubolo khu baandu boosi.”