Read lubukusu Isa. 7 Bible Online

Isa. 7 - lubukusu bible

Isa. 7

¹ Mu ndaalo nicho omwami Ahasi okhwa Yosamu omwichukhulu Usia amiilamo Yuda, Reseni omwami owa Siria ne Peka, okhwa Ramalia omwami owa Isiraeli, baseelusia liie bapane ne lukoba lwa Yerusalemu, ne se banyala khu luupa tawe.

²Nga Ahasi omwami owa Yuda ne baulila bali Siria baambaanile ne Efuraimu besiindukha kimiooyo, baba ne buuri bukali alala ne babaandu babwe besisiikha busa nga kimirongooro kie mu musiru nikio ekhuungu euucha.

³Nio Wele Omunyali Owa Bioosi aboolela Isaya ali, “Ewe cha, no mwana wowo Sheari-yashubu mwakaanane no mwami Ahasi. Mulamunyoola khu miila ambi niio baasonanga chingubo bekhalanga khundulo khwe kumutaaro kuureeranga kameechi khukhwama mu litiisi lie ngaaki.

⁴Mala omuboolele oli yerekekha, otiile kumwoyo, okharia tawe, lundi okhafwa kumwoyo sikila lirima lio mwami Reseni ne Basiria bewe nende lio mwami Peka se lili lundi lie basiku khukhila liliisi liliama khu bichikhi bibili bibising'eeng'ela mu mulilo kalaa.

⁵Sikila Siria ne Efuraimu ne okhwa Ramalia bekhochochile bakholile ekwangwaani embi khwiwe ne khuloma bali,

⁶lekha khuche khwibwaakale Yuda khulurikhirisie, lekha khuluule lube lulwefwe mala khwamiie omwana owa Tabeeli abe omwami akari walwo.”

⁷Omwami WELE aboola ali, “Lino se lilabao tawe, ne se lilakholekha tawe.

⁸Sikila kamaani ka Siria kali Damasika, kamaani ka Damasika kali Reseni. (Mu siise sie kimiiko kie kamakhumi sita na kiraano Efuraimu ekhamalwe kamaani mala se liba lundi ekholo tawe.)

⁹Ne kamaani ka Efuraimu kali Samaria. Ne kamaani ka Samaria kali omwami Peka okhwa Ramalia. Ne enywe barangirisi ba Yuda, mwaba ne mukhasuubila, ng'ali buyeeti bwenywe bulawao.”

¹⁰Lundi Wele Omunyali Owa Bioosi aruma burume bubuundi khu mwami Ahasi naboola ali,

¹¹“Reeba Wele Omunyali Owa Bioosi, Wele wowo, simanyisio siakhaba ne sili asi nga emakoombe namwe angaaki nga mwikulu.”

¹²Ne Ahasi akobosia ali, “Ese sendareeba simanyisio tawe, mala se ndakhaka Wele Omunyali Owa Bioosi tawe.”

¹³Khwilio Isaya akobosia ali, “Ee enju eya Daudi rekeeresia! Mwakholile busa sisiindu sitiiti khunaania babaandu lundi mwenya khunaania ne Wele wase yesi?

¹⁴ Khwako Omwami omwene alakhuelesia simanyisio. Lola omukhaana owe yabwana alaesia mala asaale omwana omusoleeli ne olimutiuukha oli, ‘Emanueli’

¹⁵Nga naliba nachoile oole khumanya bumayaanu ne bulayi, alilia libonda ne bubuukhi.

¹⁶Sikila ebweeni omwana chana oyo ne akhamanya nga naloba bumayaanu ne khurobora bulayi tawe, bibala bia Isiraeli ne Siria nibio ewe oriire bilianjukhwa.

¹⁷“Wele Omunyali Owa Bioosi alikho acha khukhureerera ewe ne khu baandu bowo ne be nju eye bubwami yoosi chindaalo che butinyu bukhabaakhoo khukhwama mu ndaalo nicho bubwami bwa Isiraeli bwaukhila khukhwama khu Yuda tawe. Alikho acha khureera omwami owa Ashuru khu baapa.”

¹⁸Mu ndaalo eyo Wele Omunyali Owa Bioosi alipa kumulusi asakule Bamisiri beche nga chiisi khukhwama aleeyi niio luluuchi lwa Naili lwakabukhanilamo chisakia ne lundi alisakula Baashuru beche khukhwama mu sibala siabwe nga enjukhi.

¹⁹Mala boosi baliicha bamaasie mu matooma, mu mabina ke chinyaanda ne mu bichakha bie kamawa ne khu mayilwe koosi.

²⁰Mu ndaalo eyo Wele Omunyali Owa Bioosi aliamisia omubeki khukhwama engelekha we luluuchi lwa Efurati omwami owe Baashuru eche ne lubeko amubeke enywe lichuune, kamaswa ke khu bikele akhaba ne bunwanwa bwosi.

²¹Mu ndaalo eyo omubayi alirama ne khaafu ndala ne kamakheese kabili,

²²ne sikila bukali bwe kamabeele niko chilikhamwa, alilia libonda lie kamabeele, sikila buli mundu oolirama mu sibala alilia libonda ne bubuukhi.

²³Mu ndaalo eyo buli abuundu niio liruuti lie kimisabibu liaba, kimisabibu kikioolaana bukusi bwe fwesa eelefu ndala, liruuti lienelio liliikela embululwe ne kamawa.

²⁴Babaandu balibanula buyiingo ne buembo bache baayeyo, sikila sibala sioosi silifunikhwa ne mbululwe ne kamawa.

²⁵Ne bikulu bioosi nibio balimanga solichayo tawe, sikila oliria embululwe ne kamawa. Ne kakhali aliba abuundu e khukhwaya chikhaafu ne kamakheese.