Read lubukusu Isa. 8 Bible Online

Isa. 8 - lubukusu bible

Isa. 8

¹Nio Wele Omunyali Owa Bioosi amboolela ali, “Bukula sisiindu sie khuandikakho siboofu mala oandikekho chinyukuta chimboofu, oli, ‘Reka Khangu Nuula Khangu.’

²Bukula babaandu babili babeyiikinwa, omusaayi Uria, ne Sakaria okhwa Yeberekia babe baloli bowo.”

³Nio naaba no mukhasi wase omung'oosi, aesia mala asaala omwana owe seecha. Ne Wele Omunyali Owa Bioosi amboolela ali, “Mutiuukhe lisina oli, ‘Reka Khangu Nuula Khangu.’

⁴Sikila omwana oyo nakhachoa amanya khulaanga ali, Paapa namwe maayi tawe, kimiaandu kia Damasika ne biyayilwe mu Samaria, bikhabukulwe ebweni lwo mwami owa Ashuru mala bache ne nabio.”

⁵Wele Omunyali Owa Bioosi andomalomakho lundi.

⁶Aloma ali, “Sikila babaandu bano balobile kameechi ke khakhechi kha Shiloa kakeekha busa kalaa, mala baterema ebweeni wo mwami Reseni no mwami Peka,

⁷khwako, lola Wele Omunyali Owa Bioosi alareera omwami owa Ashuru ne banamae bewe boosi khukhwibwaakala Yuda. Balaba busa oli luluuchi lwa Efurati ne lwichuule.

⁸Balimalaatana nga kumukhula kukwichuule buli sikiingi, baleeya mu Yuda nga kumukhula kukwichuule kumale buli siindu. Wele ali ne nafwe!” Alabambula chindaa chewe chiliinde sibala.

⁹Enywe chikholo yibuusia alala mu buri! Enywe bibala bie aleeyi rekeeresia banula mwirekekhe khukhupana mala mweboombie mu buri! Banula murekekha khukhupana mala mweboombie mu buri.

¹⁰Yerekekha! Ne se balakhola siindu tawe. Lomaloma elomo ne selaba ne bukhala tawe, sikila Wele ali ne nafwe.

¹¹Wele Omunyali Owa Bioosi angaania ne kumukhono kwewe ali okhaloonda chingila che babaandu bano tawe. Aloma ali,

¹² “Ewe okhaambaana ne babaandu bano mu kwangwaani yosi yosi niyo nibo balanga bali ekwangwaani tawe namwe mukharia nisio nibo baria tawe, namwe mukhaba mu khuterema tawe.

¹³Ne Wele Omunyali Owa Bioosi owe banamae niye mukhoyele mumanye muli ali Omutakatifu. Khabe niye muria lundi abe niye muteremera.

¹⁴ Ne ndiba bubwilukhilo lundi nga libaale nilio babaandu betuyakho, ese ndi nga kumureko kulitiila babaandu be bubwami bwa Yuda ne Isiraeli ne babaandu ba Yerusalemu.

¹⁵Bakali balituya balikwa bafunikhake. Bakhaambwe mala bayilwe mu mbaambe.”

¹⁶Enywe baloondi base, mukhoyeele mulinde lundi mube ne burume bwa Wele nibwo ambeele.

¹⁷ Ndalindiilila Wele Omunyali Owa Bioosi olikho okisa bubweeni bwewe khunju ya Yakobo. Ndara lilieyikina liase khu niye.

¹⁸ Lola ese ne babaana nibo Wele Omunyali Owa Bioosi ambeleesie bali simanyisio lundi sifwaani mu Isiraeli khukhwama khu Wele Omunyali Owa Bioosi owe banamae, omenyile khu sikulu sia Sayuni.

¹⁹Ne babaandu ne bakhuboolela bali, “Reeba bamakoombe, balosi, babeera kimimilo ne khumoonya,” Babaandu se benyekha bareebe wele wabwe tawe ku? Benyekha bareebe bafu khu ke balamu tawe ku?

²⁰Ewe bakobosie oli, “Rekeeresia niko Wele Omunyali Owa Bioosi alikho akhwekesia! Mukharekeeresia bimakoombe tawe niko bamuboolela se kalamuyeeta bulayi bwosi bwosi tawe.”

²¹Babaandu balibira mu sibala ne bafwiile kimiooyo ne bali ne bubeeleli, ne njala. Munjala yabwe ne lirima balilaama omwami wabwe ne bawele wabwe. Mala balikalama mungaaki,

²²namwe balilola asi ne se balibona sisiindu siosi siosi tawe ne bukhali butinyu ne sisiilima siriisia mu nisio balikho bayilwamo khu sibala.