Read lubukusu Isa. 9 Bible Online

Isa. 9 - lubukusu bible

Isa. 9

¹ Se elibao engila yosi yosi eye khukhwilukhilamo abo bali mu butinyu tawe. Mu siise sisiabira Wele areerera sibala sie kholo eya Sebuluni ne kholo eya Nafutali chisoni ne mu siise simaliilisi alireera lukoosi lukali mu bibala bino, khukhwama khu nyanja eya Shamu khukhwola sie ngelekha owa Yoritani, akhaba Kalilaya sisiene nisio baakwa bamenyilemo.

² Babaandu babakeendanga mu siilima baboone buwaanga bukali. Abo babamenyanga mu siilima sikali luno buwaanga bwabakhosiisiekho.

³Wele ewe wakuchiisie ekholo, ewe watasile liliekhoya liayo. Bekhoyela ebweeni wowo, nga liliekhoya lie likesa, nga babaandu ne bekhoya ne balikho ne bakabana nibio bayaayile mwiie.

⁴Sikila ewe wafunile lichooki liliabasitoela, alala nende esiimbo eyabaapa kamabeka, eyo mukuluumi wabwe. Ewe waulile ekholo eyananiaanga, ne khuyaaya bie babaandu bowo, bulayi bwene busa nga khale ne waula ekholo eye Bamidiani.

⁵Buli siraaro sia buli omunamae sisiarumikha mwiie, lundi buli engubo eyetuba kamafuki, biliya nga kamafura ke kumulilo.

⁶Mwifwe omwana asaalilwe! Khwaelesebwe omusoleeli, ne bubwami buliba khu mabeka kewe, ne lisina liewe lililaangwa bali, “Omukaambisi owe Khuukia,” “Wele Wanyala Bioosi,” “Paapa owa Mindali,” “Omwami owe Kumuleembe.”

⁷ Bunyali bwe bubwami bwewe ne kumuleembe se biliba ne sisiakamo tawe. Alikobola khu bwami bwa Daudi, ne bunyali bwewe buliba bwe bung'ali ne buluungi, khukhwama luno mala bubeeo mindali na mindali. Silukuluku sia Wele Omunyali Owa Bioosi Owe kamae ke mwikulu nisio silikhola kano koosi.

⁸Wele Omunyali Owa Bioosi arumire bukhalaki khu Yakobo, mala bukhabe khu Isiraeli.

⁹Ne babaandu boosi balibumanya, Efuraimu ne bamenyile mu Samaria. Baalomela mu khweniinia ne mu busilu bwe kumwoyo bali,

¹⁰“Chinju che kamatifari chakwiile, ne efwe khukhakobosieo che kamabaale kamabeeche. Bisiindi bie kimikhuyu biaremirwe, ne efwe khukhakobosieo bie kumutarakwa biangafu.”

¹¹Nono Wele Omunyali Owa Bioosi arera basiku ba Reseni babebwaakale, mala aachilisia basiku babwe.

¹²Baashuru khukhwama e bukwe ne Bafilisiti khukhwama mumbo, basame kiminwa kiabwe bamile Isiraeli. Kakhaba kario lirima lia Wele Omunyali Owa Bioosi likhoola khu siakamo tawe, ne asibekesielela kumukhono khubaa kumunaanio.

¹³Babaandu se bakobolela oyo owabapa tawe. Namwe Wele Omunyali Owa Bioosi owe banamae tawe.

¹⁴Nono mundaalo ndala Wele Omunyali Owa Bioosi alapia siibi Isiraeli, ne barangirisi basio, ne babaandu basio, alarema kumurwe ne kumukhiinga kwayo.

¹⁵Omusaakhulu owe lukoosi ali kumurwe, ne omung'oosi owekisianga bubeeyi ali kumukhiinga!

¹⁶Sikila abo babarangirira babaandu bano, babatiimia mala babakoyaanisilia elala.

¹⁷Khwako Wele Omunyali Owa Bioosi se alasangaalila baele babwe tawe, ne se alakholela bafuubi ne banamulekhwa siisa tawe, sikila buli mulala ali omumayaanu lundi akhola kamabi, ne buli sisiindu nisio baloma sili sie busilu. Khukano koosi, lirima lia Wele Omunyali Owa Bioosi se liakamao tawe, ne asibekesielela kumukhono kwewe.

¹⁸Sikila bubi bwoselela nga kumulilo, bwosia embululwe ne kamawa, buambia bichakha ne kumusiru, mala liliisi liabio lieulukusa mungaaki.

¹⁹Sikila lirima lia Wele Omunyali Owa Bioosi owe banamae, sibala siosiibwe, ne babaandu bali nga chiikhu che kumulilo. Se aliio na mulala okholela wandaaye siisa tawe.

²⁰Buli abuundu mu sibala, babaandu balanuula ne khulia buli sitonyi sie siakhulia nisio banyala banyoola, ne se bekura tawe. Bakhalia babaana babwe babene se balekura tawe.

²¹Babaandu ba Manase ne babaandu ba Efuraimu balebwaakalana, ne enyuma boombi balebwaakala Yuda. Mala khulwe kano koosi, lirima lia Wele Omunyali Owa Bioosi se liakamao tawe, asibekesielela busa kumukhono kwewe.