Read lubukusu Bal. 10 Bible Online

Bal. 10 - lubukusu bible

Bal. 10

¹Ba okhwa Aruni, Natabu ne Abihu, buli mulala abukula lucho lwe khukhwanjala kumulilo, mala barakho kumulilo ne biiunya bulayi. Baana khu Wele Omunyali Owa Bioosi kumulilo kukhaba kumutakatifu tawe. Sikila Wele Omunyali Owa Bioosi beele se abalaka khukhola khurio tawe.

²Kumulilo kwama khu Wele Omunyali Owa Bioosi mala kwosia Natabu ne Abihu bafwila ebweeni wewe.

³Nio Musa aboolela Aruni ali, “Kano niko Wele Omunyali Owa Bioosi aba nako nga aloma ali, boosi babakholela khukhwola barie butakatifu bwase. Khoya naelesebwa luyali ne babaandu boosi.” Ne kakhali Aruni asila busa.

⁴Musa alanga Mishaeli ne Elisafani, ba okhwa Usieli raraawe owa Aruni omuro, mala ababoolela ali, “Khe mwiche ano, mala musute kimilaambo kie bawandaayenywe mukirusie mu liiema litakatifu mala mukire enje we kambi.”

⁵Nio becha mala bakisuta bakirusia enje we kambi mungoba chabwe, nga Musa ne abalaka.

⁶Ne Musa aboolela Aruni ne babaana bewe Eliesa ne Itamari ali, “Mukhalekha khuchanua lichuune lienywe, namwe mwatabula chingubo chenywe tawe. Mukhola murio mwafwa, namwe lirima lia Wele Omunyali Owa Bioosi liekha khu baandu boosi. Ne kakhali balebe benywe be nju eye Baisiraeli yoosi, efukiililwa khusooma abo nibo Wele Omunyali Owa Bioosi abuniisie ne kumulilo.

⁷Mukharura amuliango we liiema lie kumuse tawe, mukhola murio mwafwa. Sikila enywe mwaroborwa mwarebwa alubeka, khulwe khuchukhwakho kamafura ka Wele Omunyali Owa Bioosi.” Nio bakhola nga Musa ne ababoolela.

⁸Wele Omunyali Owa Bioosi aboolela Aruni ali,

⁹“Ewe ne babaana bowo mukhanywakho endali namwe kamalwa tawe, mwaba ne mucha khukhwingila mwieema lie kumuse. Ne busa mwicha khufwa. Lino licha khuba lilaka khu be lisaaye liowo lioosi.

¹⁰Okhoya waukhasia akari we kamatakatifu ne karumikha busiele, akari we siikhali sitakaase tawe ne sitakaase.

¹¹Okhoya wekesie babaandu ba Isiraeli kamalaka koosi niko Wele Omunyali Owa Bioosi abaelesie khubirira khu Musa.”

¹² Musa aboolela Aruni ne basoleeli bewe ba baaba ne basikale, Eliesa ne Itamari ali, “Bukula biianwa bie biakhulia bisikaale khukhwama khu biakhulia bibiosie biaanilwe khu Wele Omunyali Owa Bioosi, biikhalimo limela tawe, mala muliile a alutare, sikila bili bitakatifu lukali.

¹³Liila Abuundu Atakatifu, sikila kuli kumukabwa kwowo ne babaana bowo khukhwama khu siianwa sie khukhwosia khu Wele Omunyali Owa Bioosi. Ako niko Wele Omunyali Owa Bioosi andaka khukhuboolela.

¹⁴ Ne kakhali ewe ne babaana bowo basoleeli ne bakhaana munyala mwalia sitindimilo nende sietakho abuundu osi osi akwalaafu. Sikila biaanilwe nga kumukabwa kwowo ne babaana bowo, khukhwama khu mbosio che biianwa bie kimileembe bie babaandu ba Isiraeli.

¹⁵Ne sietakho ne sitindimilo bikhoya biareerwa ne bitonyi bie kiminaawa kikiaanwa nga biianwa biboofu bibiosie ebweeni wa Wele Omunyali Owa Bioosi. Kuno kuli kumukabwa kwowo ne babaana bowo mindali na mindali, nga Wele Omunyali Owa Bioosi ne alaka.”

¹⁶Musa areeba ke mbusi eye siianwa sirusiao bubwoni mala anyoola bali yosibwe khale. Lino liamukhola aambila lirima Eliesa ne Itamari ba okhwa Aruni babarama. Abareeba ali,

¹⁷ “Siina sikila ne mukhaliliile siianwa sirusiao bubwoni abuundu atakatifu? Sili sisiindu sitakatifu lukali. Ne lundi Wele Omunyali Owa Bioosi amuelesie enywe khulwe khurusiao bubwoni bwe sipupu sie babaandu bano ebweeni wa Wele Omunyali Owa Bioosi.

¹⁸Ne lola kamalasile kayo se kareerirwe mu kari mwe abuundu atakatifu tawe. Lundi mwenyekhe mukiilile Abuundu Atakatifu nga namulaka.”

¹⁹Aruni akobosia Musa ali, “Lola babaandu baanile biianwa biabwe birusiao bubwoni nende bie khukhwosia ebweeni wa Wele Omunyali Owa Bioosi. Ne kakhaba kario kamamayaanu kakholekhane khwise. Wibaasia oli Wele Omunyali Owa Bioosi akhafukiilile ese nalia siianwa sirusiao bubwoni luno ku?”

²⁰Nga Musa ne aulila lino asangaala.