Read lubukusu Bal. 11 Bible Online

Bal. 11 - lubukusu bible

Bal. 11

¹Wele Omunyali Owa Bioosi aboolela Musa ne Aruni ali,

²“Chino chili chisaang'i nicho mukhoyela khulia:

³mukhoya mwalia esaang'i eye bikhakayu bibiakabukhanamo ne lundi eyo enyanyanga ekamuula.

⁴Ne kakhaba kario, chiliio chisaang'i mwicho, chinyanyanga ekamuula namwe chichakabukhanamo bikhakayu nicho mukhakhoyela khulia tawe: Nga engamia, sikila enyanyanga ekamuula ne se eli ne bikhakayu bibiakabukhanamo tawe, eli enyaalu khwinywe.

⁵Ne bikoneelwa bie mu lwanda, sikila binyanyanga ekamuula ne se bili ne bikhakayu bibiabukhanamo tawe, bioosi bili binyaalu khwinywe.

⁶Ne enduuyu yosi, sikila enyanyanga ekamuulo ne se eli ne bikhakayu bibiabukhanamo tawe, eli enyaalu khwinywe.

⁷Ne ngurwe yoosi, mukhalia tawe, sikila enyanyanga ekamuula ne se eli ne bikhakayu bibiabukhanamo tawe, eli enyaalu khwinywe.

⁸Mukhalia chinyama che chisaang'i chino, lundi akhaba ne chifwiile mukhachitiilakho tawe, sikila chili chinyaalu khwinywe.

⁹“Munyala mwalia buli ng'eeni eli ne chindaa ne kamakakambu, eli mu nyanja ne muluuchi.

¹⁰Ne kakhali mukhalia sisiindu siosi siosi simenyile mu meechi siikhali ne chindaa ne kamakakambu tawe bili binyaalu khwinywe. Bioosi bikeendela mu meechi ne bimenyilemo bili binyaalu khwinywe.

¹¹Ne nga bibuumbe ebio ne bili binyaalu, mukhalia chinyama chabio namwe mukhabitilakho ne bifwiile tawe.

¹²Ne sisiindu siosi siosi simenyile mu meechi, mala se sili ne chindaa ne kamakakambu tawe sili siikhali sitakaase tawe.

¹³“Ne chino chili chinyuni chinyaalu nicho mukhakhoyela khulia tawe: Efuruusi, chetooto, engosia, namulobi,

¹⁴siruchu, ling'ang'a khuloondekhana ne lusio lwayo,

¹⁵buli khooro ne lusio lwakwo,

¹⁶enyeefwe, lubukabuka, liyoyo, kisilili khuloondekhana ne lusio lwakwo,

¹⁷Kusiikhiikhi, ling'ang'a, tenende,

¹⁸ne efutubile ne namuningie, ne khooro kutondoolwa,

¹⁹ne namukhooli, ne koikoi khuloondekhana ne lusio lwayo ne kwesule ne wambuuto.

²⁰“Bioosi bipurukha ne lundi bikeendela bikele bine bili binyaalu. Ne bie chindaa ne bikele bine se mulia tawe,

²¹ne kakhali ebio bisuna.

²²Munyala mwalia chisike, chisienene namwe kamatete khuloondekhana ne lusio lwako.

²³Ne kakhali bibiindu bibiindi bioosi bitiiti bipurukha ne akhaba bimoola bili binyaalu khwinywe.

²⁴“Yesi yesi otiila khu saang'i chino ne chifwiile salaba omutakaase tawe khukhwola ekolooba.

²⁵Ne yesi yesi otiila khu sifwiile, alasiinga chingubo chewe, mala salaba omutakaase tawe, khukhwola ekolooba.

²⁶Buli saang'i eli ne bikhakayu bibiabukhanamo mala se nyanyanga ekamuula tawe, eli enyaalu khwinywe. Ne buli omundu okitiilakho salaba omutakaase tawe.

²⁷Ne chisaang'i choosi chiili ne bikhumbu mala chikeendelanga bikele bine, chili chinyaalu khwinywe, ne yesi yesi ochetiilakho ne chifwiile salaba omutakaase tawe khukhwola ekolooba.

²⁸Ne yesi yesi ochitiilakho ne chifwiile alasiinga chingubo chewe mala salaba omutakaase tawe khukhwola ekolooba. Sechili chindakaase tawe.

²⁹“Ne biindu bibiekhuruurira asi bili binyaalu khwinywe. Akhaba biiu ne namuchunjusi, ne chimbakilia khuloondekhana ne lusio lwacho.

³⁰Namukhokhome, chikwena, chimbakilia, chimbulu, ne chikhaaniafu.

³¹Chino chili chinyaalu mu chosi chikeenda. Ne omundu yesi yesi ochitiilakho ne chifwiile salaba omutakaase tawe khukhwola ekolooba.

³²Ne khu siindu siosi siosi nisio chetiilakho ne chifwiile silaba siikhali sitakaase tawe. Lino lili khu siindu siosi siosi, sibele lukhu, engubo, lisielo namwe likunia, yakhaba sisiindu siosi siosi sirumikhwa, siikhoya siareebwa mu meechi. Ne kakhaba kario, silaba siikhali sitakaase tawe khukhwola ekolooba nio sibe sitakaase.

³³Ne yaba ne chifwiile mala chakwa munyuungu buli sisiindu silimo silaba siikhali sitakaase tawe, ne mukhoya mwaare enyuungu eyo.

³⁴Siakhulia siosi siosi sitekheelwe kameechi ako silaba siikhali sitakaase tawe. Akhaba kameechi ke khunywa kakama mu nyuungu omwo koosi kali kamanyaalu.

³⁵Sisiindu siosi siosi nisio siifu esio sietilakho sialaba siikhali sitakaase tawe. Ne akhaba ne kali kamayika kosi kosi namwe sibero kalatechulwa, kali kakhali kamatakaase khwiwe.

³⁶Ne kakhaba kario, esebele namwe liloo lie kameechi bilaba bikwalaafu. Ne kakhali yakhaba siosi siosi ne sietiila khu biifu sili siikhali sitakaase tawe.

³⁷Ne kaaba bali silala khu biifu sikwa khu bumiicho bucha khumiichwa, bumiicho obwo bulasikala busa bukwalaafu.

³⁸Ne kakhali bwaba bumiicho ne bwinikhwe mu meechi mala silala khu biifu siabwetiilakho, bumiicho obwo bulaba bunyaalu khwiwe.

³⁹“Yaaba esaang'i yosi yosi enyala yaliibwa nefwa, omundu yesi yesi okitiilakho salaba omutakaase tawe khukhwola ekolooba.

⁴⁰Ne omundu yesi yesi nalia enyama eye saang'i efu chana, akhoya asiinge chingubo chewe, ne kakhaba kario alaba asiili busa okhali omutakaase tawe khukhwola ekolooba. Ne yesi yesi osuta esaang'i efu khukhwola asiinge chingubo chewe, ne salaba omutakaase tawe khukhwola ekolooba.

⁴¹“Buli simoolela asi siosi siosi sili siikhali sitakaase tawe, ne se sikhoya sialiibwa tawe.

⁴²Ne akhaba bimoola asi namwe bikeenda ne bikele bine, namwe bie bikele bikali ne bimoolela asi, bioosi, mukhalia tawe, sikila bili binyaalu.

⁴³Mukhenyaalutia mwabene ne bibiindu bimoola bino tawe. Mukhola murio mwaba banyaalu.

⁴⁴ Ese ndi Omwami Wele wenywe, ne yetakaasa mwabene mala mube batakatifu, sikila ese ndi omutakatifu. Mukhenyaalutia mwabene nende bioosi bioosi bimoolela asi tawe.

⁴⁵Sikila ese ndi Wele Omunyali Owa Bioosi owamurusia enywe mu sibala sia Misiri nio mbe Wele wenywe, Mukhoya mube batakatifu sikila ese ndi omutakatifu.”

⁴⁶Nono lino lili lilaka khulwe chisaang'i, ne chinyuni, nende buli siindu sie bulamu siosi siosi sikeenda mu meechi namwe khu sibala.

⁴⁷Mukhoya mwaukhasie akari we sisiindu sitakaase ne siikhali sitakaase tawe ne siikhali sitakaase, akari we chisaang'i chichenyibwa khulibwa ne chikhenyibwa khulibwa tawe.