Read lubukusu Bal. 12 Bible Online

Bal. 12 - lubukusu bible

Bal. 12

¹Wele Omunyali Owa Bioosi aaboolela Musa ali,

²“Boolela babaandu ba Isiraeli oli, omukhasi nasaala omwana omusoleeli, alaba okhali omutakaase tawe khulwe chindaalo saba. Alaba okhali omutakaase tawe busa nga nabechanga mu ndaalo chewe chimbi.

³ Khu ndaalo ekhola munaane omwana alakhebwa.

⁴Khwako alamala chindaalo chichiindi kamakhumi kataru na chitaru nio abe omukwalaafu khuloondekhana ne kumwiima khulwe khutibia kamafuki. Omukhasi oyo se akhoyela khutiila khu siindu siosi siosi sili sitakatifu, namwe engila mu liiema litakatifu tawe, khukhwola nga siise siewe sie khukwalaasibwa ne siwela elala.

⁵“Ne asaala omwana omukhaana, se alaba omutakaase tawe khulwe kamachuuma kabili, nga nabechanga mu ndaalo chewe chimbi. Nono alamala chindaalo chichiindi kamakhumi sita ne chindaalo sita nio abe omukwalaafu khuloondekhana ne kumwiima kwe khutibia kamafuki.

⁶“Nga siise sie khukhwikwalaasia ne siwa, abele khulwe omwana omusoleeli namwe omukhaana, alareera limeeme lie bukhulu bwe kumwiiko mulala khu musaayi amuliango kwe liiema lie kumuse khulwe siianwa sie khukhwosia, namwe liuusi liliaana namwe libongobongo, khulwe siianwa sirusiao bubwoni.

⁷Omusaayi alasiiana ebweeni wa Wele Omunyali Owa Bioosi, mala akhole kumwiima kwe khurusiao bunyaalu bwo mukhasi oyo, mala alaba omukwalaafu. Kano niko omukhasi akhoya khu khola enyuma we khusaala.

⁸ “Aba omukhasi nakhanyala arusia limeeme tawe, alareera kamabongobongo kabili namwe kamauusi kamabaya kabili kamaana, lilala khulwe siianwa sie khukhwosia ne liliindi khulwe siianwa sirusiao bubwoni. Ne omusaayi alakhola kumwiima khurusiao bunyaalu bwo mukhasi oyo, mala alaba omukwalaafu.”