Read lubukusu Bal. 13 Bible Online

Bal. 13 - lubukusu bible

Bal. 13

¹Wele Omunyali Owa Bioosi aboolela Musa ne Aruni ali,

²“Aaba omundu yesi yesi nali ne kamakoonjo namwe kamabiimba namwe kamaboondo kanyala kekhola bulwaale bwe kamakele, akhoya areerwa khu Aruni omusaayi namwe mulala khu baana bewe basaayi.

³Omusaayi oyo alamenieelesia likoonjo lili khumubili kwewe. Ne yaba bufuumbo bwe abwenao bwaba ne bwekholile buwaanga, mala likoonjo liayabile lukali liekha khukhila siikhoba sisialibotookhelesia, aba buno buli bulwaale bwe kamakele nibwo. Ne omusaayi namalile khumenieelesia omundu oyo alamanyisia babaandu ali omundu yuno se ali omutakaase tawe.

⁴Ne kaaba bali likoonjo lili liwaanga mala se libonekha ne liyabile lukali khukhila siikhoba sisialibotookhelesia tawe, lundi bufuumbo se bwakaluukhane bwakwile buwaanga tawe, omusaayi alaula omundu oyo arure mu baandu abe yeng'ene khulwe chindaalo saba.

⁵Omusaayi alamumenieelesia lundi khu ndaalo eya saba, ne mumebaasio kewe aba likoonjo ne libonekhana nga liaba, mala se liabalaayile tawe, alamwaula, amurusie mu baandu khulwe chindaalo chichiindi saba.

⁶Omusaayi alamumenieelesia lundi khu ndaalo saba, ne liaba likoonjo ne lifulaafulane mala se liamalataane khu siikhoba tawe, omusaayi alamumanyisia khuba omukwalaafu, Aba lili likoonjo liong'ene. Omundu oyo alasiinga chingubo chewe mala abe omukwalaafu.

⁷“Ne kakhali likoonjo liaba ne limalatane enyuma wo musaayi khumumenieelesia ne khumulaanga ali, ali omukwalaafu, akhoya lundi abonekhe ebweeni wo musaayi.

⁸Omusaayi alamumenieelesia lundi, ne liaba ne limalatane mu siikhoba, alamulaanga khuba okhali omutakaase tawe. Buno aba buli bulwaale bwe siikhoba.

⁹“Omundu yesi yesi aaba nali ne bulwaale bwe kamakele, alareerwa khu musaayi.

¹⁰Omusaayi alamumenieelesia. Aba nali ne libiimba liwaanga khu mubili kwewe, likaluukhasie bufuumbo bwakwa buwaanga, lundi lili ne kamayila kamakali,

¹¹aba buli bulwaale bukhaona tawe. Ne omusaayi alamanyisia babaandu ali, omundu yuno se ali omutakaase tawe. Se amwaukhasia abe yeng'ene tawe, sikila kali busa abuwaanga bali ali okhali omutakaase tawe.

¹²Kaaba kamakele ne kamalatane kamala kumubili kwosi, khukhwama khu murwe khukhwola khu siikhandakilo khuloondekhana nga omusaayi nabona,

¹³omusaayi alamumenieelesia lundi, aba nanyoola ali kamakele kamalatane kumubili kwosi, alekesia omundu oyo khuba omukwalaafu. Siaba siikhoba siewe siosi ne sikaluukhane siakwa siwaanga, alaba omukwalaafu.

¹⁴Ne kakhali kaaba bali likoonjo liliindi liruriramo, omundu oyo aba se ali omutakaase tawe.

¹⁵Omusaayi alamumenieelesia lundi ne aba ne abona likoonjo lisising'eng'ile alamanyisia babaandu ali, akhatakaasibwa tawe. Likoonjo lilising'eng'ile lili linyala, sikila buli bulwaale bwe kamakele.

¹⁶Ne kakhali liaba likoonjo ne lioona mala awangia lundi, omundu oyo alacha khu musaayi.

¹⁷Omusaayi alamumenieelesia lundi. Liaba likoonjo ne likaluukhane liawangia, aba omusaayi alekesia babaandu ali, ali omutakaase.

¹⁸“Aaba omundu nali ne libiimba mala liaona,

¹⁹ne abuundu niio libiimba liaba khandu khawaanga namwe khabesemu khabonekha, akhoya acha eyekesia khu musaayi.

²⁰Omusaayi alamumenieelesia, ne yaba ne liyabile liekha khukhila siikhoba sisialibotookhelesia, mala kamaswa mu bwenomwo bwakaluukhane bwakwile buwaanga, omusaayi alekesia omundu oyo khuba nali okhali omutakaase tawe. Aba buli bulwaale bwe kamakele burakikhire mwibiimba.

²¹Ne aaba omusaayi namenieelesia mala anyoole ali kamaswa kalimo se kakaluukhane mala bwakwile buwaanga tawe, lundi liboondo se liayabile lukali khukhila siikhoba sisiabotookhelesiao tawe, ne kakhali awangie, omusaayi alamwaukhasia mu baandu abe yeng'ene khulwe chindaalo saba.

²²Liaba likoonjo ne limalatane khu siikhoba, omusaayi alekesia omundu oyo khuba okhetakaasile tawe Sikila ali ne bulwaale.

²³Ne liaba ne lisikala busa lirio ne likhamalatane tawe, aba eli embala busa eye libiimba. Ne omusaayi alekesia ali, ali omutakaase.

²⁴“Ne omundu aya kumulilo ne lubabia ne lukwa luwaanga namwe lubesemu,

²⁵omusaayi alamumenieelesia. Kaaba kamaswa ka abuundu ao ne kakaluukhane kakwa buwaanga mala abonekhana ayabile lukali, achile mukari khukhila siikhoba sisiabotookhelesiao aba kamakele niko. Aba karakikhile mumbala. Ne omusaayi alekesia ali, se ali omutakaase tawe. Buli bulwaale bwe kamakele.

²⁶Ne kakhali omusaayi alemenieelesiao mala kaaba bali kamaswa ke abwenao se kakaluukhane akwile awaanga tawe, ne se ayabile achile mukari khukhila siikhoba sisiabotookhelesiao tawe, ne kakhali alikho awaanga atiiti, omusaayi alamurusia mu baandu abe yeng'ene khulwe chindaalo saba.

²⁷Omusaayi alamumenieelesia lundi khu ndaalo eya saba. Ne aba ne lilikho limalatana khu siikhoba, aba buli bulwaale bwe kamakele, ne omusaayi alekesia ali, omundu oyo se ali omutakaase tawe.

²⁸Ne kakhali aba na asikale busa ario khukaluukhanakho tawe, namwe se alikho amalatana tawe, ali busa awaanga, aba se kali kamakele tawe. Omusaayi alekesia ali, ali omutakaase sikila lili busa likoonjo lie khuya kumulilo.

²⁹“Kaaba bali omundu owe siseecha namwe owe siikhasi ali ne liboondo khu murwe namwe khu silefu,

³⁰omusaayi alalimenieelesia. Liaba ne libonekha ne liyabile abuundu ao lukali khukhila siikhoba sisiabotookhelesiao, mala lichuune lie abuundu ao liarandaarire lundi lisaapuufu, aba kali kamakele niko, ne omusaayi alalanga omundu oyo ali, se ali omutakaase tawe.

³¹Ne aba oli omusaayi amumenieelesia, liboondo se libonekha khuba liyabile liacha mukari khukhila siikhoba sisiabotookhelesia abuundu ao tawe, ne kakhaba kario, khachuune khasili busa khasapufu, alaukhasibwa arure mu baandu abe yeng'ene khulwe chindaalo saba.

³²Omusaayi alamenieelesia liboondo elio lundi khu ndaalo eya saba. Ne liaba ne likhamalatana tawe, lundi khachuune kharandaafu akho se khalio tawe, lundi se abonekha nga ayabile acha mukari khukhila siikhoba sisiabotookhelesiao tawe,

³³omundu oyo alebekwa. Ne se bamubeka ekoonjo tawe. Omusaayi alamwaukhasia arure mu baandu abe yeng'ene khulwe chindaalo chichiindi saba.

³⁴Ne khu ndaalo eya saba, omusaayi alamenieelesia liboondo elio. Ne liaba ne likhamalatane tawe lundi se libonekha liayabile liacha mukari khukhila siikhoba sisiabotookhelesiao tawe, omusaayi alekesia ali, omundu oyo ali omutakaase. Omundu oyo alasiinga chingubo chewe mala alaba omutakaase,

³⁵Ne aba liboondo ne limalatane khu siikhoba enyuma we khumanyisibwa bali omutakaase,

³⁶omusaayi alamumenieelesia lundi. Liaba liboondo ne limalatane khu siikhoba, se enana khulola lichuune ne lirandarire tawe, omundu oyo aba ng'ali ali okhali omutakaase.

³⁷Ne kakhali omusaayi ne ebaasia ali liboondo se liamalataane tawe, lundi lichuune limali lilikho lichoa, abuundu ao aba na aonile, omusaayi alekesia ali, omundu oyo ali omutakaase.

³⁸“Aba omundu we siseecha namwe owe siikhasi nali ne abuundu awaanga khu siikhoba siewe,

³⁹omusaayi alamenieelesia omundu oyo. Aba abuundu ao nakhali awaanga lukali tawe, aba siindu sibi sili busa khu siikhoba, aba omundu oyo ali busa omutakaase.

⁴⁰“Lichuune lio mundu ne likhunyukha khumurwe alaba ne sisiole, ne kakhali alaba busa omutakaase.

⁴¹Ne lichuune lio mundu liaba ne likhunyukha khukhwamila khu meyelo, alaba ne sisiole, ne kakhali alaba busa omutakaase, sino se simukhola aba okhali omutakaase tawe.

⁴²Ne liaba liboondo libesemu-liwaanga ne libonekha mu siole aba buli bulwaale bwe kamakele.

⁴³Omusaayi alamumenieelesia. Ne liabao liboondo lie bubesemu ne buwaanga,

⁴⁴omusaayi alekesia ali, omundu oyo se ali omutakaase tawe, sikila bulwaale bwe kamakele buli khu murwe khwewe.

⁴⁵“Omundu oli ne kamakele akhoya afware bitabutabu, ne akhachanua lichuune liewe tawe. Akhoya abimbilile kumunwa kwewe naloma ali ‘Sendi omutakaase tawe, sendi omutakaase tawe!’

⁴⁶Kamakele ne kasiili khuona, alaba busa okhali omutakaase tawe ario. Akhoya amenye enje we kambi aleeyi khukhwama khu baandu babaandi.

⁴⁷“Kaaba bali engubo yapa lukukhu akhaba neli eye bufuumbo bwe likheese, eya katani,

⁴⁸eye silaka siosi siosi sia katani namwe sie buusi, namwe liaafu, namwe siindu siosi siosi sisiang'oonwa khukhwama khwiaafu,

⁴⁹kaaba bali lukukhu olwo luli lubookha namwe lurandaafu khu ngubo eyo, aba engubo eyo eli ne lukukhu mala yekesibwe omusaayi.

⁵⁰Omusaayi alasimenieelesia mala asiaukhasie asire abuundu siong'ene khulwe chindaalo saba.

⁵¹Alamenieelesia bulwaale obwo lundi khu ndaalo eya saba. Ne sisipa lukukhu khu silaka sia katani sie buusi namwe sie liaafu, silaka esio aba sili siikhali sitakaase tawe.

⁵²Omusaayi akhoya osia engubo eyo, ebeele eya katani, eye bufuumbo bwe likheese, namwe liaafu, sikila lukukhu lwe kamakele lulikho, mala ekhoya yosibwa.

⁵³“Ne aba oli omusaayi asimenieelesia ne anyoola ali lukukhu se lwamalataane khu ngubo eya katani, eye buusi namwe khwiaafu tawe,

⁵⁴alalaka sisiingwe, mala basire alubeka siong'ene khulwe chindaalo chichiindi saba.

⁵⁵Omusaayi alasimenieelesia lundi ne bamalile khusisiinga. Ne aba lukukhu ne lukhakaluukhasia lukoondo tawe, akhaba ne lukhamalatane tawe, sisiili busa siikhali sitakaase tawe. Mukhoya mwosie sisiindu esio, akhaba ne siipile lukukhu alubeka lwe bweeni namwe lwe nyuma lwong'ene.

⁵⁶Ne aba omusaayi ne asimenieelesia anyoola ali lukukhu lwafulaafulane, alatabula abuundu ao arusie khu ngubo namwe khwiaafu okhwo.

⁵⁷Nono aba lukukhu ne lusibonekha khu ngubo, eya katani, eye buusi namwe liaafu lundi ne lulikho lumalatana, siikhoya siosibwa.

⁵⁸Ne aba engubo, eya katani, eye buusi namwe liaafu nilio basiingile liawangia, alalisiinga lundi, ne lilaba litakaase.

⁵⁹“Nono lino lili lilaka khulwe bulwaale bwe kamakele khu ngubo eye bufuumbo bwe likheese namwe eya katani namwe silaka sia katani namwe eye buusi, namwe khu siindu siosi siosi sisiang'oonwa khukhwama khwiaafu.”