Read lubukusu Bal. 14 Bible Online

Bal. 14 - lubukusu bible

Bal. 14

¹Wele Omunyali Owa Bioosi aboolela Musa ali,

² “Lino nilio lilaka lio mundu owe bulwaale bwe kamakele khu ndaalo eye khutakaasibwa khwewe. Akhoya areerwa khu musaayi.

³Ne omusaayi alamurusia enje we kambi mala amumenieelesie. Ne bwaba bulwaale bwe kamakele ne buonile,

⁴omusaayi alalaka bamureerere chinyuni chibili chindakaase alala ne chiikhu che kumutarakwa, ne silaka sibesemu ne sisiaangu.

⁵Omusaayi alalaka enyuni ndala yiriirwe khu sibuumba siilikho kameechi kamakwalaafu.

⁶Alabukula enyuni ekiindi enamu alala ne chiikhu che kumutarakwa, ne silaka sibesemu ne sisiaangu mala abisiikhe mu malasile ke nyuni eyiriirwe.

⁷Alaanyaka kamalasile khukhwola kamakhabi saba khu mundu olikho otakaasibwa khukhwama mu bulwaale bwewe bwe kamakele, nio alaboolela baandu ali, omundu oyo ali omutakaase. Nio omusaayi alalekhuula enyuni enamu eyo epurukhe eche mundaa.

⁸Ne omundu otakaasibwa alasiinga chingubo chewe, abeke lichuune liewe lioosi, mala esiinge ne nono aba omutakaase. Enyuma wa kano, anyala engila mu kambi, ne kakhali akhoya amenye enje we liiema liewe khulwe chindaalo saba.

⁹Khu ndaalo eya saba lundi, alabeka lichuune liewe lioosi, bunwanwa, bufuumbo bwe khu bisike, ne kamaswa koosi khu mubili kwewe. Nio asiinge chingubo chewe mala esiinge, ne alaba omutakaase.

¹⁰“Khu ndaalo eya munaane alareera kamameeme kamaseecha kabili kakhalimo bubi tawe, ne limeeme lisubeeni lie kumwiiko mulala likhalimo bubi tawe, siianwa sie biakhulia sie bufu butiiti buri bunosie mu ndubi, butubaasibwe ne kamafura. Ne kamafura elita ndala.

¹¹Omusaayi omutakaasisie alabukula omundu otakaasibwe oyo ne biianwa biewe abiile ebweeni wa Wele Omunyali Owa Bioosi.

¹²Ne omusaayi alabukula limeeme liseecha khu kabili ako, mala aane nga siianwa sirusiao kamabi, alala ne kamafura elita ndala. Alabiaana nga siianwa siboofu khu Wele Omunyali Owa Bioosi.

¹³Alereera limeeme abuundu niio bereranga siianwa sie khurusiao bubwoni ne biianwa bie khukhwosia Abuundu Atakatifu. Sikila siianwa sirusiao kamabi sili sio musaayi bulayi bwene nga siianwa sirusiao bubwoni ne sili. Sili sitakatifu lukali.

¹⁴Omusaayi alabukulakho kamalasile ke siianwa sirusiao kamabi mala akaakhe khu mburukunyi khu seecha khwo oyo otakaasibwe, ne khu lwala lukhumwa lwe kumukhono kumuseecha, ne khu lwala luboofu lwe khu sikele siseecha.

¹⁵Omusaayi alabukula kamafura ke kimiseituni mala akachukhe mu sikalabo siewe siikhasi.

¹⁶Ne lundi asiikhe lulwala lwe kumukhono kwewe mu mafura kaali kumukhono kwewe kumukhasi mala aanyake kamafura ne lulwala lwewe ebweeni wa Wele Omunyali Owa Bioosi khukhwola kamakhabi saba.

¹⁷Ne kamafura karamire mu sikalabo mwewe, omusaayi alakaakha khu mburukunyi khu seecha khwo oyo otakaasibwa, ne khu lwala lukhumwa lwe kumukhono kumuseecha, ne khu lwala luboofu lwe sikele siseecha, kamalasile ke siianwa sie khurusiao bubwoni.

¹⁸Ne omusaayi alachukha kamafura kasikaale mu sikalabo siewe khumurwe kwo mundu otakaasibwe oyo. Ne omusaayi alakhola embosio eye khurusiao bubwoni khu mundu oyo ebweeni wa Wele Omunyali Owa Bioosi.

¹⁹“Omusaayi alaana siianwa sirusiao bubwoni khu takaasibwa. Enyuma wa kano aleera sisiaayo khulwe siianwa sie khukhwosia.

²⁰Ne omusaayi alaana siianwa sie khukhwosia nende sie biakhulia khu alutare. Mungila yino omusaayi alamurusiakho bubwoni mala omundu oyo alaba omutakaase.

²¹“Ne kakhali aba omundu oyo nali omutaambi okhanyala aana sisiindu khukhilakhoo tawe, aba alareera khulwe khutakaasibwa khwewe limeeme liseecha nga siianwa sie khumurusiakho bubwoni. Alareera ekilo ndala eye bufu butubaanisibwe ne kamafura khulwe siianwa sie biakhulia.

²²Lundi alareera kamabongobongo kabili namwe kamauusi kamabaya kabili kamaana nga nanyala. Bilala khulwe siianwa sirusiao bubwoni, ne sisiindi khulwe siianwa sie khukhwosia.

²³Khu ndaalo ekhola munaane eye khuakasibwa khwewe, alabireera khu musaayi amuliango kwe liiema lie kumuse ebweeni wa Wele Omunyali Owa Bioosi.

²⁴Omusaayi alabukula limeeme lie siianwa sirusiao bubwoni, kamafura ke kimisabibu mala abiaane nga siianwa siboofu ebweeni wa Wele Omunyali Owa Bioosi.

²⁵Ne omusaayi aleera limeeme lie siianwa sirusiao bubwoni. Ne alaakha kamalasile ke siianwa sirusiao bubwoni khu mburukunyi khu seecha khwo mundu ne khu lukhumwa lwe kumukhono kwewe kumuseecha ne khu lwala luboofu lwe khu sikele siewe siseecha.

²⁶Omusaayi alachukha kamafura khu sikalabo sie kumukhono kwewe kumukhasi.

²⁷Ne alaanyaka kamafura kaali mumukhono kwewe kumukhasi ne lulwala lwe kumukhono kwewe kumuseecha, ebweeni wa Wele Omunyali Owa Bioosi khukhwola kamakhabi saba.

²⁸Omusaayi alaakha kamafura kaali mukhono mwewe khu mburukunyi khu seecha khwo mundu otakaasibwa, khu lukhumwa lwe kumukhono kwewe kumuseecha, ne khu lwala luboofu lwe sikele siewe siseecha niio bara kamalasile ke siianwa sirusiao bubwoni.

²⁹Kamafura kakaandi koosi niko omusaayi ali nako khu sikalabo siewe, omusaayi alakachukha khu murwe kwo mundu otakaasibwa, mala mu ngila yino akhola embosio eye khurusiao bubwoni ebweeni wa Wele Omunyali Owa Bioosi.

³⁰Nono alaana kamabongobongo ako, namwe kamauusi kamabaya kamaana nga nanyala.

³¹Silala silaba siianwa sirusiao bubwoni ne sisiindi nga siianwa sie khukhwosia, alala ne siianwa sie siakhulia. Mungila yino omusaayi alakhola embosio khurusiao bubwoni khuyo otakaasibwa ebweeni wa Wele Omunyali Owa Bioosi.

³²Lino lili lilaka khulwo mundu oli ne bulwaale bwe kamakele, okhanyala khuaana biianwa bibienyekha khulwe khutakaasibwa tawe.”

³³Wele Omunyali Owa Bioosi aboolela Musa ne Aruni ali,

³⁴“Ne mwoola mu sibala sia Kanaani, nisio ndikho muelesia sibe sisienywe, ne ndera lukukhu munju yo mundu mu sibala sienywe.

³⁵Omwene enju oyo akhoya aboolele omusaayi ali bulwaale buli munju mwase.

³⁶Omusaayi alalaka ali, buli sisiindu sirusibwe munju eyo nakhacha khumenieelesia bulwaale obwo tawe, akhakhola ario abale buli siindu munju eyo khuba siikhali sitakaase tawe. Enyuma wakano, omusaayi alacha munju eyo akibone,

³⁷ne khumenieelesia bulwaale obwo. Ne lukukhu olwo lwaba ne luli khwisiisi lie nju ne bipoondo bie lubookha namwe bubesemu, ne khubonekha oli biyabile mwisiisi,

³⁸omusaayi alarura munju eyo mala akikale khulwe chindaalo saba.

³⁹Khu ndaalo eya saba omusaayi alakobola mala akimenieelesie lundi. Aba lukukhu ne lumalatane khwisiisi khwenju.

⁴⁰Omusaayi alarusia lilaka ali kamabaale niko lukukhu lunyoolekhanekho katechulwe, karusibwe khunju, mala kamwaatwe abuundu anyaalu enje we lukoba.

⁴¹Enyuma wako lisiisi lie mukari lioosi nilio baapa epulasita, likhoya liaarakarwa mala epulasita eyaba ne yapwa echukhwe abuundu anyaalu enje we lukoba.

⁴²Ne balabukula kamabaale kakaandi bakobosie niio ako karusibwe, mala epulasita embia yipwe khukhwikasia lisiisi.

⁴³“Lwaaba lukukhu ne lukobola lundi munju enyuma we kamabaale khurusibwa khunju, ne enju chana khuarakarwa ne khukhupwa epulasita,

⁴⁴omusaayi acha alole. Ne lukukhu lwaba ne lumalatane munju eyo, aba seli endakase tawe.

⁴⁵Enju eyo ekhoya etechulwe alala ne kamabaale kayo, ne kimirongooro kiayo ne epulasita yayo yoosi. Ne khukhwola esutwe eyilwe enje we lukoba, abuundu anyaalu.

⁴⁶Buli mundu yesi owingila munju eyo ne yikaalwe alaba omunyaalu khukhwola ekolooba,

⁴⁷Omundu yesi yesi okona asi munju eyo namwe oliamo, akhoya asiinge chingubo chewe.

⁴⁸“Ne kakhali kaaba bali omusaayi echa khulola enju enyuma we khumala lundi, ne anyoola lukukhu se lwamalataane tawe alaboola ali, enju eli endakase, sikila lukukhu lwarusiibweo elala.

⁴⁹Mukhutakaasa enju omusaayi alabukula chinyuni chibili, ne chiikhu che kumurongooro kumutarakwa, ne silaka sibesemu ne sisiaangu.

⁵⁰Alereera enyuni ndala khu sibuumba sie liloba silikho kameechi kamakwalaafu.

⁵¹Nio alabukula chiikhu che kumutarakwa, sisiaangu, silaka sibesemu, ne nyuni enamu mala alabisiikha mu malasile ke nyuni eyiriirwe ne mumeechi kamakwalaafu. Mala alaanyaka khunju khukhwola kamakhabi saba.

⁵²Mungila yino alatakaasa enju ne kamalasile ke nyuni ne kameechi kamakwalaafu, enyuni enamu, chiikhu che kumutarakwa, sisiaangu, ne silaka sibesemu.

⁵³Ne alalekhuula enyuni enamu epurukhe erure mu lukoba eche mundaa. Ne mungila yino alakhola embosio khulwe nju yino mala elaba endakase.”

⁵⁴Elino nilio lilaka khuloondekhana ne bulwaale bwe kamakele nende bwe lukukhu.

⁵⁵Bulwaale buno buli bwe khukhwiyakala, lwe chingubo ne chinju,

⁵⁶kamabiimba, kamaboondo namwe kamakoonjo.

⁵⁷Kamalaka kano kokesia siise siina nisio sisiindu sili siikhali sitakaase tawe, ne siise siina nisio sindu sili similiiu.