Read lubukusu Bal. 15 Bible Online

Bal. 15 - lubukusu bible

Bal. 15

¹Wele Omunyali Owa Bioosi aboolela Musa ne Aruni ali,

²“Boolela babaandu ba Isiraeli oli, omundu owe siseecha yesi yesi oli ne bulwaale bwe khucha kamayila, namwe kameechi aba se ali omutakaase tawe.

³Kumubili kwaba ne kurura bibiindu ebio namwe bikwikasie, aba se ali omutakaase tawe.

⁴Khu sitanda nisio oocha kamayila ekhalakho namwe akonakho, siliba siikhali sitakaase tawe. Ne buli siindu siosi siosi nisio ekhalakho silaba siikhali sitakaase tawe.

⁵Omundu yesi yesi owetiila khu sitanda siewe, alasiinga chingubo chewe, mala esiinge, ne arama okhali omutakaase tawe khukhwola ekolooba.

⁶Namwe owikhala khu siindu siosi siosi nisio omundu oyo ekhalakho, khukhwola alasiinga chingubo chewe, mala esiinge, ne alasikala okhali omutakaase tawe khukhwola ekolooba.

⁷Omundu yesi yesi otiila khu mundu oocha kamayila, kamafuki namwe kameechi akhoya asiinge chingubo chewe mala esiinge ne asikala okhali omutakaase tawe khukhwola ekolooba.

⁸Ne omundu ocha kamayila, kamafuki namwe kameechi oyo ne afucha khu mundu yesi yesi oli omutakaase omundu oyo akhoya asiinge chingubo chewe mala esiinge, ne aba alasikala okhali omutakaase tawe khukhwola ekolooba.

⁹Khu ndebe yosi yosi niyo omundu oocha kamayila, kamafuki namwe kameechi ekhalakho selaba endakase tawe.

¹⁰Omundu yesi yesi owetiila khu siindu siosi siosi nisio omundu oyo ekhalekho, se alaba omutakaase tawe khukhwola ekolooba. Omundu yesi yesi osuta sisiindu siosi siosi nisio omundu ocha kamayila ekhalekho, khukhwola alasiinga chingubo chewe mala esiinge ne alasikala okhali omutakaase tawe khukhwola ekolooba.

¹¹Omundu ocha kamayila alatiila khu mundu yesi yesi, nakhanyoile asaaba kamakhono kewe tawe, omundu niye atiililekho oyo akhoya asiinge chingubo chewe lundi esiinge, mala alasikala okhali omutakaase tawe khukhwola ekolooba.

¹²Enyuungu yosi yosi niyo omundu ocha kamayila atiilakho khukhwola yarwe. Ne sibuumba siosi siosi sisiabeechwa khukhwama khu murongooro nisio omundu oyo atiilakho, khukhwola sisiingwe.

¹³“Ne omundu naonile bulwaale bwewe khukhwola alinde chindaalo saba chiwe nio asiinge chingubo chewe mala esiinge mu meechi kamakwalaafu, ne alaba omutakaase.

¹⁴Khu ndaalo eya munaane alabukula kamabongobongo kabili namwe kamauusi kamabaya kamaana kabili mala akayile amuliango kwe liiema lie kumuse, ebweeni wa Wele Omunyali Owa Bioosi mala akakaanisie omusaayi.

¹⁵Omusaayi alaana lilala khu kabili nga siianwa sirusiao bubwoni ne liliindi nga siianwa sie khukhwosia. Mungila yino omusaayi alaana embosio khulwe khurusiao bubwoni bwo mundu oyo ebweeni wa Wele Omunyali Owa Bioosi.

¹⁶“Ne omundu aba ne arusia kamaani ko museecha, khukhwola esiinge buli abuundu, ne alaba nakhali omutakaase tawe khukhwola ekolooba.

¹⁷Ne buli engubo yosi yosi namwe lisielo nibio kamaani ko omuseecha ako kachilekho bikhoya biasiingwa, ne bilaba biikhali bitakaase tawe khukhwola ekolooba.

¹⁸Enyuma wo mundu khuba ne omukhasi, boombi bakhoya besiinge, mala balasikala bakhali batakaase tawe khukhwola ekolooba.

¹⁹“Omukhasi ne ali mu ndaalo chewe chimbi, alasikala okhali omutakaase tawe khulwe chindaalo saba. Ne omundu yesi yesi omutiilakho alaba okhali omutakaase tawe khukhwola ekolooba.

²⁰Sisiindu siosi siosi nisio ekhalakho namwe akonakho mu ndaalo echo silaba siikhali sitakaase tawe.

²¹Omundu yesi yesi otiila khu sitanda sio mukhasi oyo alasiinga chingubo chewe mala esiinge, ne alaba okhali omutakaase tawe khukhwola ekolooba.

²²Ne omundu yesi yesi otiila khu siindu siosi siosi nisio omukhasi oyo ekhalekho, alasiinga chingubo chewe, mala esiinge, ne alaba okhali omutakaase tawe khukhwola ekolooba.

²³Sibele sitanda namwe sisiindu siosi siosi nisio omukhasi oyo ekhalangakho, omundu osietiilakho alaba okhali omutakaase tawe khukhwola ekolooba.

²⁴Ne omundu naba ne omukhasi oyo mu ndaalo chewe chimbi, alasikala okhali omutakaase tawe khulwe chindaalo saba. Ne sitanda siosi siosi nisio akonakho silaba siikhali sitakaase tawe.

²⁵“Omukhasi ne akhobokha khulwe chindaalo chingali khukhila nga abechanga mu ndaalo chewe chimbi, alasikala okhali omutakaase tawe mu ndaalo chosi nicho atasilekho. Kalaba busa nga nabechanga nali mu ndaalo chewe chimbi.

²⁶Buli sitanda nisio akonakho, mu siise sie khukhobokha silaba siikhali sitakaase tawe.

²⁷Ne omundu yesi yesi otiila khu biindu bino alaba okhali omutakaase tawe, ne akhoya asiinge chingubo chewe mala esiinge, ne alasikala okhali omutakaase tawe khukhwola ekolooba.

²⁸Namalile khukhobokha, akhoya alindiilile chindaalo saba ne aba omutakaase.

²⁹Khu ndaalo eya munaane alabukula kamabongobongo kabili namwe kamauusi kamabaya kabili kamaana ayile khu musaayi amuliango kwe liiema lie kumuse.

³⁰Omusaayi alaana lilala khu niko nga siianwa sirusiao bubwoni ne liliindi nga siianwa sie khukhwosia. Ne mungila yino omusaayi alaana embosio khulwe khurusiao bubwoni ebweeni wa Wele Omunyali Owa Bioosi.

³¹“Wele Omunyali Owa Bioosi aboolela Musa khu kaambila babaandu ba Isiraeli khuloondekhana ne khulekha khu takaasibwa nio balekhe khu nyaalutia Liiema lia Wele Omunyali Owa Bioosi liliaba akari we kambi, busa bakhafwiile mu bwoni.

³²“Kano kali kamalaka khu mundu ocha kamayila, kamafuki, kameechi namwe orura kamaani ko museecha.

³³Lundi kosi kali kamalaka ko mukhasi oli mu ndaalo chewe chimbi. Ne lundi kali khu mundu oba no mukhasi oli mundaalo chewe chimbi.”