Read lubukusu Bal. 16 Bible Online

Bal. 16 - lubukusu bible

Bal. 16

¹Wele Omunyali Owa Bioosi aalomaloma khu Musa enyuma we basoleeli babili ba Aruni ne bamalile khufwa, nga baba ne balikho baanila Wele Omunyali Owa Bioosi kumulilo kukhali kumutakatifu tawe.

² Wele Omunyali Owa Bioosi aboolela Musa ali, “Boolela wandaayo Aruni oli akhechaka siise siosi siosi, enyuma we pasia Abuundu Atakatifu Lukali ebweeni we ndebe eye siisa eli khwi Sanduku lie Ndakaano tawe. Akhola ario afwa.

³ Eyino niyo engila niyo Aruni anyala achelamo Abuundu Atakatifu Lukali: Akhoya khureera euunwa endiiti khulwe siianwa sirusiao bubwoni, ne limiiku khulwe siianwa sie khukhwosia.

⁴“Aruni akhoya abe ne esiingile, mala efwaare likooti lie katani likatakatifu ne sirwari eye katani, eboele kumusiipi kwa katani ne sileemba sia katani. Chino chili chingubo chindakatifu.

⁵“Alabukula khukhwama mu libuusiana lie babaana ba Isiraeli chindurume chibili khulwe siianwa sirusiao bubwoni ne limiiku khulwe siianwa sie khukhwosia.

⁶Ne Aruni alarusia euunwa nga siianwa sirusiao bubwoni bwewe omwene, ne bubwoni bwe luuya lwewe.

⁷Ne alabukula chindurume chibili ayile ebweeni wa Wele Omunyali Owa Bioosi amuliango kwe Liiema lie kumuse.

⁸Abwenao Aruni alapa chikura khu mbusi chibili, ndala ekwila Wele Omunyali Owa Bioosi ne ekiindi ekwila Asaseli.

⁹Aruni alarusia embusi ekwilile Wele Omunyali Owa Bioosi, mala akiaane nga siianwa sirusiao bubwoni.

¹⁰Ne kakhali embusi ekwilile Asaseli elaanwa khu Wele Omunyali Owa Bioosi neli enamu mala eyilwe mu sichiimi khu Asaseli, nio emaleo bubwoni bwe babaandu.

¹¹“Aruni alaana euunwa nga siianwa sie bubwoni bwewe omwene ne bwe luuya lwewe. Aleera euunwa nga siianwa sirusiao bubwoni bwewe.

¹²Alanjala kumulilo kwe kamaanda kukwising'eng'ile kwichule lukaraya lwe khukhwanjalilakho, khukhwama khu alutare ebweeni wa Wele Omunyali Owa Bioosi, ne chifuusi chibili che bupaani bunosie mala abireere Abuundu Atakatifu Lukali.

¹³Ne akhoyela aree bupaani khu mulilo ebweeni wa Wele Omunyali Owa Bioosi nio liliisi lie bupaani lilafweela lifunikhe endebe eye siisa eeli khu lisanduku lie Ndakaano. Nio akhakhola ario alibona mala afwa tawe.

¹⁴Alabukula kamalasile ke euunwa eyo aroongemo lulwala akaanyake khu ngaaki khwe ndebe eye siisa ne lundi aanyake kakaandi khukhwola kamakhabi saba ebweeni we Lisanduku lie Ndakaano.

¹⁵ “Namalile ario, areere embusi eye siianwa sirusiao bubwoni khulwe babaandu, mala areere kamalasile kayo Abuundu Atakatifu Lukali mala akaanyake khu ndebe eye siisa, nga ne aakhola kamalasile ke euunwa.

¹⁶Mungila yino alarusiao bubwoni Abuundu Atakatifu Lukali khubela bunyaalu bwe babaandu ba Isiraeli, ne kamabi kabwe koosi. Ne lundi akhoya akhole ario khu Liiema lie kumuse, sikila lili akari we kambi ekhali endakase tawe.

¹⁷Omundu yesi yesi akhabakho mu Liiema lie kumuse khukhwama siise nisio Aruni engila Abuundu Atakatifu khumalao bubwoni khukhwola nga narura enje tawe. Kakhoya kabe kario khukhwola nga emalakho bubwoni bwewe omwene, be luuya lwewe, ne khulwe babaandu boosi Baisiraeli.

¹⁸Enyuma wakano acha khu alutare eli ebweeni wa Wele Omunyali Owa Bioosi khu kikwalaasia. Alabukula kamalasile ke euunwa ne ke mbusi mala akaakhe khunjika che khu alutare.

¹⁹Akhoya aanya kamaalasile ne lulwala lwewe khu alutare khukhwola kamakhabi saba. Mungila yino alakikwalaasia khukhwama khu bwoni bwe babaana ba Isiraeli ne khukikhola ebe endakatifu.

²⁰“Aruni namalile khukwalaasia Abuundu Atakatifu, Liiema lie kumuse, ne alutare, alareera embusi enamu.

²¹Aruni alarakho kamakhono kewe koombi khu murwe kwe mbusi enamu mala ekanilekho kamabi kewe koosi nende ke babaandu ba Isiraeli. Bubwoni ne kamabi kabwe koosi akare khu murwe kwe mbusi. Namalile ario omundu oroborwe alatimania embusi ne khu kiyila mu sichiimi.

²²Embusi elasuta bubwoni bwabwe bwoosi ebuyile mu sichiimi nimwo omundu akhamenyile tawe.

²³ “Ne Aruni alengila mu Liiema lie kumuse, mala afuule chingubo che katani nicho aafwara ne engila Abuundu Atakatifu, mala achilekhe mu bwenomwo.

²⁴Ne alesiinga Abuundu Atakatifu, mala afware chingubo chewe. Namalile ario alarura enje ache aane siianwa sie khukhwosia khurusiao bubwoni bwewe omwene ne bwe babaandu bewe.

²⁵Aloselia khu alutare kiminawa kie sisiaayo khulwe siianwa sirusiao bubwoni.

²⁶Ne omundu otimaanie embusi aayiila mu sichiimi khu Asaseli, akhoya asiinge chingubo chewe, mala esiinge, nio engile mu kambi.

²⁷ Euunwa ne mbusi birumikhirwe khulwe siianwa sirusiao bubwoni, nibio kamalasile kabio kareerwa Abuundu Atakatifu khurusiao bubwoni, bilasutwa birusibwe enje we kambi. Kamasielo, chinyama ne kamasisie kabio bilosibwa.

²⁸Yesi yesi obiosia akhakobola mu kambi tawe, akhoya asiinge chingubo chewe ne khukhwesiinga.

²⁹ “Ne lino likhabe lilaka khwise mindali, Khu ndaalo ekhola ekhumi, eye kumwesi kwa saba, mukheyimane mwabene lundi mulekhe khukholakho kumulimo kwosi kwosi, babele baakwa namwe basaalwa.

³⁰Khu ndaalo eyo mukharusibwe khukhwama mu bwoni bwenywe bwoosi. Mukhatakaasibwe khukhwama mu bwoni bwenywe bwoosi ebweeni wa Wele Omunyali Owa Bioosi.

³¹Endaalo eyo elaba esabato endakatifu lukali eye khukhebulila, lundi eli endaalo eye khulola. Lili lilaka lia mindali.

³²Omusaayi owachukhwakho kamafura owarebwakho kumukhono ne khuroborwa abukule khukhwila mu bubweyaangu bwa raraawe alakhola kumulimo kwe khutakaasa. Alafwara chingubo che busaayi.

³³Alatakaasa Abuundu Atakatifu Lukali, ne Liiema lie kumuse ne alutare, basaayi ne babaandu boosi.

³⁴Lino likhabe lilaka lia mindali khwinywe. Kumwiima kuno khukhwola kukholwe lulala khu mwiiko, khulwe babaandu ba Isiraeli, sikila bubwoni bwabwe bwoosi.” Nio Musa aakhola nga Wele Omunyali Owa Bioosi aba ne amulakile.