Read lubukusu Bal. 17 Bible Online

Bal. 17 - lubukusu bible

Bal. 17

¹Wele Omunyali Owa Bioosi aaboolela Musa ali,

²“Lomaloma khu Aruni ne babaana bewe ne babaandu ba Isiraeli boosi. Baboolele oli, lino nilio lilaka lia Wele Omunyali Owa Bioosi.

³Omuisiraeli yesi yesi owirira ekhaafu namwe limeeme namwe embusi mu kambi, namwe enje we kambi,

⁴ne se abireera emuliango kwe liiema lie kumuse nga siianwa khu Wele Omunyali Owa Bioosi tawe, alaba nga ochukhile sifuki, alarusibwa mu baandu bewe.

⁵Sifuno sie lilaka lino sili bali, luno babaandu ba Isiraeli bakhoya khureera khu Wele Omunyali Owa Bioosi bibiaayo nibio bereeranga busa mundaa. Luno balabireera khu musaayi amuliango kwe liiema lie kumuse mala babiire bibe nga biianwa bie kumuleembe bia Wele Omunyali Owa Bioosi.

⁶Omusaayi alaanyaka kamalasile khu alutare eya Wele Omunyali Owa Bioosi amuliango kwe liiema lie kumuse, mala osie kiminaawa kirusia kumuuya kusiimisia Wele Omunyali Owa Bioosi.

⁷Baisiraeli se bakhoya balooba khuba basubilwa khu Wele Omunyali Owa Bioosi, khulwe khu khwirira chimosi chabwe mundaa nga chimbosio khu bisieeno tawe. Babaandu baisiraeli khukhwola baabikhe lilaka lino mindali na mindali.

⁸“Baboolele muli, Omuisiraeli yesi yesi namwe omukwa obamenyilemo, orusia siianwa sie khukhwosia namwe embosio,

⁹ne se areera amuliango kwe liiema lie kumuse, khuaana nga embosio khu Wele Omunyali Owa Bioosi tawe, omundu oyo se alaba lundi mulala khu baandu ba Wele tawe.

¹⁰ “Ne Omuisiraeli yesi yesi namwe omukwa obamenyilemo nalia kamalasile, ndamufutarira ne se ndamubala lundi nga mulala khu baandu base tawe.

¹¹ Bulamu bwa buli sindu buli mumalasile, nisio sikila Wele Omunyali Owa Bioosi ne alakiilisia ali kamalasile koosi khukhwola kachukhwe khu alutare khurusiao bubwoni bwe babaandu. Kamalasile niko bulamu, mala niko karusiao bubwoni.

¹²Nisio sikila ne nabooleele babaandu ba Isiraeli ndi, omundu yesi yesi mu nibo namwe omukwa owa bamenyamo akhalia kamalasile tawe.

¹³“Ne Omuisiraeli yesi yesi namwe omukwa owabamenyamo yesi yesi naaya esaang'i namwe enyuni enyala yaliibwa mala akiire, alachukha kamalasile kayo mala akafuunikhe ne liloba.

¹⁴Sikila bulamu bwa buli sibuumbe silamu buli mu malasile kasio. Kamenako niko kakila nemboolela babaandu ba Isiraeli ndi, bakhaliakho enyama esilimo kamalasile tawe, sikila bulamu bwe sibuumbe siosi siosi buli mu malasile. Ne yesi yesi okalia se alaba lundi mulala khu baandu bewe tawe.

¹⁵“Omundu yesi yesi, Omuisiraeli namwe omukwa, olia enyama eye san'gi efwiile namwe eyirirwe ne saang'i, akhoya asiinge chingubo chewe, lundi esiinge mala alaba okhali omutakaase tawe khukhwola ekolooba, nio abe omutakaase.

¹⁶Aaba ne akhachisiinga namwe esiinga tawe, aba aletiuukha bubwoni bwewe.”