Read lubukusu Bal. 18 Bible Online

Bal. 18 - lubukusu bible

Bal. 18

¹Wele Omunyali Owa Bioosi aaboolela Musa ali,

²“Boolela babaandu ba Isiraeli oli, ‘Ese ndi Wele Omunyali Owa Bioosi, Wele wenywe.

³Mukhaloonda bikholwa bie Bamisiri niio mwamenyanga tawe, namwe bikholwa bie Bakanaani niio ndikho muyila tawe. Mukhaloonda kamalaka kabwe tawe.

⁴Ria kamalaka kase mala mukaloonde. Ese ndi Wele Omunyali Owa Bioosi, Wele wenywe.

⁵ Khwako loonda kamalaka ne bikholwa nibio ndikho muelesia, mulamenya mwaba ne mukhola murio ese ndi Wele Omunyali Owa Bioosi.’ ”

⁶Wele Omunyali Owa Bioosi aana kamalaka kano. “Okhakhola sifwaabi no mulebe yesi yesi tawe.

⁷Okhaambia raraao chisoni khulwe khukhola sifwaabi ne maao tawe.

⁸ Okhakhola sifwaabi ne mukha raraao tawe.

⁹ “Okhakhola sifwaabi ne wandaayo omukhaana, abeele owa raraao namwe owa maao namwe omusaalwa we mungo namwe owe nje tawe.

¹⁰Okhakhola sifwaabi no mwichukhulu wowo tawe, sikila chino chili chisoni khwiwe.

¹¹Okhakhola sifwaabi ne wandaayo omukhaana owe khuluyia tawe sikila yesi ali wandaayo niye.

¹² Okhakhola sifwaabi ne sengeo tawe, sikila ali wandaye owa raraao.

¹³Okhakhola sifwaabi ne wandaaye owa maao tawe sikila yesi ali maao.

¹⁴Okhakhola sifwaabi nende bamukha raraao babaandi tawe sikila bali mukha wandaye ba raraao.

¹⁵ Okhakhola sifwaabi ne mukho mwana wowo tawe, sikila ali omukhwe.

¹⁶ Okhakhola sifwaabi ne mukha wandaayo tawe sikila ali omukhasi owa wandayo.

¹⁷ Okhakhola sifwaabi sie khubukula maawe no mwana khuba nga bakhasi bowo tawe. Sikila olwo luli luuswa nilwo.

¹⁸Okhareera mulamuo omukhasi wowo omwene nasiili omulamu tawe.

¹⁹ “Okhaba ne omukhasi ne ali mu ndaalo chewe chimbi tawe.

²⁰ Okhakhola sifwaabi no mukhasi owa bene tawe, sikila wenyaalutia.

²¹ Okharusia balala khu baana bowo obaane khubirira mumulilo nga siianwa khu sifwaani wele Moleki, mala obiiye Lisina lia Wele wowo tawe, Ese ndi Wele Omunyali Owa Bioosi.

²² Okhakhola sifwaabi no museecha wasio tawe. Sikila luli luuswa lubi.

²³ Omundu yesi yesi akhakhola sifwaabi ne saang'i tawe. Sikila sili sikholwa siibi lukali.

²⁴“Mukhenyaalutia mwabene ne bibiindu bino tawe, sikila bino bioosi nibio chikholo nicho ndikho ndimania ebweeni wenywe chenyaalutianga nabio,

²⁵mala sibala siekhola siikhali sitakaase tawe, nio nasielesia kumunaanio. Mala sibala chana sialoba babaandu baba ne bamenyilemo.

²⁶Ne kakhali murie kamalaka kase ne mukhakholakho silala khu bie sifwaabi bino tawe. Abeele omusaalwa namwe omukwa.

²⁷Sikila babaandu be sibala sino ba baaba ebweeni wenywe bakhola sifwaabi, mala sibala siaba sinyaalu.

²⁸Sibala siikhakhola sirio siamuloba enywe ne mu sinyaalutia tawe. Nga sialoba babaandu babamenyangamo enywe ne mukhachayo tawe

²⁹Sikila omundu yesi yesi oolikhola sifwaabi sino se aliba mulala khu baandu bewe tawe.

³⁰“Nono, ria kamalaka niko ndusia mala mukhakholakho kimiima kisinyisia kikiakholwa ne babaandu ba baamenya mu sibala enywe ne mukhachamo tawe. Mukhenyaalutia nakio tawe. Ese ndi Wele Omunyali Owa Bioosi, Wele wenywe.”