Read lubukusu Bal. 19 Bible Online

Bal. 19 - lubukusu bible

Bal. 19

¹Nio Wele Omunyali Owa Bioosi aaboolela Musa ali,

² “Boolela babaandu Baisiraeli oli, ba batakatifu, sikila, Ese Wele Omunyali Owa Bioosi, Wele wenywe ndi Omutakatifu.

³ Buli mulala khwinywe khukhwola arie maawe ne raraawe ne lundi mulinde chisabato chase. Ese ndi Wele Omunyali Owa Bioosi, Wele wenywe.

⁴ “Mukhasaaya bifwaani, namwe mweng'oonele bawele be bibia tawe: Ese ndi Wele Omunyali Owa Bioosi, Wele wenywe.

⁵“Ne muaana embosio eye siianwa sie kumuleembe khu Wele Omunyali Owa Bioosi, mukhoya muaane mungila niyo munyala mwafukiililwamo.

⁶Sikhoya siliibwe khu ndaalo eng'ene niyo musiaanilekho, namwe khu ndaalo eloondakho, ne siosi siosi sisikala khukhwola khu ndaalo eya khataru, khukhwola siosibwe.

⁷Kaaba bali siliibwa khu ndaalo ekhola khataru, aba se sili sitakaase tawe, se sifukiililwa tawe,

⁸ne buli mundu osilia alaba ne bubwoni, sikila aba anyaalutie sisiindu sitakatifu sia Wele Omunyali Owa Bioosi, ne omundu nga oyo ario salaba lundi nga mulala khu baandu bewe tawe.

⁹ “Nga ne mukesa biakhulia mu mikuunda kienywe, mukhakesa mwoselia elala khundulo khwakio tawe, ne lundi mukhakobolelamo mwakesa bibiebachile tawe.

¹⁰Ne mukhafuna kimisabibu mwamalilakho elala tawe, namwe khukhwangala kamatuunda kakwile asi tawe, mukhoya mulekhelekho bataambi ne baakwa: Ese ndi Wele Omunyali Owa Bioosi, Wele wenywe.

¹¹ “Mukheeba tawe namwe mwabeana tawe

¹² Mukhechuba mu lisina liase mu bubeeyi mala mwonake lisina liase tawe. Ese ndi Wele Omunyali Owa Bioosi.

¹³ “Mukhapia sibi babasienywe namwe mwabanuula bibiindu biabwe tawe. Mukhakhayila khu muruungo kwe bakholi benywe tawe, yakhaba silo silala siong'ene tawe.

¹⁴ Mukhalaama omumiinyi, namwe mure sisiindu ebweeni wo mubofu etuyekho tawe, ne kakhali murie Wele wenywe. Ese ndi Wele Omunyali Owa Bioosi.

¹⁵ “Mukhakhola bukhalaki bukhali bwa ng'ali mu muse tawe, mukhayekhela bataambi namwe murie baiinda tawe. Ne kakhali mukhoya mukhalakile babaandu mu buluungi.

¹⁶Okhasalanisia bubeeyi khu baandu mu baandu tawe, ne okhakholakho sisiindu siosi siosi sisionaka bulamu bwo mundu tawe. Ese ndi Wele Omunyali Owa Bioosi.

¹⁷ “Okhapa wandayo siikhoonde tawe, ne kakhali muuliilisiane nowasio. Ne busa okhola orio waba ne bubwoni sikila niye.

¹⁸ Mukharuungisia bubi ne bubi khu mundu yesi yesi tawe namwe oambile siikhoonde babaana be balebe benywe tawe. Ne kakhali siima owasio nga ne wesiima wamwene. Ese ndi Wele Omunyali Owa Bioosi.

¹⁹ “Murie kamalaka kase. Mukhalekha chikhaafu chelusiana ne chisaang'i chichiindi tawe, okhamiicha mu mukuunda kwowo bumiicho chingano chibili tawe. Lundi okhefwara engubo eyakholwa khubilaka bibili bibiaukhaane tawe.

²⁰“Omundu nakhola sifwaabi no mukhasi oli nasioobi, oseleelwe no mundu okundi mala okhali omulekhuule tawe, babekhasia musiina ne se baleerwa tawe, sikila omukhasi oyo se ali omulekhuule tawe.

²¹Ne kakhali omundu oyo alareera limiiku emuliango kwe liiema lie kumuse nga siianwa sie kamabi kewe omwene khu Wele Omunyali Owa Bioosi.

²²Ne omusaayi alakhola embosio eye khumumalao bubwoni ne limiiku lie siianwa sirusiao bubi ebweeni wa Wele Omunyali Owa Bioosi khu bwoni nibwo akhola, ne abeelwa bubwoni nibwo akholile.

²³“Ne mwingila mu sibala sia Kanaani mala mwabiaala kimirongooro kia buli lukano khulwe biakhulia, mukhoya khubukula kamatuunda kakio nga kumusilo khukalia,” Kamatuunda kakio se kaalibwa tawe khulwe kimiiko kitaru kie khunyoa.

²⁴Ne mu mwiiko kukhola khane kamatuunda kakio koosi kalaba kamatakaase, nga siianwa sie efuma khu Wele Omunyali Owa Bioosi.

²⁵Ne kakhali khu mwiiko kukhola kharaano munyala mwalia kamatuunda kakio, mungila yino kimirongooro kienywe kilama kamatuunda kamakali lukali: Ese ndi Wele Omunyali Owa Bioosi Wele wenywe.

²⁶ “Mukhalia enyama yosi yosi elimo kamalasile tawe. Mukhakholakho bufumu namwe bulakusi namwe bulosi tawe.

²⁷ Mukhabeka kimirwe kienywe binyoosi, namwe mwabeka bunwanwa bwenywe tawe.

²⁸Mukhekhalakaka mwabene sikila ofwiile, namwe mwesalaka chisale tawe. Ese ndi Wele Omunyali Owa Bioosi.

²⁹ “Mukhakhola bakhaana benywe baba banyaalu khulwe khuba bataamba tawe, mukhakhola murio sibala siabamo sifwaabi ne butaamba tawe.

³⁰ Liinda chi sabato chase mala murie abuundu ase atakatifu. Ese ndi Wele Omunyali Owa Bioosi.

³¹ “Mukhayiima buyeeti khu balakusi namwe bafumu tawe. Ne mukhola murio se mulaba batakaase tawe. Ese ndi Wele Omunyali Owa Bioosi, Wele wenywe.

³²“Mukhoya mwenyokhela basaakhulu ne khuria babaandu bakhulu. Ria Wele wenywe: Ese ndi Wele Omunyali Owa Bioosi.

³³ “Mukhakholela baakwa bamenyile mu sibala sienywe kamabi tawe.

³⁴Kholela omukwa niye omenyile ne naye nga omusaalwa, mala omusiime nga wesiima wamwene, sikila mwesi mwaba baakwa mu sibala sie Misiri: Ese ndi Wele Omunyali Owa Bioosi, Wele wenywe.

³⁵ “Mukharumikhirakho sikelo sie bubeeyi mu khupiima buleeyi, busiro ne bukali tawe.

³⁶Murumikhire bipiimilo bia ng'ali, bipiima busiro ne bipiima buleeyi buuli bwa ng'ali. Ese ndi Wele Omunyali Owa Bioosi, Wele wenywe owamurusia mu sibala sie Misiri.

³⁷Murie kamalaka kase koosi, mukarumikhire. Ese ndi Wele Omunyali Owa Bioosi.”