Read lubukusu Bal. 2 Bible Online

Bal. 2 - lubukusu bible

Bal. 2

¹“Omundu yesi yesi ne areera siianwa sie likesa khu Wele Omunyali Owa Bioosi, siianwa siewe sikhoya sibe sie bufu bunosie. Alabuchukhakho kamafura ne khuburakho biiunya bulayi.

²Ne amalile ario abukule bufu obwo, abuyile khu bo khwa Aruni basaayi. Ne omusaayi alabukhwayakho efuusi ndala sitube ne kamafura, ne biiunya bulayi bioosi. Ne omusaayi alabwoselia khu alutare nga simanyilo sie likhebulila, siianwa sie kumulilo, khuunya khulayi khusiimisia Wele Omunyali Owa Bioosi.

³Ne siianwa sie biakhulia siramirekho silaba sia Aruni ne babaana bewe basoleeli. Sili sikelo sitakatifu lukali sie biianwa bie kumulilo khu Wele Omunyali Owa Bioosi.

⁴“Ne noreera siianwa sie likesa esio sitekhiilwe mu ndekhelo nga siianwa, siikhoya siaba sie kimikaati kikhalimo limela tawe, kie bufu bunosie burokiirwe ne kamafura, namwe kimikaati kikhalimo limela tawe, kiaakhiilwe kamafura.

⁵“Ne siianwa siowo sie likesa siaba ne siiliile khu lucho, siikhoya siaba sie bufu bunosie bukhalimo limela tawe, butubaanisibwe ne kamafura.

⁶“Olasimesula mu bimesu mala lundi osichukhekho kamafura. Sikila sili siianwa sie likesa.

⁷“Ne siianwa siowo siaba ne sili sie likesa, siiliile khu lucho, siikhoya siikholwe khukhwama khu bufu bunosie ne kamafura.

⁸Ne olareera siianwa sie likesa siing'oonilwe khukhwama khu biindu bino khu Wele Omunyali Owa Bioosi. Sieelesibwe omusaayi, naye alasireera khu alutare.

⁹Ne omusaayi alabukulakho khu sianwa sie likesa bitiiti biri bie likhebulila mala abioselie khu alutare nga siianwa sie kumulilo, sie kumuuya kulayi kusiimisia Wele Omunyali Owa Bioosi

¹⁰Ne siianwa sie likesa siramirekho silaba sia Aruni ne babaana bewe. Sili sitonyi sitakatifu lukali sie biianwa bie khuaana sie kumulilo khu Wele Omunyali Owa Bioosi.

¹¹“Siianwa sie likesa nisio olareera khu Wele Omunyali Owa Bioosi siikhabamo limela tawe. Okhoosiakho limela namwe bubuukhi nga siianwa sie kumulilo khu Wele Omunyali Owa Bioosi tawe.

¹²Munyala mwabireera khu Wele Omunyali Owa Bioosi nga biianwa bie bibiaamo bie khunyoa, ne se bikhoya biianwa khu alutare khulwe khuaana kumuuya kumulayi tawe.

¹³Ra chumbe mu buli siianwa sie likesa sioosi, mukhalekha chumbe eye ndakaano ne Wele wenywe yataamba mu siianwa sienywe sie likesa tawe. Mukhoya mure chumbe khu biianwa bienywe bioosi.

¹⁴“Kaaba bali oaana siianwa sie likesa sienywe sie khunyoa khu Wele Omunyali Owa Bioosi, okhoya oaane siakhulia sie likesa sienywe sie khunyoa, aana siakhulia sisioosie namwe siuule.

¹⁵Ne olasirakho kamafura ne biiunya bulayi. Sili siianwa sie likesa.

¹⁶Ne omusaayi alosia sitonyi esio nga sie khukhebulila, alala ne kamafura ne biiunya bulayi bioosi. Sili siianwa siing'oonilwe ne kumulilo khu Wele Omunyali Owa Bioosi.”